گۆڕان: سه‌باره‌ت به‌ هه‌ڵبژاردن چاوه‌ڕێى بڕیارى دادگاى فیدڕاڵى ده‌كه‌ین

هەواڵ / کوردستان :: 26/05/2018‌ :: 835‌ جار بینراوە

دواڕۆژ، هۆگر كه‌مال
ئه‌ندامێكى جڤاتى نیشتمانى بزوتنه‌وه‌ى گۆڕان رایده‌گه‌یه‌نێت، له‌باره‌ى تانه‌كانیان له‌ ئه‌نجامى هه‌ڵبژاردن چاوه‌ڕێى دادگاى فیدڕاڵى ده‌كه‌ن، ده‌شڵێت "دواى ئه‌نجامى دادگا له‌گه‌ڵ شه‌ش حزبه‌كه‌ هه‌ماهه‌نگى ده‌كه‌ین بۆ ئه‌وه‌ى بڕیار بده‌ین بایكۆتى پڕۆسه‌ى سیاسى یان په‌رله‌مان یان حكومه‌تى عێراق بكه‌ین".


عه‌بدولڕه‌زاق شه‌ریف، ئه‌ندامى جڤاتى نیشتمانى بزوتنه‌وه‌ى گۆڕان به‌ دواڕۆژى وت "له‌ كۆبوونه‌وه‌كه‌دا باس له‌ ئه‌نجامى هه‌ڵبژاردنى په‌رله‌مانى عێراق و ساخته‌كارییه‌كان كرا و قسه‌ له‌باره‌ى ئه‌وه‌كرا چى بكه‌ین، پێیان باشبوو چاوه‌ڕێى بڕیارى دادگاى فیدراڵى بكه‌ین له‌باره‌ى تانه‌كان، چونكه‌ دوو قۆناغى ماوه‌ بۆ ئه‌مه‌ش ئایا ئه‌نجامه‌كان وه‌ك خۆى ده‌مێنێت یان نا؟".

وتیشى "پڕۆسه‌ى یه‌كلاییكردنه‌وه‌ى تانه‌كان له‌لایه‌ن دادگاى فیدڕاڵى پێیده‌چێت، بۆیه‌ باسمان له‌وه‌كرد ئه‌گه‌ر ئه‌نجامه‌كان وه‌ك خۆیان مانه‌وه‌ چى بكه‌ین، ئه‌گه‌ر وه‌ك خۆشیان نه‌مانه‌وه‌ چى بكه‌ین، دادگا ده‌توانێ بڕیاربدات ئایا هه‌ڵبژاردن ده‌كرێته‌وه‌ یاخود نا، ئه‌گه‌ر ئه‌نجامه‌كان وه‌ك خۆیان مانه‌وه‌ له‌گه‌ڵ شه‌ش حزبه‌كه‌ى دیكه‌ گفتوگۆ ده‌كه‌ین، بۆ ئه‌وه‌ى هه‌ماهه‌نگى بكه‌ین".

عه‌بدولڕه‌زاق شه‌ریف، ئاماژه‌ى به‌وه‌شدا "له‌دواى بڕیارى دادگا له‌گه‌ڵ ئه‌و شه‌ش حزبه‌ هه‌ماهه‌نگى ده‌كه‌ین، بۆ ئه‌وه‌ى بڕیاربده‌ین ئایا بایكۆتى پڕۆسه‌ى سیاسى عێراق بكه‌ین یان بایكۆتى په‌رله‌مان یان حكومه‌ت بكه‌ین، ئه‌و بژاردانه‌ هه‌مووى له‌به‌رده‌ستدان".

باسى له‌وه‌شكرد "بۆ كۆبوونه‌وه‌كه‌ بانگهێشتى ده‌رباز محه‌مه‌د، وه‌زیرى كۆچ و كۆچبه‌رانى عێراقمان كردبوو، چونكه‌ ئه‌و ئاگادارى له‌ په‌یوه‌ندییه‌كانى حكومه‌ت و كۆمسیۆنه‌ سه‌باره‌ت به‌ لێكۆڵینه‌وه‌كانى حكومه‌ت و عه‌بادى زانیارى پێداین".

