پشکی کورد بۆ لەسەدا 10 کەمکراوەتەوە
دواڕۆژ گۆڕانکارییەکانی پۆلیسی کەرکوک بڵاودەکاتەوە

هەواڵ / کوردستان :: 20/02/2018‌ :: 388‌ جار بینراوە

دواڕۆژ، عیماد جەباری
وەزارەتی ناوخۆی عێراق لیستی گۆڕانکارییەکانی بەڕێوەبەرایەتی پۆلیسی کەرکوکی ئاڕاستەی پارێزگاکە کرد بەمەبەستی جێبەجێکردنی و رێژەی ئەو پۆستە ئەمنیانەش كەدەدرێتە كورد كەمبووەتەوە بۆ  لەسەدا 10.

لیستی گۆڕانکارییەکانی بەڕێوەبەرایەتی پۆلیسی کەرکوک و دەزگا ئەمنییەکانی دیکەی بەردەستی دواڕۆژ کەوتووەو تێیدا دەردەکەوێت کە زۆربەی پۆستە ئەمنییەکان گۆڕانکارییان تێدا کراوەو زۆربەی پۆستەکانیش بەر عەرەب و تورکمان کەوتوون.

سەرچاوەیەکی باڵا لە پۆلیسی کەرکوک بەدواڕۆژی وت" پێشتر کورد لەسەدا 80ی پۆستە ئەمنییەکانی پۆلیسی کەرکوکی بەدەستەوە بووە، بەڵام بەپێی ئەم گۆڕانکارییە نوێیە، بۆ لەسەدا 10 کەمکراوەتەوە.

وتیشی "تەنها فەرماندەی پۆلیس و بەڕێوەبەری پۆلیسی پاراستنی دامودەزگا حکومییەکان لەپۆستەکانی خۆیان ماونەتەوەو زۆربەی ئەفسەرانی کورد لەپۆستە هەستیارو شوێنە سەرەکییەکان لابراون و خراونەتە شوێنە لاوەکیانەوە".


هەر بەپێی گۆڕانکارییەکان، ئەو ئەفسەرانەی لەدوای روداوەکانی 16ی ئیکتۆبەر چونەتە دەرەوەی کەرکوک ناویان لەلیستەکەدا نییە کە دیارترینیان عەمید سەرحەد قادر بەڕێوەبەری پۆلیسی قەزاو ناحییەکانی کەرکوکە.


دواڕۆژ زیاتر لەجارێک پەیوەندیکرد بەوتەبێژی پۆلیسی کەرکوکەوە، بەڵام پەیوەندییەکان بەردەست نەبوون.



created by Avesta Group and powered by Microsoft Azure