پزیشكێكی دەرمانساز سكاڵا لەسەر سۆران عومەر تۆمار دەكات

هەواڵ / کوردستان :: پێش 4 هەفتە ‌ :: 312‌ جار بینراوە

دواڕۆژ، پشتیوان جەمال

پزیشكێكی دەرمانساز سكاڵای لەسەر سۆران عومەر، پەرلەمانتاری كۆمەڵی ئیسلامی كوردستان تۆماركرد و هۆكارەكەشی بۆ ئەوە دەگێڕێتەوە كە ئەو پەرلەمانتارە بە زانیارییە "هەڵەكان"ی دۆخێكی شڵەژانی دروستكردووە.


ئەمڕۆ 22ی كانوونی دووەمی 2020، د. دڵشاد محەمەد، پزیشكی دەرمانساز لەدادگای سلێمانی سكاڵای لەسەر سۆران عومەری پەرلەمانتار تۆمار كرد و دواتر لەكۆنگرەیەكی رۆژنامەوانیدا رایگەیاند "سكاڵاكەی لەسەر ئەوەیە كە ئەو پەرلەمانتارە هەندێك زانیاری لەپەیجەكەی خۆی بڵاودەكاتەوە و دواتر روونكردنەوە دەدرێت كە ئەو زانیارییانە وا نین ئەوەش دۆخێكی دڵەڕاوكێ لای هاوڵاتیان دروستدەكات".

ناوبراو روونیكردەوە: ئەو پەرلەمانتارە بۆ نموونە باسی دۆسیەیەك دەكات، بەڵام ناوی كەسەكان ناهێنێت، بۆ نموونە دەڵێت لەوڵاتێكی دراوسێ خواردنی ئێكسپایەر هێنراوەتە كوردستان و ساغكراوەتەوە، بەڵام لەكۆكردنەوەی پارەی زەكات و خێرخوازی كە بەملیۆنان دۆلار پڕۆژەی پێكراوە، بۆچی بەتەنها وشەیەك باسی ئەو پارانە ناكات؟".

سەبارەت بەوەی هیچ كەس و لایەنێك لەپشت ئەم سكاڵایەوە نییە؟ د. دڵشاد وتی: "وەك پزیشكێك لەبواری دەرمان كار دەكەم و هیچ لایەنێكم لەپشت نییە، بەڵام هەست بەو شڵەژانە دەروونییەی خەڵك دەكەم لەسەر ئەو زانیارییانەی كە ئەو پەرلەمانتارە بڵاویان دەكاتەوە".

دەربارەی ئەوەشی بۆچی سكاڵا هەر لەسەر سۆران عومەر بڵاودەكاتەوە، لەكاتێكدا پەرلەمانی كوردستان 111 ئەندامی هەیە و هەمووشیان رۆژانە زانیاری بڵاودەكەنەوە، ئەو پزیشكە دەڵێت: "سۆران عومەر زیاتر لەبواری دەرمان زانیاری بڵاودەكاتەوە و نەمبینیوە پەرلەمانتاری دیكە ئەو زانیارییانە بڵاوبكاتەوە، ئەگەر پەرلەمانتارێك بەو رێگە زانیاری بڵاوبكاتەوە سكاڵای لەسەر تۆمار دەكەم".



created by Avesta Group and powered by Microsoft Azure