سه‌باره‌ت به‌ په‌یوه‌ندییه‌كانیان له‌گه‌ڵ یه‌كێتى، عه‌بدولڕه‌زاق شه‌ریف، وتى "له‌ كۆبوونه‌وه‌كه‌ باسمان له‌و هێرشه‌ى یه‌كێتى كرد بۆ سه‌ر گرده‌كه‌ و پێمان وابوو ئه‌و هێرشه‌ رێكخراو بووه‌ و شه‌خسى نه‌بووه‌، ئێمه‌ هێزمان نیه‌ بۆیه‌ ئیدانه‌ى ده‌كه‌ین و له‌ رێگه‌ى ژوورى یاساییشمانه‌وه‌ سكاڵامان له‌سه‌ر مه‌كته‌بى سیاسى یه‌كێتى تۆمار كردووه‌".

ئه‌و ئه‌ندامه‌ى جڤاتى نیشتمانى گۆڕان، جه‌ختیشى كرده‌وه‌ "به‌هیچ شێوه‌یه‌ك له‌ كۆبوونه‌وه‌كه‌دا باسمان له‌ كشانه‌وه‌ى گۆڕان له‌ حكومه‌تە خۆجێییه‌كان نه‌كردووه‌".

بەپێی زانیارییەکانی دواڕۆژ، لەکۆبونەوەکەدا بەچڕی باس لەوە کراوە کە پێویستە بەزویی گۆڕان هەڵبژاردن و کۆنفرانسە ناوخۆییەکانی خۆی ئەنجامبدات و بەناوخۆیەکی تۆکمەوە خۆی بۆ هەڵبژاردنەکانی پەرلەمانی کوردستان ئامادەبکات.

ئه‌مڕۆ شه‌ممه‌ 26ى ئایار، جڤاتى نیشتمانى گۆڕان بۆ ماوه‌ى زیاتر له‌ شه‌ش كاتژمێر كۆبووه‌وه‌ و لەدوای کۆبونەوەکەش راگەیەنراوێکیان بڵاوکردەوە.

 

دەقی راگەیەنراوەکە:

