ژنێن 60 سالی چه‌ك بۆ پاراستنا عه‌فرینێ هه‌لگرتینه‌

هەواڵ / چاوپێکەوتن :: 10/01/2018‌ :: 325‌ جار بینراوە
سلێمان جه‌عفه‌ر

دواڕۆژ، نووسینگه‌ى دهۆك
به‌رپرسێ ده‌سته‌یا په‌یوه‌ندیێن ده‌رڤه‌ ل كانتۆنا عه‌فرینێ، د چاڤدیتنه‌كا دواڕۆژدا راگه‌هاند، كورد ل عه‌فرینێ بۆ راوه‌ستاندنا هه‌ر هێرشه‌كا تركیا ئاماده‌نه‌. سلێمان جه‌عفه‌ر، لدۆر پشكداریا كوردان د كۆنگرێ سۆچی ل روسیا گۆت "روسیا ئه‌م پشتڕاستكرینه‌ كو دێ پشكداری كۆنگره‌ی بین". ده‌رباره‌ی نه‌پشكداریا ئه‌نه‌كه‌سێ د هه‌لبژاردنێن رۆژئاڤایێ كوردستانێ دا، ناڤبۆری خوه‌یاكر"ئه‌نه‌كه‌سه‌ دانپێدانێ ب ده‌ستهه‌لاتا رۆژئاڤایێ كوردستانێ ناكه‌ت".


دواڕۆژ: ره‌وشا ئاسایشا عه‌فرینێ چاوایه‌؟
سلێمان جه‌عفه‌ر:
ره‌وشا ئاسایشا كانتۆنا عه‌فرینێ گه‌له‌ك باشه‌ و هه‌موو گه‌لێ عه‌فرینێ دگه‌ل هێزێن ئاسایشێ ئاماده‌نه‌ ره‌وشا ئه‌وله‌هیێ ب پارێزن.

دواڕۆژ: بۆچی تركیا هێزێن خوه‌ لسه‌ر سنوورێ عه‌فرینێ زێده‌ دكه‌ت؟
سلێمان جه‌عفه‌ر:
ده‌مه‌كێ درێژه‌ له‌شكه‌رێ تركیا دخوازیت بهێته‌ عه‌فرین، چنكو ئه‌گه‌ر عه‌فرین خسته‌ ژێر كۆنترۆلا خوه‌ واته‌ دێ رۆژئاڤایێ كوردستانێ هه‌موو ژ ده‌ستێن كوردان ده‌ركه‌ڤیت.

دواڕۆژ: بۆچی سالا ده‌ر‌بازبووی له‌شكه‌رێ تركیا گه‌له‌ك هه‌ولدان بهێته‌‌ عه‌فرین؟
سلێمان جه‌عفه‌ر:
چنكو پارتیا ده‌ستهه‌لاتدار ل تركیا و ره‌جه‌ب ته‌یب ئه‌ردۆگان سه‌رۆك كۆمارێ تركیا، هه‌ولده‌ن خوه‌ بكه‌نه‌ قاره‌مان و خوه‌ ژ ئاریشه‌یێن ناڤخوه‌یین تركیا دۆرخن و ئاریشه‌یێن خوه‌ ده‌ربێخن ده‌رڤه ب تایبه‌تی ل سوریایێ و عه‌فرینێ.

دواڕۆژ: ئه‌ردۆغان جورئه‌تا خوه‌ بۆ له‌شكه‌ركێشیا سه‌ر سنوورێن عه‌فرینێ ژ كیڤه‌ گرت؟
سلێمان جه‌عفه‌ر:
ده‌وله‌تا ئیرانێ و روسیا ئه‌و ده‌لیڤه‌ دایه‌ تركیا كو1500 له‌شكه‌رێن خوه‌ ده‌ربازی عه‌فرینێ بكه‌ت، لێ دهه‌مان ده‌مدا هێزێن كوردیی رێگری ل له‌شكه‌رێ تركیا كریه‌ و هه‌موو جیهان دزانیت كو كورد دێ به‌ره‌ڤانیه‌كا مه‌زن ژ عه‌فرینێ كه‌ن، له‌ورا له‌شكه‌رێ تركیا نه‌شیا عه‌فرینێ كۆنترۆل بكه‌ت.

