شەپۆلێکی تری بارانبارین روو لە هەرێم دەکات

هەواڵ / کوردستان :: 26/02/2018‌ :: 28946‌ جار بینراوە

دواڕۆژ، هانا چۆمانی
پێشبینى ده‌كرێت له‌ ئێوارەی ئەمڕۆوه‌ شەپۆلێکی تری بارانبارین سەرجەم ناوچەکانی هەرێمی کوردستان بگرێتەوە و زۆرترین بارانبارینیش سنوری سلێمانی و هەڵەبجە دەگرێتەوە. 


ئەژی چەتۆ، بەڕێوەبەری بەشی پێشبینی لە بەڕێوەبەرایەتی گشتیی كەشناسی ‌و بوومەلەرزەزانی هەرێمی كوردستان ئەمڕۆ دووشەممە ٢٦ شوباتی ٢٠١٨ بە دواڕۆژی راگەیاند "پێشبینی هاتنی شەپۆلێکی تری بارانبارین دەکرێت بۆ سەر ناوچەکانی هەرێم، لەئێوارەی ئەمڕۆوە شەپۆلەکە دەستپێدەکات و تەواوی هەرێمی کوردستان دەکەوێتە ژێر کاریگەری ئەو شەپۆلە".

وتیشی "بەهۆی کاریگەریی نزمە پاڵەپەستۆی تورکیا و دەریای سوور و دەریای سپی ناوەڕاست کە هەمووی کاردەکاتەسەر ناوچەکەمان، بارانبارین لە تەواوی هەرێم بە بڕی جیاواز دەبارێت".

بژار ئه‌وه‌شى وت "سەنتەری شارەکان و سەنتەری پارێزگای هەڵەبجە و سلێمانی زۆرترین رێژەی بارانی دەبێت کە لە هەندێ کات دەبێتەهۆی بەرزبوونەوەی ئاستی ئاو". 

ئەو بەرپرسەی كەشناسی ئاماژه‌شیدا، جگە لەسەنتەری ئەو دوو پارێزگایە، ناوچە شاخاوییەکانیشیان ئەگەری بەرزبوونەوەی ئاستی ئاوی هەیە و لەناوچە شاخاوییەکانیش بەفر دەبارێت.

ئه‌وه‌شى خسته‌ڕوو "لەسەنتەری پارێزگای هەولێر و ناوچە شاخاوییەکانی ئەگەری بەرزبوونەوەی ئاستی ئاو هەیە بەهۆی بارانبارینەوە لەگەڵ بارانبارین هەندێ کات هەورە تریشقەش دروستدەبێت و نزمبوونەوەی پلەکانی گەرما بە چەند پلەیەک روو دەدات".

هێمای بۆ ئەوەشکرد، لە سنوری پارێزگای که‌رکووک و سلێمانیش خێرایی با زیاددەکات لە هەندێ کات بۆ سەرووی 25 کم لە کاتژمێرێکدا کە هاوکات بارانبارینیشی لەگەڵدایە و کاریگەری ئەم شەپۆلە تا رۆژی چوارشەممە ٢٨ى شوبات بەردەوامدەبێت.



created by Avesta Group and powered by Microsoft Azure