حكومه‌تى هه‌رێم: پێویسته‌ به‌غدا قه‌ره‌بووى قوربانیانى هه‌ڵه‌بجه‌ بكاته‌وه‌

هەواڵ / کوردستان :: 16/03/2018‌ :: 2356‌ جار بینراوە

دواڕۆژ:
پاشنیوه‌ڕۆى ئه‌مڕۆ هه‌ینى 16ى ئازار، به‌بۆنه‌ى 30 ساڵڕۆژى كیمیابارانكردنى شارى هه‌ڵه‌بجه‌وه‌ حكومه‌تى هه‌رێم راگه‌یه‌نراوێكى تایبه‌تى بڵاوكرده‌وه‌ و رایگه‌یاند، داوا له‌ ده‌وڵه‌تى عێراق ده‌كه‌ین ئه‌ركى سه‌ر شانى خۆى له‌ قه‌ره‌بووكردنه‌وه‌ى قوربانیان و ئاوه‌دانكردنه‌وه‌ى هه‌ڵه‌بجه‌دا جێبه‌جێبكات.


له‌ راگه‌یه‌نراوه‌كه‌دا وێڕاى ده‌ربڕینى خه‌مو په‌ژاره‌ى خۆی بۆ كاره‌سارتى كیمیابارانى هه‌ڵه‌بجه‌ حكومه‌تى هه‌رێم داواى قه‌ره‌بووكردنه‌وه‌ى قوربانیانى كاره‌ساتى كیمیابارانى هه‌ڵەبجه‌ ده‌كات و تێیدا هاتووه‌ "له‌م یاده‌ سامناك و خه‌مناكه‌دا، دووپاتى ده‌كه‌نیه‌وه‌ كه‌ ئه‌وه‌ى له‌ توانادا بێت بۆ خزمه‌تى هه‌ڵه‌بجه‌ درێغى ناكه‌ین و جارێكى دیكه‌ش داوا له‌ ده‌وڵه‌تى عێراق ده‌كه‌ین ئه‌ركى سه‌ر شانى خۆى له‌ قه‌ره‌بووكردنه‌وه‌ى قوربانیان و ئاوه‌دانكردنه‌وه‌ى هه‌ڵه‌بجه‌ جێبه‌جێ بكات و كۆمه‌ڵگه‌ى نێوده‌وڵه‌تیش ڕێگه ‌نه‌دات جارێكى دیكه‌ تاوانێكى له‌و جۆره‌ له‌ هیچ شوێنێكى سه‌رزه‌مین دووباره‌ ببێته‌و".

ده‌قى راگه‌یه‌نراوه‌كه‌:
له‌ سییه‌مین ساڵیادى كیمیابارانكردنى هه‌ڵه‌بجه‌ى شه‌هیدا، سه‌رى ڕێز و نه‌وازش بۆ گیانى پاكى شه‌هیدانى هه‌ڵه‌بجه‌ داده‌نه‌وێنین، به‌ خه‌م و په‌ژاره‌یه‌كى قووڵه‌وه‌ یادى ئه‌و شه‌هیده‌ نه‌مرانه‌ له‌ ساوایان، منداڵان، ژنان، پیاوان، گه‌نجان و پیران ده‌كه‌ینه‌وه‌ كه‌ له‌ ماوه‌ى ته‌نیا چه‌ند خوله‌كێكدا سه‌رله‌به‌یانیى 16ى ئازارى 1988 بوونه‌ قوربانیى دڕاندایه‌تیى یه‌كێك له‌ هه‌ره‌ ڕژێمه‌ دكتاتۆرییه‌كانى مێژوو، له‌به‌ر هیچ شێتك نا، ته‌نیا له‌به‌ر ئه‌وه‌ى كورد بوون.

له‌ كاتێكدا تاوانى كیمیابارانكردنى هه‌ڵه‌بجه‌ى شه‌هید پێنج هه‌زار شه‌هیدى به‌دواى خۆیدا جێهێشت، نزیكه‌ى ده‌ هه‌زار برینداریشى خسته‌وه‌ بۆ ئه‌وه‌ى تا ماون ژیانێكى پڕ له‌ مه‌ینه‌تى بژین و له‌ ژان و ئازار بترازێ، هیچ چێژێك له‌ ژیان نه‌بینن و ببنه‌ گه‌واهیى ئه‌و تاوانه‌ گه‌وره‌یه‌ى دژى مرۆڤ و سروشت و ژیان له‌به‌ر چاوى جیهان ئه‌نجام درا و ئه‌وسا كه‌س لێى نه‌هاته‌ ده‌نگ،  تاوانێك كه‌ مه‌زلوومیه‌تیى گه‌لى كوردستان و دڕاندایه‌تیى ده‌سه‌ڵاتى ئه‌وساى به‌غداى به‌ هه‌موو جیهان نیشان دا.

له‌م یاده‌ سامناك و خه‌مناكه‌دا، دووپاتى ده‌كه‌نیه‌وه‌ كه‌ ئه‌وه‌ى له‌ توانادا بێت بۆ خزمه‌تى هه‌ڵه‌بجه‌ درێغى ناكه‌ین و جارێكى دیكه‌ش داوا له‌ ده‌وڵه‌تى عێراق ده‌كه‌ین ئه‌ركى سه‌ر شانى خۆى له‌ قه‌ره‌بووكردنه‌وه‌ى قوربانیان و ئاوه‌دانكردنه‌وه‌ى هه‌ڵه‌بجه‌ جێبه‌جێ بكات و كۆمه‌ڵگه‌ى نێوده‌وڵه‌تیش ڕێگه ‌نه‌دات جارێكى دیكه‌ تاوانێكى له‌و جۆره‌ له‌ هیچ شوێنێكى سه‌رزه‌مین دووباره‌ ببێته‌و.

نه‌مرى بۆ شه‌هیدانى هه‌ڵه‌بجه‌ و هه‌موو شه‌هیدانى كوردستان.
ئه‌نجومه‌نى وه‌زیران هه‌رێمى كوردستان



  • ڕۆژ
  • هەفتە
  • مانگ
created by Avesta Group and powered by Microsoft Azure