وێنه‌: كچه‌كا ئێزدى پرتووكخانه‌یه‌كێ د ناڤ كه‌مپه‌كێ دا ڤه‌دكه‌ت

هەواڵ / که‌لتور :: پێش 2 هەفتە ‌ :: 377‌ جار بینراوە

دواڕۆژ، بورهان یه‌حیا

كچه‌كا ئێزدى ل سه‌ر ئه‌ركێ خۆ پرتووكخانه‌یه‌كا گشتى د ناڤ كه‌مپه‌كا ئاواره‌یان ل پارێزگه‌ها دهۆك دا ڤه‌دكه‌ت و به‌رده‌وامه‌ ل سه‌ر به‌رفره‌هكرنا وێ.


ئه‌میرا عه‌تو، كچا ئێزدى یا خه‌لكا خانه‌سوورێ ل شنگال 25 سالى بۆ دواڕۆژ رۆهنكر: "پشتى كاره‌ساتا شنگال یا سالا 2014ێ ئاواره‌ى كه‌مپا بێرسڤێ 2 ل زاخۆ بووین و هه‌ر ل رۆژێن ده‌ستپێكێ دگه‌ل ماندیبوونه‌كا زۆر مه‌ ده‌ست ب هاریكاریكرنا خه‌لكێ خۆ كر ئه‌وژى ب پشته‌ڤانییا رێكخراوێن جڤاكێ سڤیل و خه‌لكێ خۆبه‌خش و خێرخواز و دگه‌ل هندێ خولێن ده‌روونى بۆ كچێن رزگاربوویى هاتینه‌ ڤه‌كرن و ل دووماهیێ من بڕیار دا وه‌كو پشته‌ڤانییه‌ك بۆ زارۆیان داكو ل سه‌ر خواندنێ به‌رده‌وام بن و په‌یداكرنا ده‌لیڤه‌یا خواندنا ده‌ره‌كى بۆ گه‌نجان پرتووكخانه‌یه‌كا گشتى ل كه‌مپا بێرسڤێ 2 ڤه‌كه‌م و هه‌تا نوكه‌ پترى 2400 ناڤونیشانێن پرتووكان هاتینه‌ كۆمكرن".

ناڤبۆرى دیاركر: "ل پرتووكخانه‌یێن پارێزگه‌هێن دهۆك و هه‌ولێر و پرتووكخانه‌یێن تایبه‌ت یێن نڤیسه‌ران و هه‌تا ژ مووسل و به‌غدا پرتووك هاتینه‌ كۆمكرن ئه‌وژى ل سه‌ر ئه‌ركێ دراڤى یێ من بخۆ و به‌شه‌ك ژ هاریكارییا وه‌لاتییان و ب ڤى ره‌نگى هه‌تا نوكه‌ پترى 2400 ناڤونیشان هاتینه‌ كۆمكرن".

ئه‌میرا عه‌تۆ راگه‌هاند: "جهێ پرتووكخانه‌یێ مه‌زن و به‌رفره‌هه‌ و كۆرسى و مێزێن تایبه‌ت بۆ خواندنێ تێدا هاتینه‌ دانان و ژ ده‌مژمێر 9ێ سپێدێ هه‌تا 7ێ ئێڤارى پێشوازی ل زارۆ و گه‌نج و حه‌ز ژێكه‌رێن خواندنێ دهێته‌كرن، چونكو دزانین راگه‌هاندن و ئه‌نترنێت نه‌شێت ب دروستاهى جهێ پرتووكێ بگریت".

ئه‌ڤ كچا ئێزدى خویاكر: " نوكه‌ ئه‌وان ده‌ست ب هه‌وه‌كا كۆمكرنا پرتووكان كرینه‌ كو هه‌ر كه‌سه‌ك حه‌ز هه‌بیت و بڤێت هاریكارییا حه‌زژێكه‌رێن پرتووكێ ل ناڤ كه‌مپان بكه‌ت ئه‌و پرتووكێن كو خواندبن بێ به‌رامبه‌ر پێشكێشى پرتووكخانه‌یا ئه‌میرا ل كه‌مپا بێرسڤێ 2 ل زاخۆ یان پرتووكخانه‌یا به‌درخانییان ل سه‌نته‌رێ باژێڕێ دهۆك بكه‌ت، بۆ هندێ ئه‌ڤ پرتووكخانه‌ هێشتا به‌رفره‌هتر لێ بهێت".

ب: شیروان



  • ڕۆژ
  • هەفتە
  • مانگ
created by Avesta Group and powered by Microsoft Azure