ترامپ و چارەسەركردنی مەسەلەی فەلەستین

هەواڵ / ڕاپۆرت :: پێش 4 هەفتە ‌ :: 279‌ جار بینراوە

دواڕۆژ

راگەیاندنی پڕۆژە چاوەڕوانكراوەكەی دۆناڵد ترامپ بۆ چارەسەركردنی كێشەی فەلەستین – ئیسرائیل، كە بە ناوی گرێبەستی سەدە ناسراوە هەوڵێكی ئاشكرای سەرۆكی ئەمریكایە بۆ مسۆگەركردنی دەنگی دەنگدەرە جولەكەكان لە هەڵبژاردنی داهاتوودا. 


ترامپ بەوە ناسراوە كە ئەوپەڕی پراگماتییە و لە مەسەلەی پشتگیریكردنی ئیسرائیلدا هیچ سەرۆكی دیموكرات یان كۆماریخوازی پێش خۆی وەك ئەم نەبوون. خۆ ئەگەر ئەم گرێبەستەش شكست بهێنێت ئەوا نەخشەیەكی جێگرەوە و ئامادە لەئارادایە كە جارید كۆشنەری زاوای ترامپ لە دیدارەكەیدا لەگەڵ ناتانیاهۆی سەرۆك وەزیرانی ئیسرائیلدا رایگەیان. نەخشە ئەڵتەرناتیڤەكە پێی دەگوترێت (ئاشتی ئابووریی) ئەم پڕۆژەیە لە گرێبەستی سەدە قبووڵكراوترە و كەمتر دەبێتە مایەی شەرمەزاربوونی وڵاتانی عەرەبی و كەنداو هەروەها بەلای سەركردە فەلەستینییەكانیشەوە قبووڵكراوترە و ناچاریان ناكات واز لەو دروشمە كلاسیكیانە بهێنن كە ساڵانێكە ناوبەناو دووپاتی دەكەنەوە.
پڕۆژەی ئاشتی ئابووریی كاتێك جێبەجێ‌ دەكرێت كە گرێبەستی سەدە شكست بهێنێت. ئەمە لەكاتێكدایە كە شانۆگەرییەكی لاواز دەستی پێكردووە بە حساب بۆ دادگاییكردنی ترامپ لە كۆنگرێسدا. بڕیارەكەی ترامپ سەبارەت بە بڵاوكردنەوەی ناوەڕۆكی گرێبەستی سەدە دەرئەنجامی گفتوگۆ و بیروڕا گۆڕینەوەكانی بوو لە كۆبوونەوەی داڤۆسدا لەگەڵ زاواكەی و راوێژكارەكان و سەركردەكانی جیهان بەتایبەت سەركردەكانی خۆرهەڵاتی ناوەڕاست و وڵاتانی عەرەبی.
زوربەی ناوەندە ئیسرائیلییەكان دەڵێن راگەیاندنی گرێبەستەكە لەم كاتەدا خزمەت بە ناتانیاهۆ دەكات لە هەڵبژاردنە چاوەڕوانكراوەكەی مانگی ئازاری داهاتوودا. بزووتنەوەی فەتح و خودی سەرۆك مەحمود عەباس پڕۆژەی ئاشتی ئابوورییان پێ‌ باشترە، ئەم هەڵوێستەش هەمان هەڵوێستی وڵاتانی ناوچەكەیە كە پەیوەندی نهێنییان هەیە لەگەڵ ئیسرائیلدا بەتایبەت بەشی زۆری وڵاتانی كەنداو.
خاڵە جەوهەرییەكانی پڕۆژەی ئاشتی ئابووریی بریتییە لە رێكەوتن لەسەر رێگەچارەی سیاسی و چەسپاندنی ئۆتۆنۆمی. بابەت و مەسەلە ئاڵۆزەكانی دیكەی وەك  بارودۆخی قودس و ئاوارەكان و دەسەڵات و خاك بەجێ‌ بهێڵرێن بۆ قۆناغی داهاتوو كە لە ئەنجامی دروستبوونی متمانەدا دێتە ئاراوە. لایەنێكی دیكەی ئەم پڕۆژەیە باشكردنی گوزەرانی هاووڵاتیانە لەڕێی ئاساییكردنەوەی پەیوەندی نێوان عەرەب و ئیسرائیلەوە ئینجا ناكۆكییە سنوورییەكان رووبەڕووی دادگا نێودەوڵەتیەكان بكرێنەوە وەك هەموو ناكۆكییەكی دیكەی سنووری لە جیهاندا.
كەواتە ئەوەی لەسەر شانی ترامپ پێویستە جێبەجێی بكات لە ماوەی مانەوەیدا لە كۆشكی سپی بریتییە لە یەكلایكردنەوەی مەسەلەی فەلەستین. تەنانەت ئەگەر بە هەڕەشكردنیش بێت لە ئێران یان بە هەر دروشمێكی دیكە.

 

پ: ک. س



created by Avesta Group and powered by Microsoft Azure