وێنه‌: كچه‌ك ئێش و ئازارێن ئێزدییان دكه‌ته‌ تابلۆ

هەواڵ / که‌لتور :: 20/01/2020‌ :: 118‌ جار بینراوە

دواڕۆژ، بورهان یه‌حیا


كچه‌كا هونه‌رمه‌ندا ئێزدی ب رێیا تابلۆیێن خۆ یێن شێوه‌كاری ده‌ربرینێ ژ هه‌موو ئێش و ئازارێن كچ و ژنێن رزگاربوویی یێن ده‌ستێ داعش و هه‌موو ئێزدیێن دی دكه‌ت.


مریه‌م مه‌روان محه‌مه‌د كچه‌ هونه‌رمه‌ندا ئێزدی بۆ دواڕۆژ دیاركر: هه‌ر ژ زارۆكینیێ حه‌ز ل سه‌ر هونه‌ری هه‌بوویه‌ و به‌ری هاتنا داعش د ئاسته‌كێ باش دا كارێ هونه‌ری دكرن، لێ پشتی سالا 2014ێ و ئه‌و فه‌رمانا ب سه‌رێ ئێزدییان هاتی، ئێدی ئه‌و هه‌ست بۆ من چێبوو كو ئه‌و ئێش و ئازارێن ب سه‌رێ ئێزدییان هاتی ب تایبه‌ت كچ و ژنێن كه‌تینه‌ د ده‌ستێ چه‌كدارێن داعش دا بكه‌مه‌ تابلۆ و وێ په‌یامێ بگه‌هینم.


دیاركر: به‌شه‌ك ژ رێكخراوێن جیهانی یێن خێرخواز داخواز ژ من كرن‌ كو دگه‌ل كچێن رزگاربوویی یێن ده‌ستێ داعش روینم و گوهدارییا چیرۆكا وان بكه‌م و دووڤدا وان چیرۆكا بكه‌مه‌ تابلۆیێن شێوه‌كاری، ب ڤی ره‌نگی ده‌ست ب كاری هاتییه‌كرن و ناڤه‌رۆكا ڤان تابلۆیان ده‌ربرینێ ژ ئێش و ئازارێن وان ب رێیه‌كا هونه‌ری دكه‌ن و ئه‌ڤ‌ ئه‌ڤ تابلۆیه‌ ل چه‌ندین وه‌لاتان هاتینه‌ نیشاندان.


مریه‌م مه‌روان خویاكر: كاره‌ساتا داعش ب سه‌رێ ئێزدییان ئینای و ئاواره‌بوون ئه‌ز نه‌چاركرم ده‌ست ژ خواندنێ به‌رده‌م، ئێدی حه‌زا هونه‌ری پتر ل ده‌ف من چێبوو و هه‌موو ئه‌و هزرێن ڤێ كاره‌ساتێ كو د سه‌رێ من دا هه‌نه‌ دكه‌مه‌ تابلۆ.


ناڤبۆری ئاماژه‌كر: هه‌تا نوكه‌ 6 پێشانگه‌هێ هونه‌ری ل كوردستانێ و ل ده‌رڤه‌ی وه‌لاتی ڤه‌كرینه‌ و ب تنێ رێكخراوێن جیهانی پشتگیریێ ل تابلۆ وكارێن مه‌ یێن هونه‌ری دكه‌ن و حوكمه‌تێن خۆجهـ هند گرنگیێ پێ ناده‌ن.

پ: ک. س



created by Avesta Group and powered by Microsoft Azure