مەترسی تەعریب دوو گوندی دیکەی ناوچەی قەرەحەسەن دەگرێتەوە

هەواڵ / کوردستان :: 16/01/2018‌ :: 383‌ جار بینراوە

دواڕۆژ، عیماد جەباری
عەرەبە هاوردەکانی سەردەمی رژێمی بەعس هەوڵدەدەن بگەڕێنەوە بۆ هەردوو گوندی (باوا) و (ساڵەیی) لە ناوچەی قەرەحەسەن.

حاجی ئیسماعیل محەمەد، یەکێک لە گوندنشینانی گوندی باوا بە دواڕۆژی وت "ئەو خێزانە عەرەبانەی لەکاتی رژێمی بەعسدا لەسەر زەویەکانمان نیشتەجێکران ئێستا خەریکی گەڕانەوەن بۆ سەر گوندەکە".

وتیشی "تاوەکو ئێستا نەهاتون، چونکە بەڕێوەبەری ناحیەی لەیلان رێگەی نەداوە ئەو پرۆسەیە دووبارەبێتەوە، بەوپێیەی ئێمە خاوەنی رەسەنی زەویەکانین و تاپۆمان هەیە".

هەردوو گوندی باوا و ساڵەیی کەوتونەتە رۆژهەڵاتی کەرکوک و سەر بە ناحیەی لەیلانن، لەسەردەمی رژێمی بەعسدا دوای راگواستنی دانیشتوانەکەی و ئەنفالکردنی بەشێک لەگەنجەکانیان، زەویەکانشیان درانە عەرەبی هاوردە.

لەدوای پرۆسەی ئازادی عێراق بەشێکی زۆر لەدانیشتوانی گوندەکە گەڕانەوەی سەر زێدی خۆیان و بەهاوکاری حکومەتی هەرێم خانویەکی زۆر دروستکرا.

شێخ دەشتی مەجید، سەرۆکی ئەنجومەنی شارەوانی ناحیەی لەیلان، هەوڵی گەڕانەوەی عەرەبە هاوردەکانی پشتڕاستکردەوە بۆ سەر چەند گوندێکی کوردنشین و رایگەیاند، ئەو عەرەبانە بەبڕیاری دادگا دەگەڕێنەوە سەر زەویەکانی کورد و ئێمەیش هیچ دەسەڵات و بڕیارێکمان لەدەستدا نەماوە و "پێی مریشکێکمان بۆ نابەسترێتەوە".

پێشتریش عەرەبە هاوردەکان گەڕانەوە بۆ سەر گوندی تەرجل و یارمجە، بەڵام لەلایەن بەڕێوەبەری ناحیەی لەیلانەوە رێگریان لێکرا.



created by Avesta Group and powered by Microsoft Azure