حه‌سۆ شنگالى: ئه‌گه‌ر حكومه‌تا ئیراقێ هێرشێن تركیا نه‌راگریت بلا ژ شنگال ده‌ركه‌ڤیت

هەواڵ / چاوپێکەوتن :: پێش 4 هەفتە ‌ :: 386‌ جار بینراوە

دواڕۆژ، دهۆك

حه‌سۆ ئیبراهیم شنگالى، هاریكارێ هه‌ڤسه‌رۆكێ مه‌جلسا خوه‌سه‌ر یا شنگال، د چاڤدیتنه‌كا دواڕۆژ-دا، ره‌خنه‌یێن دژوار ل له‌شكه‌رێ ئیراقێ و هه‌لوه‌ستێ حكومه‌تا ئیراقێ گرتن و داخوازكر حكومه‌تا ئیراق ئاسمانێ شنگالێ به‌رامبه‌ر باله‌فڕێن تركیا قه‌ده‌غه‌بكه‌ت، یان ژ شنگال ده‌ركه‌ڤیت.

دواڕۆژ: بۆچى هێرشێن تركیا بۆ سه‌ر شنگال به‌رده‌وامن، بتایبه‌ت دژى یه‌به‌شێ؟

حه‌سۆ شنگالى: هه‌ر ملـله‌ته‌كێ بن ده‌ست ل رۆژهه‌لاتا ناڤین هه‌ولدا ئازادبیت، یان ب كه‌رامه‌ت بژیت، تركیا دژى وى ملـله‌تى دراوه‌ستیت. پشتى كۆمكۆژیان داعش ل 2014ێ ب سه‌رێ ئێزدیێن شنگال هیناى، جڤاكێ ئێزدییان بڕیاردا هێزه‌كێ بۆ پاراستنا خوه‌ پێكبینن و خوه‌ ب رێكخستن بكه‌ن، لێ تركیا ناخوازیَت ئێزدى خۆدان رێكخستن و هێزبن. چه‌وا 300 گوندێن ئێزدییان ل باكورێ كوردستانێ وێران و چۆلكرن، ب هه‌مان سیایه‌ت نووكه‌ هه‌ولده‌ت شنگال ژى وێران بكه‌ت، له‌ورا به‌رده‌وام له‌شكه‌رێن تركیا ب باله‌فڕان هێرش دكه‌ت سه‌ر هێزێن یه‌به‌شێ كو هێزا به‌رخوه‌دان و پاراستنا شنگال-ن.


دواڕۆژ: تۆ هه‌لوه‌ستێ ئیراقی به‌رامبه‌ر ڤان هێرشێن تركیا چاوان دنرخینى؟
حه‌سۆ شنگالى: بێگۆمان، ئیراق ژ ڤان هێرشێن تركیا ئاگه‌هداره‌، بێده‌نگبوونا حكومه‌تا ئیراقێ پرسیارا مه‌یه‌، چاوان باله‌فڕێن تركیا دێ شێن ئاسمانێ ئیراقێ به‌زینن و بۆچى ئیراق بێده‌نگه‌؟ به‌رى دوو سالان، ده‌مێ تركیا هێرش كرییه‌ سه‌ر بنگه‌هێن یه‌به‌شێ، حكومه‌تا تركیا راگه‌هاند: به‌رى وان هێرشان، حكومه‌تا ئیراقێ و ئیداره‌یا باكورێ ئیراقێ لسه‌ر وان هێرشان ئاگه‌هداركربوون. ئه‌گه‌ر حكومه‌تا ئیراقێ هێرشێن تركیا نه‌راگریت بلا ژ شنگال ده‌ركه‌ڤه‌یت.