دواڕۆژ: ئه‌رێ كوردان ئه‌و هێز هه‌یه‌ بشێن به‌رسینگێ له‌شكه‌رێ تركیا بگرن؟
سلێمان جه‌عفه‌ر:
به‌لی هێزا كوردان ئیرادا وانه‌، ئیرادا كوردان ژ هه‌ر چه‌كی و هێزێ مه‌زنتره‌، ده‌مێ ئه‌م دبینین ل عه‌فرینێ ژنێن 60 سالی چه‌ك بۆ پاراستنا عه‌فرینێ هه‌لگرتینه‌، ئه‌م هه‌ست ب سه‌ركه‌ڤتنا هێزا كوردان دكه‌ین و كوردان سوند خواریه‌ عه‌فرینێ به‌رنه‌ده‌ن، چنكو شه‌ره‌ف و ناموسا كوردانه‌.

دواڕۆژ: ئه‌رێ رووسیا دێ كوردان ل عه‌فرینێ‌ قوربانی تركیا كه‌ت؟
سلێمان جه‌عفه‌ر:
نه‌خێر، رووسیا دخوازیت چه‌ند ده‌لڤه‌یان ب ده‌ته‌ تركیا لسه‌ر سنووری، دا بشێت هه‌رمێن رۆژئاڤایێ فوراتی ب باشی بۆ به‌رژه‌وه‌ندیێن خوه‌ ب پارێزیت، چنكو هه‌رێمێن رۆژهه‌لاتێ فوراتی ئێدی دێ كه‌ڤن ژێر كۆنترولا ئه‌مریكا.

دواڕۆژ: ئه‌رێ كوردان گره‌نتییه‌ك ژ رووسیا وه‌رگرتیه‌ كو ری نه‌ده‌ت له‌شكه‌رێ تركیا هێرش بكه‌ته‌ سه‌ر عه‌فرینێ؟
سلێمان جه‌عفه‌ر:
چه‌ندین جاران ئه‌م دگه‌ل ژه‌نه‌رالێن رووسیا روونشتنینه‌ وان گره‌نتی دایه‌مه‌ كو رێ ناده‌ن تركیا عه‌فرینێ كۆنترۆل بكه‌ت و دهه‌مان ده‌مدا ئه‌مریكاژی رێ ناده‌ت تركیا هێرشه‌كا به‌رفره‌هـ بكته‌ سه‌ر عه‌فرینێ.

دواڕۆژ: به‌شار ئه‌ل ئه‌سه‌د سه‌رۆكێ سوریا، هه‌ڤپه‌یمانیا كوردان دگه‌ل ئه‌مریكا ب خیانه‌ت بناڤ كربوو، مه‌ره‌ما ئه‌سه‌د ژ وی هه‌لوه‌ستی چبوو؟
سلێمان جه‌عفه‌ر:
ئه‌ز دوورنابینم ئه‌گه‌ر ئه‌سه‌د و رژێما خوه‌ ب هێزكه‌تن، ب هاریكاریا ئیرانێ هێرش بكه‌نه‌ سه‌ر كوردان، لێ تانوكه‌ رژێمێ ئه‌و شیان نینن به‌رامبه‌ر كوردان شه‌ڕی بكه‌ن، دهه‌مان ده‌مدا ئه‌م ناخوازین دگه‌ل رژێمێ بكه‌ڤینه‌ شه‌ڕه‌كێ نوو.

دواڕۆژ: كوردێن رۆژئاڤا چه‌وان نێزیكی هه‌لوه‌ستێن ئه‌مریكا دبن؟
سلێمان جه‌عفه‌ر:
مه‌نه‌ڤێت وه‌ك مه‌سعود بارزانی و باشورێ كوردستانێ هه‌موو هیڤی و چاره‌نڤیسێ خوه‌ ب ئه‌مریكا ڤه‌ گرێده‌ین، هه‌رده‌مێ ئه‌مریكا ده‌ست ژمه‌ به‌ردان ئه‌م تووشی نه‌كسه‌یێ ببین، مه‌ پشتبه‌ست لسه‌ر ئیرادا خوه‌ و سیستمێن خوه‌ كریه‌.

