هەپەگە لەبارەی تەرمی گەریلا لە کەرکوک رونكردنه‌وه‌ ده‌دات

هەواڵ / کوردستان :: 30/12/2017‌ :: 1539‌ جار بینراوە

دواڕۆژ، عیماد جەباری
هەفتەی رابردوو دوو تەرمی نەناسراو لە مەنهۆڵی بارەگای کەرکوکى ئەنجومەنی سەرکردایەتی پارتی دۆزرانەوە و، وا بڵاوکرایەوە گوایە تەرمی گەریلا بوون و دوای کوشتنیان بەو شێوەیە شاردراونەتەوە، هەپەگەش لەو بارەیەوە رونکردنەوەیەکی بۆ رایگشتی بڵاوکردەوە.


فەرماندەیی هێزەکانی پاراستنی گەل لە کەرکوک- مەخمور، لە راگەیەنراوێکدا کە وێنەیەکی بۆ دواڕۆژ هاتووە دەڵێت "لەڕۆژانی ڕابردوودا هەواڵێک لە هەندێک لەڕاگەیاندنەکانی باشوری کوردستان و هەروەها لە تۆڕە کۆمەڵایەتییەکاندا بڵاوکرایەوە کە تێیدا زانیاری لە بارەی هێزەکانی هەپەگەوە بڵاوکرابووەوە، لەو هەواڵەدا بەبێ بنەما بانگەشەی ئەوەکرابوو، کە تەرمی سێ گەریلا لە کەرکوک دۆزراوەتەوە، ئێمە بە ڕایگشتی ڕادەگەیەنین کە ئەو هەواڵە دوورە لە ڕاستیی و بە مەبەستی نانەوەی ئاژاوە لە ڕایگشتیدا بڵاوکراوەتەوە".

هەپەگە داواشدەکات "گەلی کورد باوەڕ بەو جۆرە هەواڵانە نەکەن".

دوای 16ی تشرینی یەکەم و کشانەوەی پارتی دیموکراتی کوردستان بۆ هەولێر، بارەگای ئەنجومەنی سەرکردایەتی کەرکوک گەرمیانی ئەو حزبە کراوەتە بارەگای سەرەکی فیرقەی دووی دژەتیرۆری عێراق.

هەفتەی رابردوو چەند وێنەیەک بڵاوکرانەوە لەکاتی دەرهێنانی دوو تەرم لەناو مەنهۆڵی بارەگاکە، بەڵام تاوەکو ئێستا بەڕەسمی هیچ زانیارییەک لەو بارەیەوە نەخراوەتەڕوو.



created by Avesta Group and powered by Microsoft Azure