دەرچووانی زانكۆ و پەیمانگەكانی هەڵەبجە گردبوونەوە

هەواڵ / کوردستان :: 15/04/2018‌ :: 165‌ جار بینراوە

دواڕۆژ، عەلی حەمە سەعید
بەهۆی دواكەوتنی دەستبەكاربوونیان وەك پزیشك و كارمەندی تەندروستی لە نەخۆشخانەی تایبەت بە چارەسەركردنی بەركەوتووانی چەكی كیمیایی، ئەمڕۆ ژمارەیەك لە دەرچووانی زانكۆ و پەیمانگەكان گردبوونەوە.

 
دوابەدوای گردبوونەوەكەیان لە كۆنگرەیەكی ڕۆژنامەوانیدا نێچیرڤان ئەمین، بەناوی دەرچووانی زانكۆ و پەیمانگەكانەوە ئەوەی خستەڕوو، بڕیاری دامەزراندنی 284 میلاكی پزیشك و كارمەند بۆ نەخۆشخانەی چارەسەری بەركەوتوانی چەكی كیمیایی لەلایەن سەرۆكی ئەنجومەنی وەزیرانەوە و پڕۆسەی دابەشكردنی فۆڕم لە بەڕێوەبەرایەتی گشتی تەندروستی هەڵەبجە و بەڕێوەچونی پرۆسەی دامەزراندن بەپێی ڕێنمایی و خاڵبەندی وەزارەتی تەندروستی و لەژێر چاودێری ڕێكخراوی هەڵوێست بەڕێوەچوو.
 
ئاماژەی بەوەشكرد، سەرەتای مانگی ئازار بەشێوەی لیست ناوەكان ڕەوانەی وەزارەت و ئەنجومەنی وەزیران كراوە بەمەبەستی واژۆ كردنی ناوەكان و كردنەوەی نەخۆشخانەكە بەڕووی بریندارانی چەكی كیمیایی، سەرەڕای بەڵێنەكانی پارێزگاری هەڵەبجە و ژمارەیەكی زۆر لە لایەنی پەیوەندیدار كەدەبوو نەخۆشخانەكە لە 1/4/2018 بكرێتەوە،‌ بەڵام ‌ بەڵێنەكان جێبەجێنەكران، بۆیە داوا دەكەین هەوڵی جدیی بدرێت بۆ واژۆكردن و گەڕانەوەی ناوەكان و كردنەوەی نەخۆشخانەكە لە زووترین كاتدا.
 
هەر لەو كۆنگرە ڕۆژنامەوانییەدا ئەوەش ڕونكرایەوە كە دەبێت ڕوونكردنەوەی پێویست بدرێت سەبارەت بە دواخستن و واژۆ نەكردنی ناوەكان و نەكردنەوەی نەخۆشخانەكە لەكاتی خۆیدا، هەروەها چیتر دانیشتوانی ئەم شارە شەهیدە نەكرێنە قوربانی ململانێی سیاسیی و حزبی و پڕۆسەی هەڵمەتی هەڵبژاردن، بۆیە لە ئەگەری جێبەجێ نەكردنی داواكارییەكانمان ڕێگای دیكە دەگرینە بەر. 



created by Avesta Group and powered by Microsoft Azure