بارانبارینی ئەم وەرزە سودی بۆ كشتوكاڵ هەیە؟

هەواڵ / کوردستانی :: 04/05/2018‌ :: 537‌ جار بینراوە

دواڕۆژ، رێبین حەسەن
ماوەی چەند رۆژێكە شەپۆلێكی بارانبارینی بەردەوام ناوچە جیاوازەكانی هەرێمی كوردستانی گرتوەتەوە، لەئێستاشدا لەسنوری قەزای پێنجوێن، وەرزی چاندنی تۆو و دانانی شەتڵی زۆربەی بەرهەمە كشتوكاڵیيەكان دەستیپێكردووە، بەرپرسی كەشناسی ناوچەكەش دەڵێت "بارانبارینی ئێستا بۆ ناوچەیەكی شاخاوی وەكو پێنجوێن لەیەك كاتدا سود و زیانی خۆی هەیە".


بەهادین حەسەن، لێپرسراوی بەشی كەشناسی لەبەڕێوەبەرایەتی كشتوكاڵی پێنجوێن، ئەمڕۆ هەینی بەدواڕۆژی راگەیاند "كۆی گشتی بارانبارینی ئەمساڵی سنوری قەزای پێنجوێن گەیشتوەتە 1045.6 ملم، لەکاتێکدا ساڵی رابردوو ئەم كاتانە كۆی گشتی بارانبارین 899 ملم بوو، واتە رێژەكەی ئەمساڵ زۆر زیاترە".

وتیشی "بەشێوەیەکی گشتی بارانبارین لەناوچەیەكەوە بۆ ناوچەیەكی تر جیاوازە، بەنمونە لەناوچەی شارەزوور كە ئێستا گەنم زەرد بووە و كاتی دورینێتی، لەم حاڵەتەدا كە باران دەبارێت گەنمەكە دەكەوێت و تووشی ژەنگ دەبێت، ئەو شوێنانەی پێنجوێن كە بەرهەمی گەنم و جۆی هەیە زیانی بۆی هەیە، بەڵام بۆ هەندێك بەرهەمی تری سنووری پێنجوێن، هیچ كێشەیەكی نییە و بۆ گژوگیا و لەوەڕگاكانیش زۆر سودی هەیە".

روونیشیكردەوە "ئێستا كاتی شەتڵ لێدانى چەند بەرهەمێکە لەپێنجوێن، بەهۆی ئەوەی بارانەكە زیانی هەیە، بۆیە بەشێك لەجووتیارانی ناوچەكەمان خۆیان ئەو كێشەیەیان بەداپۆشینی شەتڵەكانیان چارەسەركردووە".



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە