داعش بەبێ دەنگی دەوروبەری ناحیەی لەیلانی تەنیوە

هەواڵ / ڕاپۆرت :: 29/04/2018‌ :: 706‌ جار بینراوە

دواڕۆژ، عیماد جەباری
چەند هەفتەیەك لەمەوبەر " عەلی " و چەند هاوڕێیەكی بۆ گەشت دەچنە سنوری ناحیەی لەیلان، لەگەڵ تاریك و رۆشنی مەغریبدا چەند چەكدارێكی داعش خۆشی سەیرانەكەیان لێ دەگۆڕن، وەكو خۆیان دەڵێن "بەڕێكەوت لەمەرگ رزگاریان بووە و ئێستا ئەوان شەهیدی زیندوون".


عەلی حسێن تەمەن "32" ساڵ لەگەڵ 4 هاوڕێی رێكدەكەون و بۆ بەسەربردنی كاتێكی خۆش و نانخواردنێكی دەرەوەی شار بڕیاردەدەن بچنە سنوری ناحیەی لەیلان "25 كیلۆمەتر خۆرهەڵاتی كەركوك".

عەلی كاتێك چیرۆكەكەی بۆ دەگێڕاینەوە هێشتا شوێنەواری برین و ئازاردانەكانی چارەسەر نەبووبوو، بەدواڕۆژی وت "سەرقاڵی گۆشت برژاندن و چایی لێنان بووین، لەپڕدا چەند چەكدارێكی دەمامكداری ترسناك دەوریان داین و داوایان لێكردین قسە نەكەین".

ئەو هاوڵاتییە وەكو خۆی دەیگێڕێتەوە، هەوڵیانداوە لەدەستیان هەڵبێن بەڵام خێرایی یەكێك لەچەكدارەكان شكستی پێهێناون و جارێكیتر كەوتونەتەوە دەستیان و بەئارەزوی خۆیان و بێ سۆزو بەزەیی ئەشكەنجەدراون .

"چەكدارەكان مۆبایل و پارەكانیان لێ سەندین و خستمانیانە پێشی خۆیان بۆ ئەوەی لەدۆڵێكدا بمانكوژن، بۆیە بڕیارمدا هەوڵێكی دیكەی هەڵاتن بدەین و هەرچەندە تەقەیەكی زۆریان لێكردم، بەڵام توانیم خۆم رزگار بكەم" عەلی وای وت.

پاش رزگاركردنی ئەو هاوڵاتییە و خۆ گەیاندن بەهێزێكی پێشمەرگەی نزیك لەناوچەكە، چەكدارەكان هەڵدێن و هاوڕێكانیشی رزگاریان دەبێت.

ئەگەرچی تاوەكو ئێستا هیچ كردەوەیەكی تیرۆریستی لەسنوری لەیلان ئەنجامنەدراوە، بەڵام گوندنشینانی سنوری ناحیەكە نایشارنەوە كە چەكداری نامۆ دەبینن و "بەسیمایانیشدا دیارە كە پاشماوەكانی داعشن".

سەباح سەمەد بەرپرسی كۆمیتەی لەیلانی یەكێتی نیشتیمانی كوردستان بە دواڕۆژ ی وت "شوان و گوندنشینانی سنورەكە بەردەوام چەكداری نامۆ دەبینن كە پاشماوەكانی داعشن و چەمی رۆخانەیان بۆ خۆحەشاردان قۆستوەتەوە".

وتیشی "هێزەكانی پۆلیسی ئیتیحادی كە ئەركیان پاراستنی سنورەكەیە بەتەنها چەند فەوجێكیان لەنزیك شەقامە سەرەكییەكان جێگیر كردووەو بۆشاییەكی ئەمنی گەورەیش لەناوچەكەدا دروستبووە".

ئەو بەرپرسەی یەكێتی نەیشاردەوە كە ئەگەر ئەو پرسە پشتگوێبخرێت و هەمەهەنگی لەگەڵ پێشمەرگە بۆ پاراستنی سنورەكە نەكرێت ئەوە دەكەونە بەردەم مەترسی گەورە.

لەهێرشەكەی 21ی ئیكتۆبەری 2016ی داعش بۆ سەر كەركوك، زانیارییە هەواڵگرییەكان دواتر ئەوەیان دەرخست كە چەكدارەكان دوای دزەكردنیان لەسنوری تازەخورماتوو، پەڕیبوونەوە بۆ سنوری ناحیەی لەیلان و پاشان لەڕێگەی گوندەكانەوە خۆیان گەیاندبووە سەنتەری شارەكە.

بەرپرسی یەكەی ئیداری شارەكەیش كە لەپێكهاتەی توركمانی شیعەیە، زانیاریی لەبارەی بوونی چەكداری داعش لەدەوروبەری شارەكەی رەتدەكاتەوە.

محەمەد وەیس بەڕێوەبەری ناحیەی لەیلان بە دواڕۆژ ی وت "بوونی چەكداری داعش تەنها دەنگۆی خەڵكە و هیچ رووداو و كردەوەیەكی تیرۆریستی تاوەكو ئێستا لەسنوری لەیلاندا تۆمارنەكراون".

وتیشی "هێزە سەربازییەكانی عێراق لەسەنتەری ناحیەكە و باشور و خۆرهەڵات جێگیربوون و هێزی پێشمەرگەیش بەدوری 20 كیلۆمەتر لەدوو قۆڵەوە بوونیان هەیە كە هەماهەنگیمان لەگەڵ هەردوو هێزەكەدا هەیە و هیچ مەترسییەكیش لەسەر شارەكە نییە.

دواڕۆژ بۆ وەرگرتنی زانیاری چەند جارێك پەیوەندیكرد بەهێزەكانی پۆلیسی ئیتیحادیی عێراقەوە، بەڵام بەبیانووی قەدەغەكردنی لێدوان ئامادەنەبوون قسە بكەن.

بەپێی ئەو زانیارییانەیش لەدەزگا ئەمنییەكانی كەركوكەوە لەو بارەیەوە دەستی دواڕۆژ كەوتووە، هەواڵگری پۆلیسی ئیتیحادی دركی بەمەترسییەكانی داعش لەسەر سنورەكە كردووەو هەر ئەو هۆكارەیش وایكرد لەهەفتەی رابردوودا بارەگای لیوا بەرەو سنوری داقوق بگوازنەوە.

بەپێی ئەو زانیارییانەیش پۆلیسی ئیتیحادی دوای كەمكردنەوەی هێزەكانیان لەناحیەكە، داوایانكردووە هێزی پێشمەرگە زیاتر بێنە پێشەوەو بۆشایی نێوانیان پڕ بكەنەوە.

هێزەكانی پێشمەرگە لەدوو قۆڵەوە بەدووری 20 كیلۆمەتر لەناحیەكەدان، بەشێكیان لەگوندی تاوێربەرزی سەر بەناحیەی جەباری جێگیربوون و بەشەكەی دیكەشیان لە گوندی خاڵۆبازیانین كە دەكەوێتەوە نێوان رێگەی لەیلان – چیمەن.



created by Avesta Group and powered by Microsoft Azure