ساخله‌مییا پارێزگه‌ها دهۆك كۆنفرانسێ سالانه‌یێ خۆ گێرا

هەواڵ / کوردستانی :: 23/01/2018‌ :: 186‌ جار بینراوە

دواڕۆژ، بورهان یه‌حیا
ئه‌ڤرۆ 23 كانوونا دووێ رێڤه‌به‌رییا گشتییا ساخله‌مییا پارێزگه‌ها دهۆك كۆنفرانسێ گشتیێ سالانه‌یێ خۆ گێرا و تێدا هاته‌ راگه‌هاندن كو پرۆژه‌یێ ئاڤاکرنا پێنچ نەخۆشخانه‌یان ب سەرجەمێ 900 تەختان ل دهۆك راوه‌ستیایه‌.


د ڤێ كۆنفرانسێ دا رێڤه‌به‌رێ گشتیێ ساخله‌مییا دهۆك د. نزار عسمه‌ت راگه‌هاند كو؛ هەر ئێک ژ نۆژدار، پەرستار و کارمەندێن ساخلەمیێ ل دهۆک زێدەتر ژ 600 هزار ئاوارە و پەنابەران مێهڤان کرینە ل گەل خوجهێن دهۆکێ، سەرجەمێ ئاکنجیان دبیتە دو مليۆن و 100 کەسان د دابینکرنا خزمەتێن ساخلەمیێ یێن باش بۆ ڤێ هه‌ژمارا مرۆڤان کارەکێ زۆر ب زەحمەتە و ل ره‌وشا سالێن بۆرى پتر شیانێن مە سنۆردار کرینە و بەراهیا کارێ مە ژ ئاڤه‌دانکرن و گەشەپێدانێ گوهاڕتیە بۆ بەرنگاریا قەیران و خوڕاگرتن و بەردەوامیا پێشکیشکرنا خزمەتێن ساخلەمی یێن گرنگ.

د. نزار عسمه‌ت دا دیاركرن كو؛ گه‌له‌ك كێشه‌ بۆ كه‌رتێ ساخله‌میێ په‌یدا بووینه‌ و ژ وان راوەستاندنا پرۆژه‌یێ ئاڤاکرنا پێنچ نەخۆشخانه‌یان ب سەرجەمێ 900 تەختان و لاوازکرنا پرۆژه‌یێن پەرەپێدان و چاکسازیکرنا ساخلەميێ وەکو ژێکجوداکرنا کەرتێ تایبەت و گشتی، هەروەسا سیستەمێ بیما ساخلەميێ و ئەلکترۆنیکرنا پێزانينێن ساخلەمیێ و ئەنجامدانا ڤەکۆلینان و پێدڤییا ژێرخانه‌یا ساخلەمیێ بۆ سەخبیریکرنێ و چاکسازیکرن و ئیدارەکرنا دەرمان و پێدڤى و ئامیرێن نوشدارى و راوەستاندنا پرۆژه‌یێ پەرەپێدانا مرۆڤی کو پێکدهات ژ کۆرسێن خاندنا تایبەتمەندیێن هو و رێيێن نوشدارى بۆ 50 نوشدارێن تایبەتمەند و پەرپێدانا شیانێن پەرستاری بۆ 500 پەرستاران.

هه‌ر د ڤێ كۆنفرانسێ دا وه‌زیرێ ساخله‌مییا حوكمه‌تا هه‌رێمێ د. رێكه‌وت حه‌مه‌ ره‌شید دیاركر كو؛ ل سەرانسەری رێڤەبەریێن نەخوشخانا ب تایبەتی ل دهۆکێ کەمتەرخەميێ د چارەسەرکرنا خەلکی دا دروست نەبوویە و مە ل دەستپێکا سالا 2017 پرۆگرامێ خوە پێشکێشی جڤاتا وەزیرێن حوکمەتا هەرێما کوردستانێ کر کو سەرۆکێ جڤاتا وەزیران و جێگرێ وی و هەموو وەزیران و بەرنامێ خوه‌ بۆ مە دیارکر و باشترین بەرنامێ مە ئەو چەندە بوو (سیستەمەک بۆ دەرمانان ل کوردستانێ بهێتە دروستکرن) و سیستەم ب رەنگێ (مەرکەزی) بهێتە دروستکرن و هەموو دەرمان ژ لایێ حوکمەتا هەرێما کوردستانێ ڤە بهێنە کرین و دابینکرن و بەلاڤکرن ل سەر خەلکی و هەتا نها دانوستاندن ل سەر ئەوی بەرنامەی دهێتە کرن و دەمەکێ نێزیک دێ کەفیتە کارکرنێ دا.

