قوربانیێن له‌هیێن دهۆك دێ 350 ملیون دیناران وه‌رگرن

هەواڵ / کوردستان :: 09/05/2018‌ :: 201‌ جار بینراوە

دواڕۆژ، دهۆك
حكومه‌تا هه‌رێما كوردستانێ بڕیاردا ب 350 ملیون دینارێن ئیراقی زرارڤێكه‌ڤتیێن له‌هیێن بارانێن 5-ێ ڤێ مه‌هێ ل دهۆك قه‌ره‌بوو بكه‌ن.


پارێزگه‌ها دهۆك راگه‌هاندیه‌، ب بڕیارا نێچیرڤان بارزانی سه‌رۆكێ حكومه‌تا هه‌رێما كوردستانێ، ئه‌ڤڕۆ چوارشه‌مبی 9-ێ ئایارێ، كوژمێ 350 ملیون دیناران، دێ لسه‌ر وان خێزانان هێنه‌ دابه‌شكرن یێن زرار گه‌هشتینه‌ مالێن وان. 

جه‌هوه‌ر عه‌لی، ده‌رڤه‌دارێ دهۆك بۆ دواڕۆژ گۆت "183 ملیون دینار بۆ زرارڤێكه‌ڤتیێن قه‌زا دهۆك هاتینه‌ دیاركرن و كۆژمێ دی ژی دێ بۆ زرارڤێكه‌ڤتیین ده‌وروبه‌رێن دهۆك بیت".

ناڤبۆری خوه‌یاكر "پاره‌ دێ برێكا چه‌ند لیژنه‌یێن ده‌ڤه‌رداریێ ب پشتبه‌ستن ب راپۆرتێن وان یێن دیڤچوونا زرارڤێكه‌ڤتیان هێنه‌ دابه‌شكرن  كو ژمارا ئه‌و خێزانێن دێ پاره‌یان ل سه‌نته‌رێ دهۆك واته‌ قه‌زایا پارێزگه‌ها دهۆك وه‌رگرن 217 خێزانن".

رۆژا 5-ێ ڤێ، مه‌هێ ژ به‌رله‌هیێن بارانان نیزیكی 60 خانیان ل سه‌نته‌رێ پارێزگه‌ها دهۆك لسه‌ر رووبارێ هشكه‌روو بن ئاڤ بوون و لسه‌ر رێكا دناڤبه‌را دهۆك و ناحیا فه‌یدیێ ژی دا 4 كه‌س د ئاڤێ دا خه‌ندقین.



created by Avesta Group and powered by Microsoft Azure

بەپەلە