"ناهلێن كێشه‌یێن ده‌نگدانا تایبه‌ت ل ده‌نگدانا گشتى دووباره‌بن"

هەواڵ / کوردستان :: 11/05/2018‌ :: 223‌ جار بینراوە

دواڕۆژ، بورهان یه‌حیا
پارێزگارێ دهۆك د كۆنفرانسه‌كێ رۆژنامه‌ڤانى دا راگه‌هاند؛ دوو كۆمبوون دگه‌ل رێڤه‌به‌رێ‌ كومیسۆنێ‌ ل دهۆك هاتینه‌كرن بۆ هندێ ئه‌و كێشه‌یێن ل ده‌نگدانا تایبه‌ت په‌یدا ببوون ل ده‌نگدانا گشتى دووباره‌ نه‌بن.


فه‌رهاد ئه‌مین پارێزگارێ دهۆك د كۆنفرانسه‌كێ رۆژنامه‌ڤانى دا خویاكر" لژنه‌یا ئه‌منی ل سنۆرێ پارێزگه‌هێ هه‌موو كارێن خۆ ئه‌نجام دایه‌ و هه‌می تشتێ‌ پێدڤی و سه‌ره‌كی ل سه‌ر ئاستێ‌ پارێزگه‌هێ‌ هاتینه‌ بجهئینان و ل هه‌موو بنگه‌هێن ده‌نگدانێ‌، پۆلیس و ئاسایش و هاتنوچۆن هه‌موو كار و ئه‌ركێن خۆ رێكخستینه‌ داكو ئاسانكاری بۆ وه‌لاتییان بهێنه‌كرن".


خویاكر" وه‌كو سه‌رۆكێ لژنه‌یا ئێمناهى و پارێزگارێ دهۆك داخوازێ ژ خه‌لكێ‌ پارێزگه‌هاێ دكه‌ین كو دگه‌ل ده‌زگایێن ئێمناهیێ‌ هاریكار بن بۆ هندێ ئه‌و پرۆسه‌یا دیمۆكراسی ب ره‌نگه‌كێ‌ جوان برێڤه‌ بچیت و چ كێشه‌ په‌یدا نه‌بن و حه‌ز دكه‌ین هه‌موو وه‌لاتى ب جۆشه‌كا بلند به‌شدارى هه‌لبژارتنان ببن بۆ هندێ نوونه‌رێن وان بشێن مافێن‌ دستووری و یاسایی یێن كوردان جێبه‌جێ بكه‌ن".


ئاماژه‌كر" پشتى ل ده‌نگدانا تایبه‌ت چه‌ندین كێشه‌یێن قه‌ره‌بالغ و نه‌خواندنا كارتێن ده‌نگدانێ ژلایێ هنده‌ك ئامیران ڤه‌ په‌یدا بووی، وه‌ك پارێزگار دوو كۆمبوون دگه‌ل رێڤه‌به‌رێ‌ كومیسۆنێ‌ ل دهۆك ئه‌نجامداینه‌ بۆ هندێ ئه‌و كێشه‌یێن ل ده‌نگدانا تایبه‌ت په‌یدا ببوون ل ده‌نگدانا گشتى دووباره‌ نه‌بن".


دیاركر" ئه‌و ئامیری ئه‌لكترۆنی ئه‌وێ‌ ده‌نگ پێ‌ دهێته‌دان هاتیه‌ سیسته‌مكرن و بۆ 11 ده‌مژمێران بتنێ كار دكه‌ت و هه‌ر ژ ده‌مژمێڕ 7 سپێدێ‌ تا 6 ئێڤاری و پشتی وی ده‌می ئه‌و ئامیره‌ كار ناكه‌ت له‌وما پێدڤییه‌ خه‌لكێ‌ مه‌ خۆ گیرۆ نه‌كه‌ت و زوو قه‌ستا سندۆقان بكه‌ن داكو ده‌نگێ‌ وان ب هه‌روه‌ نه‌چیت".


خویاكر" وه‌كو ده‌زگایێن ئێمناهیێ‌ هه‌موو به‌رهه‌ڤی كرینه‌ كو چ سه‌رپێچی و كارێن تێكدانێ‌ نه‌هێنه‌ كرن و هه‌كا بزاڤه‌كا بۆ ڤێ‌ چه‌ندێ‌ هاته‌ كرن ژ هه‌ر لایه‌نه‌ك یان گرۆپه‌كیڤه‌ دێ‌ هه‌موو پێرابوونێن یاسای ده‌رهه‌ق هێنه‌ وه‌رگرتن و ب باوه‌ری دبێژین كو ناهێلین چ تێكدان بهێنه‌ كرن".



created by Avesta Group and powered by Microsoft Azure