نه‌ته‌وه‌یه‌كگرتووه‌كان بۆ جاری دووه‌م راپۆرت له‌سه‌ر كه‌ركوك و دوزخورماتوو ئاماده‌ده‌كات

هەواڵ / کوردستانی :: 10/02/2018‌ :: 419‌ جار بینراوە

دواڕۆژ، عیسا عه‌بدولقه‌هار
لێپرسراوی نوسینگەی نەتەوەیەکگرتووەکان کوردستان رایده‌گه‌یه‌نێت، هه‌ستیان به‌ کەموکوڕی نێردراو و تیمە مەیدانییەکانیان کردووە، بۆیە بڕیاریانداوه‌ بۆ جاری دووەم تیمێك بۆ ئامادەکردنی راپۆرتێکی جیا دەربارەی رووداوەکانی کەرکوک و دوزخورماتوو ئاماده‌ بكه‌ن.


به‌پێی راگه‌یاندراوێكی مه‌كته‌بی په‌یوه‌ندییه‌كانی یه‌كێتی نیشتمانی كوردستان، سه‌عدی ئه‌حمه‌د پیره‌ له‌ هه‌ولێر له‌گه‌ڵ ریکاردۆ رودریگویز لێپرسراوی نوسینگەی نەتەوەیەکگرتووەکان لە ھەرێمی کوردستان كۆبۆته‌وه‌و نیگه‌رانی یه‌كێتی له‌ راپۆرته‌كانی نه‌ته‌وه‌یه‌كگرتووه‌كان له‌سه‌ر بارودۆخی كه‌ركوك و دوزخورماتوو پێگه‌یاندووه‌.

 به‌پێی راگه‌یاندراوه‌كه‌، سه‌عدی پیره‌  نیگەرانی یه‌كێتی نیشانداوه‌ لە ئامادەکردنی ئەو راپۆرتانەی نێردە تایبەتەکانی نەتەوەیەکگرتووەکان لە عێراق و کوردستان دەربارەی رووداوەکانی ئەم دواییەی کەرکوک بەگشتی و شاروچکەی دوزخورماتوو پێگه‌یاندووه‌و ئاماژه‌ی به‌وه‌شكردووه‌ "راپۆرته‌كه‌ بەشێوەیەك ئامادە کراوەو دارێژراوە دوورە لە بێلایەنی و بابەتیانەی راستی رووداوەکان".

سه‌عدی پیره‌ به‌ نوێنه‌ره‌كه‌ی نه‌ته‌وه‌یه‌كگرتووه‌كانی وتووه‌ "تێبینیمان لەسەر شێوازی بەدواداچوون و ھەندێک لە پێکھاتەی تیمە مەیدانییەکانی سەر بە نەتەوەیەکگرتووەکان ھەیە کە گومان دەکرێت بەمەبەست کاریان لەسەر شێواندنی راستی رووداوەکانی کەرکوک و بەتایبەتیش شاروچکەی دوزخورماتوو کردبێت".

هه‌ر به‌پێی راگه‌یاندراوه‌كه‌، داوایان لە لێپرسراوی نووسینگەی نەتەوەیەکگرتووەکان لە ھەرێمی کوردستان کردووه‌، ھەوڵبدەن بەشێوەیەکی ورد و بابەتیانە و راست و دروست کار لەسەر ئامادەکردنی راپۆرتەکانیان بکەن و لەکاتی سەردانە مەیدانییەکانیان نەھێڵن ھیچ کەس و لایەنێک دەستبخاتە کاروبارەکانیان و دەرفەت بدەنە شایەدحاڵ و قوربانیانی رووداوەکان بەبێ فشارو جیاوازی وته‌یەیان لێوەربگیرێت.

له‌به‌رامبەر‌دا، ریکاردۆ رودریگویز، لێپرسراوی نوسینگەی نەتەوەیەکگرتووەکان لە ھەرێمی کوردستان ئاماژەی بەوەکرد کە ئەوانیش ھەستیان بە ھەندێک کەموکوڕی نیردراو و تیمە مەیدانییەکانیان کردووە بۆیە بڕیاریانداوه‌ بۆ جاری دووەم تیمێکیان ناردووە بۆ ئامادەکردنی راپۆرتێکی جیا دەربارەی رووداوەکانی کەرکوک و دوزخورماتوو.



created by Avesta Group and powered by Microsoft Azure