دهۆك: به‌لێنده‌ر دووباره‌ پڕۆژه‌یێن خۆ راوه‌ستاندن

هەواڵ / ئابوری :: 19/01/2020‌ :: 156‌ جار بینراوە

دواڕۆژ، بورهان یه‌حیا

سه‌رۆكێ ئێكه‌تییا به‌لێنده‌رێن كوردستانێ تایێ دهۆك راگه‌هاند؛ ژبه‌ر پێگیرنه‌بوونا حوكمه‌تێ ب دانا پاره‌ى بۆ پڕۆژه‌یان دووباره‌ هنده‌ك به‌لێنده‌ران ئه‌و پڕۆژه‌یێن ده‌ستپێكرین راوه‌ستاندنه‌ڤه‌.


زیره‌ك دۆسكى سه‌رۆكێ ئێكه‌تییا به‌لێنده‌رێن كوردستانێ تایێ دهۆك (ئه‌ڤرۆ ئێكشه‌مب 19 كانوونا دووێ 2019) بۆ دواڕۆژ دیاركر: "حوكمه‌تا هه‌رێمێ بڕیار دابوو ئه‌و پڕۆژه‌یێن رێژه‌یا ئاڤاكرنێ تێدا گه‌هشتییه‌ 80% ده‌ست ب ته‌مامكرنا وان بهێته‌كرن و دێ پاره‌ بۆ هێنه‌ مه‌زاختن و ل سه‌ر ڤێ سۆزێ جاره‌كادى به‌لێنده‌ران ل دهۆك ده‌ست ب كارێن خۆ كرن، لێ پشتى ماوه‌یه‌كێ زۆر هێشتا حوكمه‌تێ چ پاره‌ نه‌مه‌زاختن و ب ڤى ره‌نگى به‌شه‌ك ژ به‌لێنده‌ران دووباره‌ كارێن خۆ راوه‌ستاندن".

ناڤبۆرى ئاماژه‌كر: "پترییا ئه‌و پڕۆژه‌یێن نوكه‌ به‌لێنده‌ر ل سنۆرێ پارێزگه‌هێ كار تێدا دكه‌ن ئاڤاكرنا قوتابخانه‌یانه‌، هه‌ر چه‌نده‌ هنده‌ك هێشتا به‌رده‌وامن لێ ئه‌گه‌ر حوكمه‌ت به‌لێنا خۆ نه‌به‌ته‌ سه‌رى و پاره‌ى بۆ ته‌رخان نه‌كه‌ ئه‌و به‌لێنده‌ر ژى نه‌شێن به‌رده‌وام بن و دێ كارى راوه‌ستینن".

ل سنۆرێ پارێزگه‌ها دهۆك 870 به‌لێنده‌ر ئه‌ندامێن ئێكه‌تییا به‌لێنده‌رێن كوردستانێ تایێ دهۆكن لێ پترییا وان پشتى هاتنا قه‌یرانێ ژ كارى راوه‌ستیاینه‌.

پ: چ.ع



created by Avesta Group and powered by Microsoft Azure