نهێنی هەڵنەدانەوەی گۆڕە بەكۆمەڵەكانی حەویجە ئاشكرادەبێت

هەواڵ / ڕاپۆرت :: 01/02/2018‌ :: 283‌ جار بینراوە

دواڕۆژ، عیماد جەباری
لەچوار مانگی رابردوودا 14 گۆڕی بەكۆمەڵ دۆزراونەتەوە لەقەزای حەویجە و دەوروبەری كە سەرجەمیان تەرمی ئەو قوربانییانەی تێدایە كە لەسێ ساڵی رابردوودا لەلایەن چەكدارانی داعشەوە گولەبارانكراون.


هێزە سەربازییەكانی عێراق لەسەرەتای مانگی تشرینی یەكەمی ساڵی رابردوو رایانگەیاند كە قەزای حەویجە و دەوروبەریان كۆنتڕۆڵكردوەتەوە دوای ئەوەی لەسێ ساڵی رابردوودا لەلایەن گروپی چەكدارانی داعشەوە داگیركرابوو.

دوای كۆنتڕۆڵكردنەوەی ئەو شارە و گەڕانەوەی بەشێكی زۆر لەخەڵكی حەویجە و دەوروبەری بۆ زێدی خۆیان كە پێشتر لە كەمپەكانی كەركوك بوون، ژمارەیەك گۆڕی بەكۆمەڵ دۆزراونەتەوە كە دوایین گۆڕیان هەفتەی رابردوو بوو.

راكان سەعید، پارێزگاری كەركوك بەوەكالەت لەبارەی دۆزینەوەی دوایین گۆری بەكۆمەڵ لەحەویجە لەلێدوانێكی رۆژنامەوانیدا ئاشكرایكرد، ئێسك و پروسكی نزیكەی 75 كەسی تێدایە كە سەرجەمیان بریتین لە هاووڵاتیان و كارمەندانی دەزگا ئەمنییەكان كە لەسەردەمی دەسەڵاتی داعش لەلایەن ئەو گروپەوە گولەباران كراون و ژێرخۆڵكراون.

وتیشی "ئەو گۆڕەی دۆزراوەتەوە لەلایەن گوندنشینانەوە، كەوتوەتە نزیك ناوچەی زراعە لەسنوری ناحیەی ریازی سەر بەقەزای حەویجە".

گروپی چەکداری داعش لە 10ی حوزەیرانی 2014 قەزای حەویجە و دەوروبەری داگیركرد، دوای ئەوەی فیرقەی 12ی سوپای عێراق شوێنەكانی خۆیان بەجێهێشت لەباشور و رۆژئاوای كەركوك، لەماوەی سێ ساڵی دەسەڵاتیشیاندا ژمارەیەك تاوانیان دژی دانیشتوانی ناوچەكە ئەنجامداوە و بەدەیان هاووڵاتیان بەتۆمەتی پابەندنەبوون بەبڕیار و یاساكانەوە گولەبارانكردووە و ژێر خۆڵیان كردوون.

ئەحمەد خورشید، ئەندامی ئەنجومەنی قەزای حەویجە بە دواڕۆژی وت "لەچوار مانگی رابردوودا 14 گۆڕی بەكۆمەڵ دۆزراونەتەوە و شوێنەكانیان دەستنیشانكراون، بەڵام تاوەكو ئێستا هیچ یەكێك لەو گۆڕە بەكۆمەڵانە هەڵنەدراونەتەوە، بۆیە  بەتەواوەتی ناسنامەكانیان نەزانراوە".

دانیشتوانی حەویجە بەگشتی تاوەكو ئێستا پابەندن بە داب و نەریتی كۆمەڵایەتی عەشایەرییەوە و چەند جارێكیش هۆشداریدراوە لەسەرهەڵدانی دیاردەی تۆڵەسەندنەوە لەلایەن كەسوكاری قوربانیان دژی ئەو خێزانانەی پەیوەندییان لەگەڵ داعشدا هەبووە، ئەمەش وایكردووە هێزە سەربازییەكان بەهەستیارییەوە مامەڵە لەگەڵ دۆخەكەدا بكەن.

