سلێمانی: پلانى ئەمنى و چالاکییەکان بۆ رۆژانى نەورۆز راگه‌یه‌نرا

هەواڵ / کوردستانی :: 14/03/2018‌ :: 174‌ جار بینراوە

تاگ :: سلێمانی

دواڕۆژ، زریان محەمەد
بەمەبەستى تاوتوێکردنى چالاکییەکانى تایبەت بە جەژنى نەورۆز و گرتنەبەرى رێوشوێنە ئەمنییەکان لەپێناو پاراستنى گیانى هاووڵاتیان لەتەواوى ئەو شوێنانەى کۆبوونەوەى هاووڵاتیان و مەراسیمە تایبەتەکانى تێدا ئەنجامدەدرێت، لیژنەى ئەمنى سلێمانى کۆبووە.

ئاوات محەمەد، قایمقامى سلێمانى له‌ کۆنگرەیەکى رۆژنامەوانیدا رایگەیاند "ژمارەیەکى زۆر چالاکى تایبەت بە رۆژانى جەژنى نەورۆز لە سنورى شارى سلێمانیدا ئەنجامدەدرێت، سەرەتاى چالاکییەکانیش لە گردى مامەیارە دەبێت، دواتر بەرێوبەرایەتى رۆشنبیرى سلێمانى هەفتەى چالاکییەکانى دەستپێدەکات و بۆ ماوەى هەشت رۆژ چالاکى هونەرى و رۆشنبیرى لە بیناى کارگەى جگەرەى سلێمانى ئەنجامدەدەن".

پاشان بەرێوبەرى رۆشنبیرى سلێمانى بابکر دڕەیی ئاماژەى بەوەکرد کە تەنها لە هەفتەى رۆشنبیریدا تایبەت بە جەژنى نەورۆز 60 چالاکى هونەریمان ئامادەکردووە و پێشکەشى هاووڵاتیانى سلێمانى دەکەین.

لەبارەى رێوشوێنە ئەمنییەکانەوە قایمقامى سلێمانى وتى "ئامادەکارى تەواویان کردووە کە لایەنە ئەمییەکان لە هەر شوێنێک کۆبوونەوەى هاووڵاتیانى تێدا بێت یان چالاکى تێدا ئەنجامبدرێت رێوشوێنى ئەمنى بۆ دەگرنەبەر و پۆلیسى هاتوچۆش کارئاسانى بۆ هاتوچۆى هاووڵاتیان دەکات، تیمە تەندروستییە گەرۆکەکانیش کارى خۆیان دەکەن".

ئاماژەی بەوەشدا "پێشتر بڕیاربوو بەشێک لەچالاکییەکان لە پارکى هەوارى شار بێت، بەڵام بە بڕیارى لیژنەى ئەمنى و بەهۆى نەگونجاوى پارکەکەوە بەتایبەت کە وەرزى چاندنى نەمام و درەختەکانە، بڕیاردرا هیچ چالاکییەک لە پارکى هەوارى شار ئەنجامنەدرێت".

قایمقامى سلێمانى ئاشکرايکرد لەڕووى ئوتێل و مۆتێل و چێشتخانەکانەوە ئامادەکارى تەواو کراوە و پێشوازى لە گەشتیاران دەکرێت، لەگەڵ ئەوەشدا چاودێرى نرخەکان دەکەن.



  • ڕۆژ
  • هەفتە
  • مانگ
created by Avesta Group and powered by Microsoft Azure