دواڕۆژ: ئه‌رێ ئه‌مریكا دێ ستراتیژیه‌كا ده‌م درێژ بۆ رۆژئاڤایێ كوردستانێ د ئالیێ دیپلۆماسی دا هه‌بیت؟
سلێمان جه‌عفه‌ر:
به‌لێ، چنكو ئه‌مریكا بۆ به‌رژه‌وه‌ندیێن خوه‌ دخوازیت ل رۆژئاڤایێ كوردستانێ په‌یوه‌ندیێن‌ خوه‌ پێشڤه‌به‌ت،  دهه‌مان ده‌مدا كورد ژی نوكه‌ هه‌ولده‌ن نێزیكترین ده‌م  نوونه‌راتیا خوه‌ ل واشنتن پایته‌ختێ ئه‌مریكا ڤه‌كه‌ن، كو چه‌ندین نوونه‌راتیێن دی یێن خوه‌سه‌ریا دیموكرات ل وه‌لاتێن مه‌زن یێن جیهانێ هه‌نه‌، ئه‌ڤه‌ژی نیشانێن پێشكه‌ڤتنا ئالیێ دیبلۆماسیێ شوره‌شا رۆژئاڤایێ كوردستانێ یه‌.

دواڕۆژ: ره‌وشا عه‌فرینێ ژ ئالیێ ئابۆریڤه‌ چه‌وایه‌؟
سلێمان جه‌عفه‌ر:
هه‌موو شۆره‌شێن كوردان ژ ئالیێ له‌شكه‌ری دسه‌ركه‌ڤتی بوون، لێ د ئالیێ ئابوری و دیپلۆماسی شكه‌ستن ئینایه‌، له‌ورا نوكه‌ ئه‌م هه‌ولده‌ین ژ ئالیێ ئابوریڤه‌ ره‌وشا رۆژئاڤایێ كوردستانێ به‌ره‌ڤ باشتر ببه‌ین و كه‌رتێ چاندنێ پێشڤه‌به‌ین.

دواڕۆژ: بۆچی پارتیێن ناڤ ئه‌نه‌كه‌سێ پشكداری هه‌بژاردنێن رۆژئاڤایێ كوردستانێ نه‌بوون؟
سلێمان جه‌عفه‌ر:
ئه‌نه‌كه‌سه‌ دانپێدانێ ب رێڤه‌به‌ریا خوه‌سه‌ریا دیموكراتیك یا رۆژئاڤایێ كوردستانێ ناكه‌ت، دهه‌مان ده‌مدا پارتیێن وان ده‌ستوورا كاركرنێ ژ رێڤه‌به‌ریا خوه‌سه‌ر وه‌رنه‌گرتیه‌، له‌ورا هێزێن ئاسایشێ رێ ناده‌ن ئه‌و پارتی باره‌گایان ڤه‌كه‌ن.

دواڕۆژ: ئه‌رێ هه‌لبژاردن بێ ئه‌نه‌كه‌سێ سه‌ركه‌ڤتی بوون؟
سلێمان جه‌عفه‌ر:
به‌لێ گه‌له‌ك سه‌ركه‌ڤتی بوون و ملـله‌تێ رۆژئاڤایێ كورستانێ گه‌له‌ك ب باشی پێشوازییا هه‌لبژاردنان كر.

دواڕۆژ: بۆچی گه‌له‌ك ژ ئه‌ندامێن ئه‌نه‌كه‌سێ ژئالیێ ئایاسشا رۆژئاڤایێ كوردستانێ، بتایبه‌تی ل عه‌فرینێ، هاتینه‌ گرتن؟
سلێمان جه‌عفه‌ر:
گه‌له‌ك كه‌سێن گۆنه‌هبار ب ته‌قیێن رۆژئاڤایێ كوردستانێ ئه‌ندامێن ئه‌نه‌كه‌سێ بوون و ل ده‌مێ دووڤچوونێ ئه‌و كه‌س ژ ئالیێ ئاسایشێ هاتن گرتن و دانپێدان كرن كو ل هه‌ولێر هاتینه‌ هنارتن دا ته‌قینان ل چه‌ند جهێن رۆژئاڤایێ كودستانێ بكه‌ن.

دواڕۆژ: ئه‌رێ پشكداریا كوردان د كۆنگرێ سۆچی دا هاتیه‌ پشتراستكرن؟
سلێمان جه‌عفه‌ر:
به‌لێ، روسیا گۆتبوو فه‌رمانده‌یێ یه‌په‌گێ، سیپان حه‌مۆ، كو سه‌د ژ سه‌دێ كورد دێ پشكداریێ د كۆنگره‌یێ سۆچی دا كه‌ن، لێ ئه‌م نه‌ مه‌ره‌قدارێن كۆنگره‌یان و كۆمبۆناینه‌، چنكو ئه‌م ب پراكتیك كارێن خوه‌ لسه‌ر ئه‌ردێ رۆژئاڤایێ كوردسانێ و سوریایێ به‌رده‌وام دكه‌ین.



created by Avesta Group and powered by Microsoft Azure