بانگەشەی هەڵبژاردن لەچەند شوێنێکی هەڵەبجە قەدەغەكراوە

هەواڵ / کوردستان :: 14/04/2018‌ :: 943‌ جار بینراوە

دواڕۆژ، عەلی حەمە سەعید
لەچەند شوێنێكی سەرەكی لەپارێزگای هەڵەبجە بانگەشەی هەڵبژاردن قەدەغە دەكرێت و بەكارهێنانی چەند ماددە و كەرەستەكیش قەدەغەكران كە زیان بە ژینگە دەگەیەنن.
 

لەكۆنگرەیەكی ڕۆژنامەوانیدا كوێستان ئەكرەم، سەرۆكی شارەوانی هەڵەبجە ئاماژەی بەوەكرد، بەمەبەستی پاراستنی ژینگە و سیمای شارەكەمان و دووركەوتنەوە لە قەرەباڵغیكردنی ناوبازاڕ، ئەمڕۆ لەگەڵ نوێنەری لایەنە سیاسییەكانی هەڵەبجە كۆبوینەوە.

وتیشی "هەموو لایەك لەسەر چەند خاڵێك ڕێككەوتین، بەجۆرێك چەند شوێنێكی دیاریكراومان بۆ بانگەشەی هەڵبژاردن قەدەغە كردووە".

سەبارەت بەو شوێنانەی بانگەشە تیایاندا قەدەغەیە، رایگەیاند "لە سەرەتای فولكەی عومەری خاوەر تاوەكو سەرۆكایەتی شارەوانی لەوێشەوە تا فولكەی مامۆستای نەناسراو و سەنتەری شار هەڵواسین و داكوتینی هەموو جۆرە فلێكس و كاغەز و لافیتە و ئاڵایەك قەدەغەیە".
 
ئەوەشی ڕاگەیاند "بەهەموو شێوەیەك مادەی لكێنەر وەك (سیكۆتین، كەتیرە، لەزگە و هێلم) قەدەغەیە بۆ هەڵواسینی وێنە، هاوكات سەرجەم فەرمانگە حكومییەكان و ناوەندەكانی خوێندن و زانكۆ و پەیمانگاكان، شوێنە ئایینییەكان و شوێنەوارەكان و شوێنە كلتورییەكان قەدەغەیە بۆ هەڵواسینی وێنە و هەر جۆرە بانگەشەیەكی هەڵبژاردن".
 
سەرۆكی شارەوانی هەڵەبجە ئەوەشی ڕونكردەوە، هەموو جۆرە نوسینێك ڕاستەوخۆ لەسەر دیوارەكان و داپۆشینی هێماكانی ڕێنمایی هاتوچۆ و ستونی ترافیك لایتەكان و بەكارهێنانی پارك و باخچە و دار و درەختەكان بۆ بانگەشەی هەڵبژاردن قەدەغەیە، لە ئەگەری پابەند نەبوونی هەر حزب و لایەنێك بە گوێرەی یاسا مامەڵەی لەگەڵ دەكەین.



created by Avesta Group and powered by Microsoft Azure