وه‌زیرێ ساخله‌میێ دیاركر كو؛ بۆ ئەڤ سالە مە هزر کر باجێ ل سەر مادده‌یێن زیانبەخش مینا (جگاره‌ و ماددێن کحولی) بسەپينين و ل سەرێ سالا نوو ئەڤ پرۆگرامە کەفتیە کاری و ئەم ل سالا 2017 د بەردەوام بووین د پێشئێخستنا دەرمانان دا و ئەم یێ بزاڤا وێ چەندێ ددەین دەزگەهێن دابینکرنا دەرمانان بهێنە دامەزراندن مینا وەلاتێ (سوید) وەک چاوا حوکمەتا وی وەلاتی دەرمانان بۆ خەلکێ خوە دابین دکەت.

فه‌رهاد ئه‌ترووشى پارێزگارێ دهۆك د كۆنفرانسێ ساخله‌مییا سالانه‌یا پارێزگه‌ها دهۆك دا راگه‌هاند كو؛ جهێ داخێ یە نۆشدارێن مە خزمەتا ئاواره‌یێن مووسل بکەن مووچێ خوە سێ هەیڤا ‏جارەکێ وەربگریت بەرامبەر نوشدارەکێ مووسل کار نەکەت مووچێ خوە هەیڤانە ‏وەربگریت، بەلێ ل سەر هندێرا نابیت دەستا ژ وەلاتێ خوە بەردەین، چونکو کەس ناهێت ‏نە عەرەب نە ئورۆپی دبیت پشتەڤانیا مە بکەت.

ناڤبۆرى دا دیاركرن كو؛ ل هەموو دونیایێ پیڤەر و قیاسێ بەرهەمئینانێ ل سەر مرۆڤان دراوەستیت کا ‏بەرهەمێ هەر تاکە کەسەکی چیە هەکە بەرهەمێ تاکە کەسی 10% بیت مانا وێ ‏ئەوە بەرهەمێ وەلاتێ من 10% ئەم هەموو دزانین بەرهەمێ مێشکێ مرۆڤینە ‏‏10%یە دشێت گەلەک پتر بەرهەم بینیت هەکە بەرهەمێ خوە تاکە کەسی بلند کر ‏ئەڤە بەرهەمێ وەلاتی ژی بلند بوو، بۆ نموونە گەلەک نەساخ مە هه‌نە کۆژمەکێ مەزنێ پارەی ددەن بۆ چارەسەیێ ژ ‏دەرڤەی وەلاتی و مە هەمان خزمەتگوزاریا د وەلاتێ خوە دا یێن هەین و ئێک ژ وان ‏دەرگەهان کو پارە و داهات ژ وەلاتی دەردکەڤیت ساخلەمی یە، ئەڤ پسیارە بۆ ‏وەزیری و کەرتێ ساخلەمیێ بوچی مە وەنەکریە، ئەڤ پارە ل ڤێرێ بێتە مەزاختن یێ ‏ئامادەیە هزارەها دولاران ب مەزێخیتن ژ دەرڤە بەس 500$ ل ڤێرە ‏نەمەزێخیتن هەکە ئەڤ دەرگەهە ڤەبیتن کو پارە ل ڤێرێ بێتە مەزاختن دێ کەرتێ ‏ساخلەمیێ پاشتر بیت.‏ 



created by Avesta Group and powered by Microsoft Azure