دواڕۆژ: تركیا دبێژیت(هێرشێن مه‌ ل شنگالێ بۆ سه‌ر په‌كه‌كێ نه‌) ئه‌رێ په‌كه‌كه‌ ل شنگال هه‌یه‌ یان په‌یوه‌ندیێن یه‌به‌شێ دگه‌ل په‌كه‌كێ هه‌نه‌؟
حه‌سۆ شنگالى: چۆ گه‌ریلایێن په‌كه‌كێ ل شنگال نه‌ماینه‌، په‌كه‌كه‌ به‌رى دوو سالان ژ شنگال ده‌ركه‌ڤتییه‌، هێزێن یه‌به‌شێ‌ سه‌ربخوه‌نه‌ و هێزا گه‌لێ ئێزدیینه‌ و ژ شنگالێ نه‌، كه‌س نه‌شێت چۆ به‌لگان بینیت كو په‌كه‌كه‌ ل شنگال هه‌یه‌، یه‌به‌شه‌ شییا به‌رامبه‌ر داعش شنگالێ و گه‌لێ ئێزدى ب پارێزیت، ئێدى یه‌به‌شێ چۆ په‌یوه‌ندى دگه‌ل په‌كه‌كێ نه‌ماینه‌، تركیا هه‌بوونا په‌كه‌كێ ل شنگال بتنێ وه‌ك به‌هانه‌ بۆ هێرشا سه‌ر گه‌لێ ئێزد بكاردهینیت.


دواڕۆژ: ئه‌رێ یه‌به‌شه‌ و مه‌جلسا شنگال هزر ل تۆلڤه‌كرنێ كریه‌، بتایبه‌ت دژى تركان ل ئیراقێ؟
حه‌سۆ ئیبراهیم: هه‌تا نووكه،‌ یه‌به‌شێ و مه‌جلسا شنگال هزر ل وێ چه‌ندێ نه‌كریه‌ ل ئیراقێ هێرش بكه‌نه‌ سه‌ر به‌رژه‌وه‌ندیێن تركیا، یان كۆنسلخانه‌ و هێزێن تركیا. نووكه‌ ئه‌م داخوازێ ژ حكومه‌تا ئیراقێ دكه‌ین هه‌لوه‌تسێ خوه‌ دژى ڤان هێرشێن تركیا نیشان بده‌ت، لێ ئه‌گه‌ر ره‌وش هه‌ر هوسا بمینیت ره‌نگه‌ ئه‌م وه‌كو مه‌جلسا شنگال نه‌شێین رێگریێ ل توره‌بوونا گه‌نجێن شنگال بگرین و روودانێن تۆلڤه‌كرنێ یێن نه‌چاڤه‌رێكرى چێببن.


دواڕۆژ: هه‌لوه‌ستێ حكومه‌تا هه‌رێما كوردستانێ به‌رامبه‌ر هێرشێن تركیا چیه‌؟
حه‌سۆ شنگالى: حكومه‌تا هه‌رێما كوردستانێ نه‌شێت چۆ هه‌لوه‌ستان نیشان بده‌ت و بێده‌نگه‌. ته‌ماشاكه‌ن، رۆژانه‌ تركیا هێرش دكه‌ته‌ سه‌ر ئامێدى و زاخۆ و خواكورك و سیده‌كان، حكومه‌تا هه‌رێما كوردستانێ خوه‌ بێده‌نگ دكه‌ت، له‌ورا ئه‌م د وێ باوه‌رێدانه‌ كو حكومه‌تا هه‌رێمێ چۆ هه‌لوه‌ست به‌رامبه‌ر ڤان هێرشێن تركیا نابن، ئه‌و حكومه‌ت خوه‌ به‌رامبه‌ر تركیا گه‌له‌ك لاواز دبینیت.


دواڕۆژ: هێرشێن تركیا دێ بنه‌ ئه‌گه‌ر لاوازییه‌ك د كاروبارێن مه‌جلسا شنگالێ و ناڤ رێزێن یه‌به‌شێ دا چێبیت؟
حه‌سۆ ئیبراهیم: نه‌خێر، چنكو تركیا سێ ساله‌ هێرش دكه‌ته‌ سه‌ر شنگال، لێ هێزا یه‌به‌شێ و گه‌لێ ئێزدى رۆژ لدوڤ رۆژێ زێده‌تر دبیت و یه‌به‌شه‌ ب شه‌هیدبوونا چه‌ند شه‌ڕڤانان لاواز نابیت. سالا ده‌ربازبوویی ده‌مێ (مام زه‌كى شنگالى) هاتیه‌ شه‌هیدكرن هێز و ڤیانا ئێزدییان بۆ یه‌به‌شی زێده‌تر لێهات و پشتى شه‌هیدبوونا زه‌رده‌شت شنگالى ژى، هێزا مه‌ دێ مه‌زنتر بیت و چۆ جاران گه‌لێ ئێزدى خوه‌ راده‌ستى تركان و دووژمنان ناكه‌ت.


پ: ل. م
ب: ک. س



created by Avesta Group and powered by Microsoft Azure