كۆمیسیۆنی باڵای سەربەخۆی هەڵبژاردنەكان بەیاننامەیەكی بڵاوكردوە

هەواڵ / کوردستان :: 27/05/2018‌ :: 1047‌ جار بینراوە

دواڕۆژ، كۆچەر عەلی
كۆمیسیۆنی باڵای سەربەخۆی هەڵبژاردنەكان رایدەگەیەنێت، تاكو 31ی ئایار لایەنەكان دەتوانن لە ئەنجومەنی دادوەری سكاڵاكانیان تۆماربكەن، دەشڵێت "کۆمسیۆن ئامادەیە هاوكاریی لیژنە حكومیی، دادوەری یان پەرلەمانییەكان بكات بۆ خستنەڕووی داتاكان".


ئەمڕۆ یەكشەممە 27ی ئایاری 2018، كۆمسیۆنی باڵای سەربەخۆی هەڵبژاردنەكانی عێراق لە بەیاننامەیەكی نۆ خاڵیدا وەڵامی لایەنەكانی دایەوە.

كۆمسیۆن رایگەیاندووە، بەهۆی دەستبەسەرداگرتنی چەند بنكەیەك لەلایەن لایەنگرانی حزبەكان، فلاش میمۆرییەكان نەگەڕێندراونەتەوە كۆمسیۆن.

دەقی خاڵەكانی بەیاننامەكەی كۆمسیۆنی هەڵبژاردنی عێراق:

- هەموو ئەو كەس و لایەنانەی ناڕەزاییان لە ئەنجامەكان هەیە، دەتوانن بە گرتنەبەری روێشوێنە یاساییەكان، تا رۆژی 2018/5/31 لە دەستەی دادوەریی هەڵبژاردن سكاڵای یاسایی تۆماربكەن.

- راپۆرتی كاغەزیی بنكەكانی دەنگدان لە وێستگەكاندا چاپ كراون و وێنەیەكی وەرەقەكانی دەنگدانیش لەسەر هارد دیسك دانراوە و دراوەتە نوێنەری لایەنە سیاسییەكان.

- وێستگەكانی دەنگدان لە دەرەوە و ناو كەمپەكان رێژەی 2%ی وێستگە گشتییەكانی دەنگدانیان پێكهێنا و بەشێكیان بەهۆی بوونی سكاڵای سوور، رەتكرانەوە.

- ئامێر و كەلوپەلە ئەلیكترۆنییەكانی دەنگدان بەپێی یاسای كۆمسیۆن كڕاون و كۆمسیۆنیش ئامادەیە بەڵگەكانی ئەو كەلوپەلانە ئاشكرابكات.

- داتاكانی بنكەكانی دەنگدان بەشێوەیەكی نادیار (مشفر) لەگەڵ راپۆرتێك لەبارەی سەلامەتیی گوێزەرەوەی داتاكان، گەیەندراونەتە كۆمسیۆن.

- داتاكان جگە لە گواستنەوە بە سێرڤەر، بە فلاش میمۆریش گواستراونەتەوە و هەردوو داتا گوازراوەكەش بەراورد كراون و یەكانگیربوون جگە لە پارێزگای كەركووك، كە بەهۆی دەستبەسەرداگرتنی چەند بنكەیەك لەلایەن لایەنگرانی حزبەكان، فلاش میمۆرییەكان نەگەڕێندراونەتەوە كۆمسیۆن.

- هەموو ئەو رێكارانەی سەرەوە بە ئاگاداریی ئەنجومەنی وەزیرانی عێراق، نەتەوە یەكگرتووەكان و هاوبەشەكانی پڕۆسەی هەڵبژاردن ئەنجامدراون.

- هیچ كەس و لایەنێك توانای چوونە ناو سێرڤەری دەنگدانی ئەلیكترۆنی نەبووە.

- كۆمسیۆن ئامادەیە هاوكاریی لیژنە حكوومی، دادوەری یان پەرلەمانییەكان بكات بۆ خستنەڕووی داتاكان و هۆشدارییش دەداتە ئەو لایەنانەی باس لە لایەنداریی كۆمسیۆن بۆ هەندێك لایەن دەكات.



created by Avesta Group and powered by Microsoft Azure