وێنە: تەعجیل ئەو گەڕەکەی هەر بە "کلاسیکی" ماوەتەوە

هەواڵ / گەلەری :: پێش 3 هەفتە ‌ :: 1178‌ جار بینراوە

دواڕۆژ، هانا چۆمانی 
لەناوەڕاستی شاری هەولێر و بەدووری 200 مەتر لە بەشی رۆژئاوای قەڵای شارەکەوە گەڕەکێکی "کلاسیکی" هەیە بەنای تەعجیل و جگە لەوەی خواردن و شوێنەکە سیمای کۆنی پێوە ماوە، لەرەمەزانانیشدا بوەتە شوێنی کۆبونەوەی هاووڵاتیان و تا بەرەبەیان خەڵک لەوێ دەمێنێتەوە.


رامیار حەسەن، گەنجێکی تەمەن 28 ساڵی شاری هەولێرە و بە دواڕۆژی وت "9 ساڵی تەواوە لە رەمەزاناندا سەدانی گەڕەکی تەعجیل دەکەم و سەرجەم پارشێوانی رەمەزان لەو ناوچەیە بەسەر دەبەم لەگەڵ هاوڕێکانمدا کە کورد و عەرەب و تورکمانن".

وتیشی "من هەموو شەوێکی رەمەزان دوای بەربانگ دێمە دەرەوە لەماڵەوە و تا پارشێو لە گەڕەكی تەعجیل لەگەڵ هاوڕێیانم یاری دەکەم و تا ئەوکاتەی پارشێویش دەکەم پاشان دەگەڕێمەوە بۆماڵەوە".

ماوەی چەند ساڵێکە وەک نەریتێک هاووڵاتیانی شاری هەولێر شەوانی رەمەزان زیاتر دێنە دەرەوە و روو لەبازاڕ و شوێنەکانی خواردن و کاتبەسەربردن دەکەن کە تەعجیلیش یەکێکە لەوانە.

وەستا نازم کە ماوەی 21 ساڵە لە گەڕەکی تەعجیل دوکانی هەیە و ماڵیشی هەر لەوێیە بۆ دواڕۆژ دەڵێت "من راهاتووم بەبێ تەعجیل ناژیم بابم و باپیریشم لێرە بوون و چێشتخانەیان هەبوو، ئێستا لەرەەمەزاناندا زیاتر هاووڵاتیان رووم تێدەکەن جگە لە شەوانی ساردی زستانیش".

لەبارەی خواردن و خواردنەوەکانی گەڕەکی تەعجیل وتی "لێرە چەند جۆرێك خواردنی گۆشتی باڵندە و ئاژەڵ هەیە، جگە لەوەی گەنجان و کەسانی بەتەمەن یاری سینی سینیانێ، تاوڵە، دۆمینە و کۆنکەن دەکەن، لە پاڵیدا نێرگەلەکێشان، بەخواردنەوەی چا و قاوە و گوڵەبەڕۆژەش خۆیان سەرقاڵ دەکەن".
  
کەمال عەبدوڵا کە خاوەن چێشتخانەی سەوایە لە گەڕەکی تەعجیل دەڵێت "هەر لەگەڵ هاتنی مانگی رەمەزان ئێرە جمەی دێت، بۆیە مانگێک پێش ئەو ماوەیە ئێمە ئامادەکاری کڕینی گۆشتی باڵندەکانی (كۆتر، ریشۆڵە، مراوی، سوێسكە، چۆلەكە، فروج و کەو)  هەروەها گۆشتی ئاژەڵیش (جگەر، سپڵ، دڵ، گوونی ئاژەڵ و گۆشتی سور) دەفرۆشین لە رەمەزانیشدا بازاڕیان گەرمە".

لەبارەی نرخەکانییەوە دەڵێت "چێشتخانەی کۆن هەیە کە خاوەنەکەی تورکمانە شەوانە لایەنی کەم سەد کۆتر، سەد ریشۆڵە و سەد سوێسکە دەفرۆشێت تا پارشێوە، نرخەکانیشیان لەنێوان هەزار و 500 دینار بۆ 5 هەزارە، کەو و فروجیش لەنێوان 13 بۆ 16 هەزار دینارە و شیشی تکەی جگەر، سنگ، باڵ، گوون، ران و گۆشت لە نێوان هەزار و 250 دینارە بۆ 2 هەزار و 500 دینارە".

لەگەڕەکی تەعجیل جگە لە خواردن و خواردنەوەکان کۆمەڵ کۆمەڵ خەڵک دانیشتوون لە لایەکدا یاری سینی سینیانێ و تاوڵە و ئۆکەی دەکەن کە پێکهاتەکانی ئەو گەڕەکە کورد و عەرەب و تورکمانن و بەیەکەوە کاتەکان بەسەر دەبەن.

مام رەشید کە خۆی هاووڵاتیەکی تورکمانە و بەردەوام شەوان لێرە بەڕێدەکات، دەڵێت "ئەو كەسانەی دێنە تەعجیل جۆراوجۆرن، بەڵام ئەوەی تێبینیدەكرێت زۆرینەیان لەڕەگەزی نێرن و ژنان بەدەگمەن سەردانی ئەو شوێنە دەكەن، زیاتر کەسانی بەتەمەن و گەنجانی تەمەن 20 ساڵ بۆ 29 ساڵ کە ژنیان نەهێناوە و سەڵتن یان کەسانێک هەن میوانەکانیان لێرە دەعوەت دەکەن لەبەر خواردنەکان دێنە ئێرە".

پۆلیس شەوانە سەردانی ئەو گەڕەکە دەکات بۆ ئەگەری روودانی هەر رووداوێک، بەڵام قایمقامی هەولێر دەڵێت "چەندین ساڵە هیچ رووداوێک یان حاڵەتێکی نەخوازراو رووینەداوە بەهۆی ئەوەی خەڵک کات بەسەر دەبات و یەکتریش دەناسن، بۆیە کێشە نیە ئەگەر پۆلیسیش سەردانی نەکات". 

نەبەز عەبدولحەمید، قایمقامی هەولێر دەشڵێت "بێگومان لە مانگی رەمەزاندا زیاتر چاودێری دەکەین، چونکە زۆر قەرەباڵغ دەبێت و زیاتر خەڵک رووی تێدەکات، رەمەزانان زیاتر سەردانی شوێنەکانی تر دەکەین کە رەمەزانان قەرەباڵغە وەک "ئیسكان، تەعجیل،  تەیراوە، قەڵا، سێتاقان و كوران".

گەڕەکەکانی تەعجیل، خانەقا، تەیراوە، عەرەبان، كوران، سێتاقان و ئیسكان لە گەڕەكە كۆنەكانی هەولێری پایتەختی هەرێمی كوردستانن، بازاڕی تەعجیل هەرچەندە كۆنە بەڵام نەوە دوای نەوە لە مانگی رەمەزاندا تایبەتمەندییەكەی پارێزراوە و خەڵك زیاتر رووی تیدەكات.



  • ڕۆژ
  • هەفتە
  • مانگ
created by Avesta Group and powered by Microsoft Azure