ئاگری نەورۆز ساردی بازاڕی جلی کوردی گەرم ناکاتەوە

هەواڵ / ڕاپۆرت :: 18/03/2018‌ :: 2661‌ جار بینراوە

دواڕۆژ، محەمەد مستەفا
لەگەڵ ئەوەی چەند رۆژێکی کەمی ماوە بۆ ئاهەنگی جەژنی نەورۆز، بەڵام نزیکبوونەوەی ئەو بۆنەیە جوڵەیەکی ئەوتۆی نەخستۆتە بازاڕی جلی کوردی پیاوان و وەک ساڵانی ڕابردوو ئاگری نەورۆز نەیتوانی ساردی دووکانی قوماش فرۆشان و بەرگدرووەکان گەرم بکاتەوە و بەرگ درویەکیش دەڵێت "ساڵانی ڕابردوو پێش ئاهەنگی نەورۆز لە  هەفتەیەکدا 10 دەست جلی کوردییان دەدوری، بەڵام لەئێستادا تەنها 5 دەست جلی کوردی دەدوورن لە هەفتەیەکدا" .


داشکاندنی قوماشی کوردی کاری لە گەرمکردنەوەی بازاڕ نەکردووە .
ساڵح عەلی کە خاوەن دوکانێکی قوماشی پیاوانە لە بازاڕی قەزای ڕانیە بە دواڕۆژی ڕاگەیاند "قەیرانی دارایی بەجۆرێک بێ بازاڕی دروستکردووە، هەرچەند داشکاندنیان بۆ نرخی قوماشیش کردووە، بەڵام هێشتاش هەر بێ بازاڕییە، ئەمساڵ بەراورد بە ساڵی پار قەیرانەکە قوڵتر بۆتەوە، بۆیە هەرچەندە کەمتر لە هەفتەیەکی ماوە بۆ چەژنی نەورۆز، بەڵام بەداخەوە کەمترین هاوڵاتی ڕوو لە کڕینی جلی کوردی دەکات" .

ساڵحی خاوەن دووکان زیاتر وتی "ساڵانی ڕابردوو نرخی قاتێک قوماشی چینی و هیندی بۆ جلی کوردی لەنێوان 50 بۆ 100 هەزار دیناری عێراقی بوو، بەڵام ئەمساڵ لەنێوان 25 بۆ 50 هەزار دینارە لە هەمان قوماش و جۆر، كەچی هێشتاش باخەڵ ساردی هاوڵاتیان بازاڕی ئەوانی بە ساردیی هێشتۆتەوە" .

پیاوان ڕوو لە کڕینی جلی فەرمی دەکەن بۆ جەژنی نەورۆز .
ڕەسوڵ عەلی دووکاندارێکی تری بازاڕی قەزای ڕانیەیە بۆ دواڕۆژ وتی "هەرچەندە ساڵانی ڕابردوو نرخی قاتێک جلی کوردی بە دوورینەوە بەگشتی نرخەکەی لەنێوان 90 بۆ 120 هەزار دیناری عێراقی دابوو کەچی ئێستا ئەو نرخە لە 50 بۆ 70 هەزار دیناری عێراقی دابەزیوە، بەڵام هێشتاش بەهۆی قەیرانی دارایی و کەمیی مووچە هاوڵاتییەکی زۆر پاشەکشەی لەکڕینی ئەو پۆشاكە کردووە .

ئەو دوکاندارە ڕاشیگەیاند "زۆرینەی هاوڵاتیان بۆ جەژنی نەورۆز ڕوویان کردۆتە کڕینی جل و بەرگی فەرمی کە نرخی جل و بەرگی فەرمی وەک پانتۆڵ و کراس یاخود قاتی فەرمی پیاوان بەگشتی نرخەکەی لەنێوان 20 بۆ 50 هەزار دیناری عێراقییە ئەمەش وایکردووە ئەوان تا ڕادەیەکی زۆر بێ بازاڕ بن" .

بەهۆی بێ بازاڕیی لە هەفتەیەکدا تەنیا 5 دەست جلی کوردی دەدورێت .

کارزان ساڵح بەرگدرویەکی بازاڕی قەزای ڕانیەیە و لە باسی کاریگەریی قەیرانی دارایی لەسەر پیشەکەی ئەوان بۆ دواڕۆژ وتی "هەرچەندە جەژنی نەورۆز زۆر نزیکبۆتەوە، بەڵام لەڕووی بازاڕەوە هیچ گەرم و گوڕییەک بەدی ناکرێت لەلایەن هاوڵاتیان بۆ کردنی جلی کوردی بۆ ئەو یادە، چونکە زۆرینەی هاوڵاتیان مووچە خۆرن، هەمووانیش دەزانین باخەڵی مووچە خۆران خاڵییە لە پارە" .

کارزان ئاماژەی بۆ ئەوەشکرد، بەر لە قەیرانی دارایی و ساڵانی ڕابردوو لە هەفتەیەکدا بەر لە جەژنی نەورۆز بۆ ماوەی یەک مانگ هاوڵاتیان سەرەیان دەگرت بۆ دورینی جلی کوردی، بەڵام لە ئێستادا بە هەفتەیەک جلی کوردی بۆ دەدورێت، چونکە بەرگدرووەکان بێ بازاڕن و فشاری زۆریان بۆ دورینی جل و بەرگ لەسەر نەماوە، بەر لەقەیرانەکە بۆ ئاهەنگی نەورۆز لە  هەفتەیەکدا 10  دەست جلی کوردییان دەدووری، بەڵام لە ئێستادا تەنها 5 دەست جلی کوردی دەدوورن لە هەفتەیەکدا .
کارزانی بەرگدوروو ڕونیشیکردەوە، ئەوانیش هاوشێوەی قوماش فرۆشەکان بەڕێژەی 30 - 50 % داشکاندنیان لە نرخی دورینی جل و بەرگدا کردووە، بەڵام داشکاندنەکە کاریگەریی نەبووە لەسەر گەرمکردنەوەی بازاڕی جلی کوردی بۆ جەژنی نەورۆز .



created by Avesta Group and powered by Microsoft Azure