ئاواره‌ و په‌نابه‌ر دێ نه‌فت و پاره‌ی وه‌رگرن

هەواڵ / ئابوری :: پێش 4 هەفتە ‌ :: 182‌ جار بینراوە

دواڕۆژ، بورهان یه‌حیا

بۆردێ كاروبارێن مرۆڤایه‌تی ل پارێزگه‌ها دهۆك بۆ قۆناغا سیێ ده‌ست ب به‌لاڤكرنا 110 لترێن نه‌فتێ بۆ ئاواره‌ و په‌نابه‌ران كرینه‌ و  دگه‌ل هندێ هه‌ر خێزانه‌كا ئاواره‌ 200 دۆلار و په‌نابه‌ر ژی دێ 400 دۆلاران وه‌رگرن.

سالم سه‌عید به‌رپرسێ راگه‌هاندنا بۆردێ كاروبارێن مرۆڤایه‌تی ل پارێزگه‌ها دهۆك بۆ دواڕۆژ دیاركر:" بوردێ کاروبارین مرۆڤایەتی BRHA ب هه‌ڤکاری و هەماهەنگی دگەل رێکخراوا UNHCR  و وەزارەتا کۆچ و کۆچبەران رابووینە به‌لاڤكرنا نه‌فت و پاره‌ی ل سه‌ر ئاواره‌  و په‌نابه‌ران و ب ڤی ره‌نگی كو ل دەستپێکا وەرزێ زڤستانێ ٤٠ لترێن نه‌فتێ بۆ هەر خێزانەکێ بەلاڤ کربوون و پاشی ٥٠ لتر هاتبوونە بەلاڤکرن و نوكه‌ دەست ب بەڵاڤکرنا (١١٠) لترێن نه‌فتێ بۆ هەر خێزانەکی کو بەهرا وان بۆ سالەکی دێ بیتە ( ٢٠٠ ) لتر".

دیاركر:" ل ده‌ستپێكێ پرۆسه‌ ل وان كه‌مپان بوویه‌ كو ل جهێن چیایی و سارن دووڤدا دێ به‌ره‌ڤ كه‌مپێن دی چین".

ناڤبۆری خویاكر:" بۆ هەمان مەرەم BRHA ب هه‌ڤكاری دگەل رێکخراوا UNHCR و QANDIL رابووینە ژبۆ بەلاڤکرنا ٢٠٠ دۆلار پارە ی بۆ هەر خێزانەکا ئاوارە ل ناڤ کەمپان کۆ ئەڤ کۆژمە پێش نه‌فتێ ڤه‌ هاتییه‌دان و دیسا رێکخراوا UNHCR کۆژمه‌یێ ٤٠٠ دۆلار بۆ هەر خێزانه‌کا پەنابەر د ناڤ کەمپان دا تەرخانکرینە، ئانكو هه‌م دێ نه‌فتێ وه‌رگرن و هه‌م پاره‌ی".

سالم سه‌عید دا دیاركرن:" بۆردێ کاروبارین مرۆڤایەتی BRHA ب هه‌ڤکاری و هەماهەنگی دگەل وەزارەتا كۆچ و كۆچبه‌ران دەست ب بەلاڤکرنا ئاهێن خوارنێ ل سەر خێزانێن ئاواره‌یان دناڤ کەمپان دا و دەرڤەی کەمپان دا کرینە".



created by Avesta Group and powered by Microsoft Azure