هەڵەبجە.. ڕۆژی جیهانی قوربانیانی چەكی كیمیایی بەڕێوەچوو

هەواڵ / کوردستان :: 29/04/2018‌ :: 223‌ جار بینراوە

دواڕۆژ، عەلی حەمە سەعید
دەزگای ژیان بۆ مافەكانی مرۆڤ بە ئەنجامدانی چەند چالاكییەك ڕۆژی جیهانی قوربانیانی چەكی كیمیایی کردەوە.


ئیبراهیم حەمە سەعید، جێگری بەڕێوەبەری دەزگای ژیان و چارەسەركاری دەروونی بە دواڕۆژی ڕاگەیاند "ئەمڕۆ هاوكاتە لەگەڵ ڕۆژی جیهانی یادكردنەوەی قوربانیانی چەكی كیمیایی كە لەلایەن ڕێكخراوی نەتەوە یەكگرتووەكانەوە دیاریكراوە".

وتی "بەپێویستمانزانی ئەم ڕۆژە بەرز ڕابگرین، بۆ ئومەبەستەش ژمارەیەك لە بەركەوتوانی چەكی كیمیایی و تاقانەكانی كیمیابارانی هەڵەبجەمان بانگهێشت كردوون تا لە چەند سیمینارێكدا باس لە ڕووە یاساییەكانی قەرەبووكردنەوەی كەسوكاری شەهیدانی چەكی كیمیایی بخەینە ڕوو".

ئاماژەی بەوەشكرد، لە سنوری پارێزگای هەڵەبجە زیاد لە 2500 هاوڵاتی وەك قوربانی چەكی كیمیایی سەردانمان دەكەن و ئێمەش بە گوێرەی توانای خۆمان چارەسەری پێویستیان بۆ دابین دەكەین چ لەڕووی دەرونییەوە بێت یاخوود لە ڕووی دابینكردنی دەرمان و چارەسەری كیمیایی، بۆیە لەم ڕۆژەدا داواكارین كە كۆتایی بە بەكارهێنانی چەكی كیمیایی بهێنرێت.

ئەو بەرپرسەی دەزگای ژیان ئەوەشی وت "باری تەندروستی ژمارەیەكی زۆر لە بەركەوتووانی چەكی كیمیایی جێگر نییەو پێوستیان بە چارەسەری بەردەوام و چاودێریكردنی ورد هەیە لەلایەن پزیشكانی پسپۆڕەوە، بەڵام وەك پێویست لەلایەن حكومەتی هەرێمەوە ئاوڕ لەبەركەوتوانی چەكی كیمیایی نەدراوەتەوە".



created by Avesta Group and powered by Microsoft Azure