شوان داودی، نوێنەری كەركوك لەئەنجومەنی نوێنەرانی عێراق بەدواڕۆژی وت "هەڵدانەوەی ئەو گۆڕە بەكۆمەڵانە پێویستی بەلیژنەی تایبەتە، بەڵام بەهۆی ناجێگیری دۆخی ئەمنی قەزاكە نەتوانراوە ئامادەكاری بكرێت بۆ ئەنجامدانی ئەو پڕۆسەیە".

وتیشی "مەترسی ئەوە هەیە لەكاتی هەڵدانەوەی گۆڕەكان و ئاشكراكردنی ناسنامەكانیان شەڕی تۆڵەسەندنەوە لەقەزاكەدا سەرهەڵبدات، چونكە سەرەڕای كۆنتڕۆڵكردنەوەی ناوچەكانی باشور و رۆژئاوای كەركوك، بەڵام نەتوانراوە هێزی یاسا بسەپێنرێت بەهۆی ناسەقامگیری ئەمنی".

لەگەڵ ئەوەی هێزێكی زۆر لەپۆلیسی فیدراڵی و حەشدی شەعبی و عەشایەری لەقەزای حەویجە بڵاوەیان پێكراوە، بەڵام هێشتا نەتوانراوە رێبگرن لەكردەوە تیرۆریستییەكانی داعش و لەماوەی رابردووشدا چەندینجار پەلاماری چەكدارانی ئەو گروپە لەدژی هێزە سەربازییەكان و هاووڵاتیانی مەدەنی تۆماركراون.

جوان حەسەن، سەرۆكی لیژنەی مافی مرۆڤ لەئەنجومەنی پارێزگای كەركوكیش هۆكاری هەڵنەدانەوەی گۆڕە بەكۆمەڵەكان بۆ ئەوە دەگەڕێنێتەوە كە تەنها سەنتەری قەزاكە كۆنتڕۆڵكراوەتەوە و هێشتا چەكدارانی داعش بەئاسانی دەتوانن لەناوچەكانی دیكەی دەوروبەری تەراتێن بكەن و كردەی تیرۆریستی ئەنجامبدەن، ئەوەش وایكردووە كاری لیژنەكانی مافی مرۆڤ كە تایبەتە بەهەڵدانەوەی ئەو گۆڕانەوە ئەستەم بێت لەمكاتەدا.

ئەوەشی خستەڕوو بۆ دواڕۆژ كە رەنگە تەرمی پێشمەرگە دیلەكانی لای داعش بەشێك بن لەو تەرمانەی لەگۆڕە بەكۆمەڵەكانی حەویجەدان و مەبەستیش لەدواخستنی پڕۆسەی هەڵدانەوەیان بۆ ئەوەیە نەبێتە هەڵای میدیایی لەمكاتەدا كە لەوادەی هەڵبژاردنەكان نزیكدەبینەوە.

ئەوەش لەكاتێكدا كە لەماوەی رابردوودا چەندجارێك داعش وێنەی ڤیدیۆیی شەهیدكردنی ژمارەیەك پێشمەرگەی دیلی بڵاوكردەوە كە لەپەلامارەكەی كۆتایی مانگی كانونی دووەمی ساڵی 2015دا لەلایەن ئەو گروپەوە بەدیل گیرابوون و بەشێكیشیان هێشتا چارەنوسیان نەزانراوە.

سەرۆكی لیژنەی مافی مرۆڤ ئاماژەی بۆ ئەوەشكرد كە دەستنیشانكردنی سەرۆكی نوێی ئەنجومەنی قەزاكە یەكێكی دیكەیە لەو هۆكارانەی رێگربووە لەبەردەم فشارخستنە سەر لایەنە پەیوەندیدارەكان بۆ دەستپێكردنی پڕۆسەی هەڵدانەوەی گۆڕە بەكۆمەڵەكان.

دوای تیرۆركردنی حسێن عەلی ساڵح "ئەبو سەدام" سەرۆكی ئەنجومەنی قەزای حەویجە لەسەنتەری كەركوك لە مانگی ئەیلولی 2015 تاوەكو ئێستا نەتوانراوە سەرۆكێكی دیكە بۆ ئەنجومەنەكە دەستنیشانبكرێت بەتایبەت كە كاندیدیش بۆ ئەو مەبەستە دیاریكراوە.



  • ڕۆژ
  • هەفتە
  • مانگ
created by Avesta Group and powered by Microsoft Azure