به‌رپرسانی كه‌ركوك دڵنیایی دەدەنە هاووڵاتیان

هەواڵ / ڕاپۆرت :: 24/02/2018‌ :: 1359‌ جار بینراوە

دواڕۆژ، عیماد جەباری
چاریکیتر دۆخی ئەمنی کەرکوک بووەتە مانشێتی کەناڵەکانی تەلەفزیۆن و بابەتی ئەگەری هێرشی داعش بۆ سەر شارەکە ترس و دڵەڕاوکێی لەناو بەشێک لەدانیشتوانی کەرکوکدا بڵاوکردوەتەوە.


یەکێتی و پارتی لەسەر دۆخی ئەمنیی کەرکوک  لیدوانی جیاواز دەدەن و لایەنە ئەمنی و سەربازییەکانیش دڵنیایی دەدەن.

یەکێتی باس لەئارامی دۆخی کەرکوک دەکات
رەوەند مەلا مەحمود جێگری لیپرسراوی مەڵبەندی کەرکوکی یەکێتی بەدوارۆژی وت "دۆخی کەرکوک وەک رۆژانی رابردووەو هیچ مەترسییەکی ئەوتۆ لەسەر شارەکە نییەو داعشیش توانای نییە شارەکە داگیربکات".

وتیشی "هیزە عێراقییەکان هەڵمەتێکی کێوماڵیان لە سنوری نێوان داقوق - خورماتوو دەستپێکردووەو بەشێک لەهێزەکانی باکوری شارەکە بۆ ئەو ناوچانە گواستراوەتەوەو هیچ پێشهاتێکی نوێش نییە".

رەتشیکردەوە هیچ بەرپرسێکی یەکێتی شارەکەیان بەجێهیشتبێت و هۆشداری دابێتە خەڵک بۆ چۆڵکردنی کەرکوک.

پارتی باس لەپیلان دەکات لەسەر کەرکوک
شاخەوان عەبدوڵا پەرلەمانتاری پارتی بەدواڕۆژی وت "بوونی زیاتر لە هەزار چەکداری داعش لەباشور و رۆژئاوای کەرکوک (حەویجە) مەترسین لەسەر کەرکوک و هەموو لایەنەکانیش ئەو راستییە دەزانن، بەتایبەت بۆ ناردنی لیژنەیەکی بەدواداچوون لەلایەن عەبادییەوە سەبارەت بە دۆخی ئەمنی پارێزگاکە".

وتیشی "هۆشداری دراوەتە لایەنەکان کە ئەگەر پلانێک هەبێت بۆ رادەستکردنی شارەکە بەداعش ئەوە پیشمەرگە راستەوخۆ دەستێوەردان دەکات و دیتە کەرکوکەوە بۆ بەرگری لە هاووڵاتیان".

حەشدی شەعبی کورد بەبلاوکردنەوەی پروپاگەندە تۆمەتبار دەکات
عەلی حسێنی فەرماندە لەحەشدی شەعبی بەدواڕۆژی وت "پاشماوەکانی داعش لەچەند شوێنێکی دەوروبەری کەرکوک بونیان هەیە، بەڵام توانای هیچ هێرشێکیان نییەو ئەو هەواڵانه‌ش باس لە کشانەوەی هیزی سەربازی دەکەن دوورن لەراستییەوە".

وتیشی "ئەو هەواڵانە کوردە چوداخوازەکان و بەشێک لەو عەرەبانە بڵاویدەکەنەوە کە لایەنگری داعشن".

هاووڵاتیانی کەرکوک شارەکە بەجێدەهێڵن؟
لەدوای بڵاوبوونەوەی ئەو دەنگۆیانەی باس لە ئەگەری هیرشی داعش دەکەن بۆ سەر کەرکوک، بەشێکی كه‌م لەهاوولاتیانی شاره‌كه‌ بەرەو سلیمانی شارەکەیان بەجێهێشتووه‌، بۆ رێگریکردن لەدەرچوونی خەڵکیش هێزە ئەمنییەکان رێوشوێنیان گرتووه‌ته‌به‌ر.

ئەفسەرێک لەبازگەی چیمەن بەدوارۆژی وت "دژەتیرۆری عێراق بۆ رێگریکردن لە بەجێهێشتنی هاوڵاتیان لەشارەکە، بۆ ماوەی چەند کاتژمێرێک بازگەی کەرکوک سلێمانیان داخست".

پۆلیسی کەرکوک دڵنیایی دەدات
ئەفراسیاو کامیل وتەبێژی پۆلیسی کەرکوک بە دواڕۆژی وت "داوا لەهاووڵاتیانی کەرکوک دەکەم گوێبیستی ئەو هەواڵانە نەبن کە مەبەستیانە ترس و دڵەڕاوکێ لای خەڵک دروست بکەن".

وتیشی "دۆخی سەنتەری کەرکوک و دەوروبەری ئارامەو هێزە ئەمنییەکان کۆنترۆڵی تەواوی دۆخەکەیان لەدەستدایەو هیچ پێویست بەدڵەڕاوکێ و ترس ناکات".

رونشیکردەوە کە چەند کەناڵێکی راگه‌یاندن بەمەبەست کار لەسەر بڵاوکردنەوە ئەو دەنگۆیانە دەکات.

دژەتیرۆری عێراق دڵنیایی ده‌دات
لیوا روکن موعن سەعدی فەرماندەی ئۆپراسیۆنە تایبەتەکانی دووەم و سەپاندنی یاسا لەکەرکوک لەراگەیاندراوەکەدا سەرجەم ئەو هەواڵانەی رەتکردووەتەوە کە باس لەبوونی پلانی داعش دەکەن بۆ پەلاماردانی کەرکوک و رایگەیاندووە "دڵنیایی دەدەینە هاووڵاتیانی کەرکوک کە هیزەکانی دژەتیرۆر بەهەموو هێزەکەیەوە لەشارەکەدایەو هیزی یەدەکیشی لەبەردەستە".

تەئکیدشیکردووەتەوە کە ئەو زانیارییانەی لەبارەی دۆخی کەرکوکەوە لەتۆڕەکۆمەڵایەتییەکان بڵاوکراوەتەوە هیچ بنەمایەکی نییەو دۆخی ئەمنیش لەلایەن هێزە ئەمنییەکانەوە کۆنتڕۆڵکراوە.

لیوا روکن موعن سەعدی هۆشداریشیداوە کە هیزەکانیان ئامادەن روبەرووی داعش و جوداخوازەکان ببنەوە کە ئەگەر هەوڵی نزیکبونەوەی دەوروبەری کەرکوک بدەن.



created by Avesta Group and powered by Microsoft Azure