راگەیانراوی جڤاتی نیشتمانی بزوتنەوەی گۆڕان

ئەمڕۆ ٢٦/٥/٢٠١٨ جڤاتی نیشتمانی بزوتنەوەی گۆڕان لە مەکۆی سەرەکی کۆبوونەوەی ئاسایی خۆی ئەنجام دا. لە کۆبونەوەکەدا بارودۆخی کوردستان‌و پرۆسەی هەڵبژاردنی ئەنجومەنی نوێنەرانی عیراق‌و ساختەکارییە رێکخراوو لە رادەبەدەرەکەی پارتی‌و یەکێتی تاووتوێکران.
جڤاتی نیشتمانی سوپاسی هاوڵاتیانی کوردستان دەکات کە بەشداری پرۆسەی هەڵبژاردنیان کرد. هەروەها سوپاسی هەڵسوڕاوو دەنگدەرانی بزوتنەوەی گۆڕان دەکات کە ماندونەناسانە لە ماوەی بانگەشەی هەڵبژاردندا بە گوڕوتینەوە کاریان بۆ سەرخستنی لیستی گۆڕان کرد.
کۆبونەوەکە بڕیاریدا بە:
یەکەم: ئیدانەکردنی ئەو ساختەکارییە رێکخراوەی یەکێتی‌و پارتی کە بەهۆیەوە دەنگی سەدان هەزار هاوڵاتی کوردستانیان دزی‌و سەرەتاییترین مافی هاوڵاتیانی کوردستانیان پێشێل کرد. جارێکی تریش سەلماندیان کە لە پێناوی بەرژەوەندی حیزبی خۆیان‌ سڵ لە هیچ رەفتارێک ناکەنەوە. بەڵام بەو رەفتارەیان هاوڵاتیانی کوردستانیان رق ئەستورتر کرد بەرامبەر ئەو دەسەڵاتە شکسخواردوو خۆسەپێنە.
دوەم: توندی ئیدانە کردنی پەلامارە ترسنۆکانەکەی چەکدارانی یەکێتیی نیشتمانیی کوردستان، کە لە ئێوارەی ١٢/٥ دا کردیانە سەر مەکۆی سەرەکی بزوتنەوەی گۆڕان لە سلێمانی.
سێیەم: رەتکردنەوەی سەرتاپای ئەنجامەکانی هەڵبژاردنی ئەنجومەنی نوێنەرانی عیراق. لە هەمان کاتدا چاوەڕێی رێکارە یاساییەکان‌و هەوڵە سیاسی‌و دیپلۆماسییەکانین بۆ دوبارەکردنەوەی هەڵبژاردن لە پارێزگاکانی هەرێم‌و پارێزگاکانی کەرکوک‌و موسڵ، یان راستکردنەوەی ئەنجامەکان‌و گێڕانەوەی دەنگە راستەقینەکانی هاوڵاتیانی کوردستان. بەپێچەوانەوە هەمو بژاردەیەک لەبەردەم بزوتنەوەی گۆڕان کراوەیە، بە بڕیاری بایکۆتی سیاسیشەوە، بە راوێژ لەگەڵ یەکگرتوی ئیسلامی، کۆمەڵی ئیسلامی، هاوپەیمانی بۆ دیموکراسی‌و دادپەروەری، بزوتنەوەی ئیسلامی‌و حیزبی شیوعی کوردستان. هەروەها داوا لە هەمو هێزو لایەنە کوردستانییە نیشتمانییەکان دەکەین بەرەیەکی فراوان دروست بکەن بۆ گۆڕانکاری ریشەیی لە هەرێمی کوردستان.

هاوڵاتیانی کوردستان

بزوتنەوەی گۆڕان بڕوای بەو راستییەیە کە ئیرادەی گەلەکەمان لەم هەڵبژاردنەدا سەرکەوتو بوەو ئەو ساختەکارییەی پارتی‌و یەکێتی، باشترین بەڵگەیە کە ئەو رەفتارەیان لە ئەنجامی ئیفلاسی سیاسی‌و جەماوەرییانەوەیە.

دوابەدوای هەوڵەکانی گۆڕان‌و هێزە کوردستانییەکانی تر بۆ ساخکردنەوەی دەنگەکانی هاوڵاتیان چەندین هێزو لایەنی سیاسی عیراقی‌و نەتەوە یەکگرتووەکان داوای لێکۆڵینەوەی بەپەلە دەکەن لە ساختەکارییەکانی پرۆسەی هەڵبژاردن. هەروەها دروستکردنی لیژنەی لێکۆڵینەوە لەلایەن حکومەتی عیراقەوە هەنگاوێکی ئەرێنی‌و دانپێدانانە بە ساختەکاری لە هەڵبژاردنەکاندا.

لە کۆتاییدا داوا لە هاوڵاتیانی کوردستان دەکەین بە گوڕوتینەوە خۆیان ئامادە بکەن بۆ بەشداریکردن لە هەڵبژاردنی پەرلەمانی کوردستان کە بڕیارە لە ٣٠/٩ی ئەمساڵ بەڕێوە بچێ. ئەمەش بۆ بەدیهێنانی گۆڕانکاری ریشەیی لە نەخشەی سیاسی لە هەرێمی کوردستان‌و سیستمی حوکمڕانی‌‌و پوچەڵکردنەوەی پیلانەکانی پارتی‌و یەکێتی. هەڵبژاردنی ئەمجارەی پەرلەمانی کوردستان سەنگی مەحەک دەبێ بۆ بڕیاردان لەسەر شێوازی خەبات‌ لە پێناوی بەدیهێنانی گۆڕانکاری‌و چاکسازی لە هەرێمی کوردستان.

جڤاتی نیشتمانی بزوتنەوەی گۆڕان



created by Avesta Group and powered by Microsoft Azure