لەپایتەختی ئاشتی سیمپۆزیۆمێكی تایبەت بە ئاشتی نێودەوڵەتی بەڕێوەچوو

هەواڵ / کوردستان :: 07/02/2018‌ :: 156‌ جار بینراوە

دواڕۆژ، عەلی حەمە سەعید
ئەمڕۆ چوارشەممە بە بەشداری ژمارەیەك خوێندكاری زانكۆكانی كۆریای باشوور، لە هەڵەبجەی پایتەختی ئاشتی بە ناونیشانی (كەمپینی لاوانی هەڵەبجە بۆ ئاشتی و پێكەوەژیان) كۆلێژی زانستە مرۆڤایەتییەكانی زانكۆی هەڵەبجە  سێ‌ پانێڵی تایبەت بە پێكەوە ژیانی ئایینەكانی مەسیحی و موسڵمان و كاكەیی ئەنجامدرا.

دكتۆر نەریمان عەبدوڵا، ڕاگری كۆلێژی زانستە مرۆڤایەتییەكانی زانكۆی هەڵەبجە، بە دواڕۆژی ڕاگەیاند، بە هاوكاری چەند زانكۆیەكی كۆریای باشوور بە پێویستمان زانی كە ئەمڕۆ لە هەڵەبجەی پایتەختی ئاشتی هەرێمی كوردستانەوە لە ڕێگەی سیمۆزیۆمێكی نێودەوڵەتییەوە باس لە پێكەوە ژیانی ئاشتیانەی ئایینە جیاوازەكان بكەین بۆ ئەم مەبەستەش ئەمڕۆ سێ‌ پانێڵ پێشكەشكران كە تایبەت بوون بە ئایینەكانی مەسیحی و ئیسلام و كاكەیی، هاوكات نوێنەری هەرسێ ئایینەكە جەختیان لەپێكەوە ژیانی ئاشتیانە كردەوە.

ئاماژەی بەوەشكرد، ئامانجمان لە سازدانی ئەم سیمپۆزیۆمە نێودەوڵەتییە بۆ ئەوەیە كە ئێمە وەك گەلی كورد هەمیشە داوای ئاشتی و پێكەوە ژیانمان كردووە با ئێمە لەڕووی ئاین و نەتەوەشەوە جیاواز بین، بەڵام هەمیشە پێكەوە ژیانی ئاشتیانە مەبەستی سەركیمان بە تایبەت كە ئێمە لە پایتەختی ئاشتین ئەو ئەركەمان كەوتوەتە سەرشان بۆ كاركردن بۆ پێكەوە ژیانی ئاشتیانە لە نێوان ئایینە جیاواوەكاندا.

 
ڕاگری كۆلێژی زانستەمرۆڤایەتیەكانی زانكۆی هەڵەبجە، ئەوەشی وت: لەبەرگرنگی بابەتە لەبەرنامەماندا هەیە بابەتەكانی ئەم سیمپۆزیۆمە لە زانكۆكاندا بەشێوەیەكی ئەكادیمیانە بخەینە بەرنامەی كارمانەوە بۆ ئەوەی بەهەموولایەك كار بكەین بۆ زیاتر بڵاوكردنەوەی ئاشتی كۆمەڵایەتی لەنێوان ئاین و بیرو بۆچوونە جیاوازەكاندا.



created by Avesta Group and powered by Microsoft Azure