وێنە: زیاتر لە 4 مانگە پەیكەرەكانی هەڵەبجە بە شكاویی ماونەتەوە

هەواڵ / که‌لتور :: 13/01/2018‌ :: 296‌ جار بینراوە

دواڕۆژ، عەلی حەمە سەعید
دوای تێپەڕبوونی زیاتر لە چوار مانگ بەسەر شكاندنی چەند پەیكەرێك لەناو شاری هەڵەبجە لەلایەن كەسێكەوە، هێشتا بەشكاویی ماونەتەوە و ئەو كەسەش کە بەو كارە تۆمەتبارکرابوو ئازادكراوە.


كوێستان ئەكرەم، سەرۆكی شارەوانی هەڵەبجە بە دواڕۆژی ڕاگەیاند" لە سنووری پارێزگای هەڵەبجە 11 پەیكەر بۆ كەسایەتییەكانی هەڵەبجە دروستكراون، بەڵام ئەوەی جێگەی داخە چوار مانگ پێش ئێستا لەلایەن هاوڵاتییەكەوە كە دەوترا باری دەروونی تەواو نییە هەردوو پەیكەری شەهید (ئەنوەر عەبدولڕەحمان) كە یەكێك بوو لە ئەندامانی ڕێكخستنە نهێنییەكانی یەكێتی لە سەردەمی ڕژێمی لەناوچووی بەعس، لەگەڵ پەیكەری مامۆستای نەناسراو كە ئەویش هێمایە بۆ ئەو مامۆستایانەی لە كیمیارانی هەڵەبجە شەهیدكران، هەردوو پەیكەرەكەی شكاند.

ئاماژەی بەوەشكرد، وەك شارەوانی هیچ بڕە بوودجەیەكمان لەبەردەستدا نییە بۆ  دروستكردنی پەیكەری نوێ و نۆژەنكردنەوەی پەیكەری مامۆستای نەناسراو".


سەرۆكی شارەوانی هەڵەبجە ئەوەشی خستەڕوو، ئەو كەسەی بەو كارە هەستا دوای نزیكەی مانگێك بەندكردنی لە ئێستادا بە كەفالەت ئازادكراوە، بەڵام هێشتا دۆسیەكەی دانەخراوە و ئێمەش چاوەڕێی بڕیاری كۆتایی دادگا دەكەین، هەروەها لەلایەن بنەماڵی شەهید ئەنوەر-ەوە پێمان ڕاگەیەنراوە كە جارێكی تر پەیكەرەكە دروستكراوەتەوە لە ئایندەیەكی نزیكدا و لە مەراسیمێكدا دووبارە پەیكەرەكە دادەنێینەوە.

ئێوارەی ڕۆژی 6/9/2017 هاوڵاتییەكی تەمەن 30 ساڵ بەهۆكارێكی نادیار هێرشی كردە سەر ژمارەیەك لە پەیكەرەكانی ناو شاری هەڵەبجە و بەهۆیەشەوە پەیكەری شەهیدێك و پەیكەری مامۆستای نەناسراوی شكاند، تا ئێستاش چاك نەكراونەتەوە.



  • ڕۆژ
  • هەفتە
  • مانگ
created by Avesta Group and powered by Microsoft Azure

بەپەلە