لێدوانی فەرماندەیی پۆلیس و دژەتیرۆری عێراق لەسەر دۆخی کەرکوک

هەواڵ / کوردستانی :: 24/02/2018‌ :: 723‌ جار بینراوە

دواڕۆژ، عیماد جەباری
دژە تیرۆری عێراق تەئكید دەكاتەوە، بەهەموو هێزو توانایەوە رووبەڕووی هەر هێزێک دەبنەوە هەوڵ بدات لەشارەکە نزیکبێتەوە، پۆلیسی شارەكەش ئاماژە بەوە دەكات، دۆخی سەنتەری کەرکوک و دەوروبەری ئارامە.


لیوا روکن موعن سەعدی فەرماندەی ئۆپراسیۆنە تایبەتەکانی دووەم و سەپاندنی یاسا لەکەرکوک لەراگەیاندراوێکدا سەرجەم ئەو هەواڵانەی رەتکردوەتەوە کە باس لەبوونی پلانی داعش دەکەن بۆ پەلاماردانی کەرکوک و رایگەیاندووە: دڵنیایی دەدەینە هاوڵاتیانی کەرکوک کە هیزەکانی دژەتیرۆر بەهەموو هێزەکەیەوە لەشارەکەدایەو هیزی یەدەکیشی لەبەردەستە.

تەئکیدشیکردوەتەوە کە ئەو زانیاریانەی لەبارەی دۆخی کەرکوکەوە لەتۆڕە کۆمەڵایەتییەکان بڵاوکراوەتەوە هیچ بنەمایەکی نییەو دۆخی ئەمنیش لەلایەن هێزە ئەمنییەکانەوە کۆنتڕۆڵکراوە.

لیوا روکن موعن سەعدی هۆشداریشیداوە کە "هێزەکانیان ئامادەن رووبەڕووی داعش و جوداخوازەکان ببنەوە کە ئەگەر هەوڵی نزیکبوونەوەی دەورووبەری کەرکوک بدەن".

هاوكات پۆلیسی کەرکوک دڵنیایی دەداتە هاوڵاتیانی شارەكە و داوا دەکات گوێ بە پڕوپاگەندەی ناحەزان نەدەن.

ئەفراسیاو کامیل وتەبێژی پۆلیسی کەرکوک ئەمشەو هەینی 23ی شوبات بەدواڕۆژی وت "داوا لەهاوڵاتیانی کەرکوک دەکەم گوێبیستی ئەو هەڵمەتە نەدەن کە مەبەستیانە ترس و دڵەڕاوکێ لەلای خەڵک دروست بکەن".

وتیشی "دۆخی سەنتەری کەرکوک و دەوروبەری ئارامەو هێزە ئەمنییەکان کۆنترۆڵی تەواوی دۆخەکەیان لەدەستدایە و هیچ پێویستییەک بەدڵەڕاوکێ و ترس ناکات".

روونشیکردەوە کە چەند کەناڵێکی تەلەفزیۆنی بەمەبەست کار لەسەر بڵاوکردنەوەی ئەو دەنگۆیانە دەکەن.



created by Avesta Group and powered by Microsoft Azure