كوردێن شه‌به‌ك كیانه‌كێ سیاسى راگه‌هاند

هەواڵ / کوردستان :: 08/01/2018‌ :: 190‌ جار بینراوە

دواڕۆژ، بورهان یه‌حیا
كوردێن شه‌به‌ك یێن ل ده‌ڤه‌را ده‌شتا نه‌ینه‌وا ب 627 ئه‌ندامان كیانه‌یكێ سیاسى ب ناڤێ "تەڤگەرا ئازادیخوازێن شەبەک "پێكئینا و 9 كه‌س وه‌كو ده‌سته‌یا برێڤه‌برنێ هاتنه‌ هه‌لبژارتن.

غه‌زوان داوودى ئێك ژ دامه‌زرێنه‌رێن ڤێ ده‌سته‌یێ و ئه‌ندامێ جڤاتا پارێزگه‌ها نه‌ینه‌وا بۆ دواڕۆژ رۆهنكر كو؛ "ب مه‌ره‌ما ئێكرێزییا شه‌به‌كان و مسۆگه‌ركرنا مافێن وان ل هه‌رێم و ئیراقێ و پاراستنا ده‌ڤه‌رێن شه‌به‌كان ژلایێ وان بخۆ ڤه‌ ب به‌شدارییا 300 كه‌سایه‌تیێن شه‌به‌ك ئه‌ڤ كیانێ سیاسى هاتییه‌ راگه‌هاندن و دێ هه‌موو كه‌سایه‌تى و وه‌لاتیێن شه‌به‌ك لبن ڤى كیانى هێنه‌ كۆمكرن".

ناڤبۆرى ئاماژه‌كر كو؛ "نها ده‌ڤه‌رێن شه‌به‌ك ل ده‌شتا نه‌ینه‌وا ژلایێ هێزێن حه‌شدا شه‌عبى ڤه‌دهێنه‌ برێڤه‌برن و كوردێن شه‌به‌ك داخوازا ده‌ركه‌ڤتنا وان دكه‌ن و دخوازین هێزه‌ك ژ مه‌ بخۆ بهێته‌ پێكئینان و ده‌ڤه‌رێن خۆ بپارێزین".

غه‌زان داوودى دیاركر كو؛ "کۆنگره‌یێ تەڤگەرا ئازادیخوازێن شەبەک ل ده‌ڤه‌ردارییا شێخان ھاتە ئەنجامدان و تێدا 9 كه‌س وه‌ك دەستەیا مەکتەیا سیاسی و دوو ژى یه‌ده‌ك ھاتنە هه‌لبژارتن كو سێ ژوان ژنن و دێ وه‌ك پارتییه‌كا سیاسى به‌شدارى ھەلبژارتنێن ئیراقێ بین چونكو مۆله‌تا فه‌رمى هه‌یه‌".



created by Avesta Group and powered by Microsoft Azure