21 ساڵە ئۆجەلان لە زیندانە

هەواڵ / کوردستان :: پێش 2 هەفتە ‌ :: 240‌ جار بینراوە
عەبدوڵا ئۆجەلان، رێبەری پارتی کرێکارانی کوردستان (پەکەکە)

دواڕۆژ، ئاکۆ حەمەد رابی

بیست و یەک ساڵ بەسەر رفاندن و دەستگیرکردنی عەبدوڵا ئۆجەلان و به‌و بۆنه‌یه‌شه‌وه‌ كۆنگره‌ى نه‌ته‌وه‌یى كورد داواكارییه‌ك ئاراسته‌ى خه‌ڵكى هه‌ر چوار پارچه‌ى كوردستان ده‌كات.


رۆژی 15ی شوباتی 1999 عەبدوڵا ئۆجەلان، رێبەری پارتی کرێکارانی کوردستان (پەکەکە) لە نایروبی پایتەختی وڵاتی کینیا لە گەلەکۆمەییەکی نێودەوڵەتی دەسگیرکرا و پاشان رادەستی وڵاتی تورکیا کرایەوە. ئەمەش دوای ئەوەی هیچ یەکێک لە روسیا، هۆڵەندا، ئیتاڵیا و یۆنان ئامادەنەبوون مافی مانەوەى پێبده‌ن.

ئۆجەلان لە کۆتایی ساڵی 1998 له‌ژێر فشاری حکومەتی دیمەشق سوریای بەرەو روسیا و ئەوروپا جێهێشت، ئەمەش پاش ئەوەی ئەنقەرە فشاری لەو وڵاتە کرد بەوەی ئۆجەلان لە خاکەکەیان دەربکەن یان رادەستی تورکیای بکەن، لەو روەوە تورکیا هەڕەشەی جۆراوجۆر و پەیامی توندی ئاراستەی دیمەشق کرد.

پاش ده‌ستگیركردنیشى دادگای تورکیا سەرەتا بڕیاری لەسێدارەدانی بۆ ئۆجەلان دەرکرد، پاشان لەژێر فشاری ناوخۆیی و نێودەوڵەتی بڕیاری سزاكه‌ى گۆڕدرا بۆ زیندانی هەتاهەتایی.

ئۆجەلان ماوەی 21 ساڵە لە دوورگەی ئیمڕاڵی سەر دەریای مەڕمەڕەی تورکیا زیندانیکراوە. 

لەماوەی 21 ساڵی زیندانیکردنەکەیدا چەندینجار ئۆجەلان گۆشەگیرکراوە و تورکیا نەیهێشتووە پارێزەر و کەسوکارەکەشی چاویان پێبکەوێت. چەندینجاریش لە زیندان تەندروستی تێکچووە و ئێستاش هیچ کەس زانیارییه‌ك لەسەر رەوش و تەندروستی و ژیانی ئۆجەلان نیە، چونکە گۆشەگیرکراوەتەوە و رێگەنادرێت پارێزەر و کەسوکارەکەی چاویان پێبکەوێت.

لە ساڵڕۆژی دەسگیرکردنەکەیدا کۆنگرەی نەتەوەی کورد (کەنەکە) بەیاننامەیەکی بڵاوکردۆتەوە و لەبەشێکیدا داوا لە هەموو حیزبەکان و خەڵکی کوردستان و ئازدیخوازان دەکات کە فشار و چالاکیەکانیان زۆرتر بکەن و بەدەنگێکی بەرز داوای ئازادکردنی ئۆجەلان بکەن. 

هاوکات بەیاننامەکە جەخت لەوەشدەکاتەوە: پێویستە هەموو ئازدیخوازان ساڵڕۆژی رفاندن و دەستگیرکردنی ئۆجەلان پرۆتستۆ بکەن.

پ: شیروان شه‌ریف



  • ڕۆژ
  • هەفتە
  • مانگ
created by Avesta Group and powered by Microsoft Azure