سكاڵا لەسەر كۆمپانیاكانی فرۆشتنی چەكی كیمیایی بە ڕژێمی بەعس تۆماركرا

هەواڵ / کوردستان :: 13/03/2018‌ :: 217‌ جار بینراوە

دواڕۆژ، عەلی حەمەسەعید
بەمەبەستی بەدادگاگەیاندنی ئەو كۆمپانیا و كەسایەتییانەی چەكی كیمیاییان بەڕژێمی بەعس فرۆشتووە، سكاڵای یاسایی تۆماركرا.


دوابەدوای تۆماركردنی سكاڵاكەیان، لەكۆنگرەیەكی ڕۆژنامەوانیدا گابرێك هاڤی، سەرۆكی دەستەی داوەری تایبەت بە تۆماركردنی سكاڵا لەسەر ئەو كۆمپانیا و كەسایەتییانەی چەكی كیمیاییان بەڕژێمی بەعس فرۆشتووە وتی "ئەمڕۆ بەهەماهەنگی لەگەڵ كۆمەڵەی قوربانیانی كیمیاباران كە نوێنەرایەتی كەسوكاری شەهیدان دەكەن، لە دادگای هەڵەبجە سكاڵامان لەسەر چەند كۆمپانیایەك تۆماركرد كە هاوكاری ڕژێمی بەعسیان كردووە لە دەستخستنی چەكی كیمیایی و تەنانەت هەندێكیشان ڕاستەوخۆ چەكی كیمیایان پێفرۆشتووە".

ئاماژەی بەوەشكرد، پێشتریش لە دادگای فڕەنسا سكاڵامان لەسەر چەند كۆمپانیایەكی تر تۆماركردووە و چاوەڕێی ئەنجامدانی چەند ڕێكارێكی یاسایین لەلایەن دادگای پاریسەوە بۆ جوڵاندنی ئەو سكاڵایە، بۆیە بەشێوەیەكی گشتی ئومێدمان هەیە كە بتوانین سكاڵاكەمان لەبەرژەوەندی كەسوكاری شەهیدان یەكلا بكەینەوە.

سەرۆكی دەستەی دادوەری تایبەت بە تۆماركردنی سكاڵا لەسەر كۆمپانیاكانی فرشتنی چەكی كیمیایی بە ڕژێمی بەعس ئەوەشی وت "تا ئەوكاتەی كە دادگاكان بڕیاری كۆتایی نەدەن لەسەر دۆسیەكە، ئێمە ناتوانین ناوی كۆمپانیاكان و كەسایەتییەكان ئاشكرا بكەین، بەڵام بەشێوەیەكی گشتی زیاتر لە 25 كۆمپانیاو كەسایەتی ئەوروپی و ئەمریكی تێوەگلاون و بەڵگەی پێویستیشمان لەبەردەستە كە بیسەلمێنێت ئەو كۆمپانیایانە چەكیان بەڕژێمی بەعس فرۆشتووە".



created by Avesta Group and powered by Microsoft Azure