ئەنجومەنی خۆپیشاندەرانی هەڵەبجە هەڵوێستی خۆیان له‌سه‌ر مووچه‌ ڕاگەیاند

هەواڵ / کوردستان :: 05/04/2018‌ :: 543‌ جار بینراوە

دواڕۆژ، عەلی حەمەسەعید
ئێوارەی ئەمڕۆ ئەنجومەنی خۆپیشاندەرانی هەڵەبجە له کۆنگرەیەکی ڕۆژنامەوانیدا  هەڵویستی خۆیان لەبارەی دابەشکردنی موچە بەسیستمی نوێ ڕاگەیاند و ئاماژە بەوەدەکەن حکومەت پابەند نەبێت بە بەڵێنەکانی هەڵوێستی توندیان دەبێت.

لەکۆنگرە ڕۆژنامەوانیەکەدا، بەرهەم عومەر، بەناوی ئەنجومەنی خۆپیشاندەرانی هەڵەبجەوە بەیاننامەیەکی خوێندەوە کە تیایدا ئاماژەی بەوەکرد، دەبێت حکومەت گەرەنتی ئەوەمان پێبدات کە موچە 30 ڕۆژ جارێک دابەشدەکرێت، هەروەها کاتێک دیاری بکات بۆ نەهێشتی تەواوەتی پاشەکەوتی موچە.

ئەوەشی خستەڕوو، ئەو مووچانەی کە لای حکومەتە لە حسابێکی تایبەتی هەر فەرمانبەرێکدا ڕێکبخرێت، بۆ ئەو مەبەستەش داوا لەپەرلەمان دەکەین بە یاسایەک ئەو بابەتە ڕێکبخات.

لە بەشێکی تری بەیاننامەکەی ئەنجومەنی خۆپیشاندەرانی هەڵەبجەدا ئەوەش هاتووه‌، دەبێت دەستەڵات لە هەولێر و دهۆک دەستهەڵگرن لە سزادانی فەرمانبەران و ڕێز لە دەنگهەڵبڕینی مەدەنیانە بگرن، بە پێچەوانەوە ئەگەر حکومەت پابەند نەبێت بە بەڵێنەکانی ئەوا هەڵوێستی توندمان دەبێت.



created by Avesta Group and powered by Microsoft Azure