هەرێم و ئێران لەسەر کێشەی شۆفێران رێککەوتن

هەواڵ / ئابوری :: 19/01/2020‌ :: 234‌ جار بینراوە

دواڕۆژ، سیروان حەسەن

دوای مانگرتنیان بۆ ماوەی دوو رۆژ و وەستاندنی جوڵەی بازرگانی، کاربەدەستانی مەرزی پەروێزخان و وڵاتی ئێران رێککەوتن پرۆسەی پشکنین خێرا بکەنەوە بۆ ئەوەی شۆفێران نەمێننەوە لەناو خاکی ئێراندا. 


ماوەی دوو رۆژە شۆفێرانی مەرزی پەروێزخان مانیان لەکارکردن گرتووە و جوڵەی بازرگانییان لەمەرزەکە وەستاندووە، ئەمەش لەبەر ئەوەی لەدیوی وڵاتی ئێرانەوە لەکاتی پشکنین بۆ ماوەیەکی زۆر دەمێننەوە. 

سەلام محەمەد، شۆفێری تانکەر لەمەرزی پەروێزخان بەدواڕۆژی راگەیاند: لەبەر ئەوەی لەمەرزی پەروێزخان لەدیوی وڵاتی ئێرانەوە لەکاتی پشکنیندا بۆ ماوەیەکی زۆر دەمێنینەوە، تەنانەت زۆرجار رۆژێک یان زیاتر دەمێنینەوە زۆرینەی شۆفێرانی مەرزەکە ماوەی دوو رۆژە کار ناکەین و جوڵەی بازرگانی مەرزەکەمان پەکخستووە. 

وتیشی: "وڵاتی ئێران دوو فەرمانبەر یان سێ فەرمانبەری بۆ پشکنینی بارهەڵگرەکان داناوە لەکاتێکدا رۆژی وا هەیە ژمارەی بارهەڵگرەکان دەگاتە 700 بارهەڵگر".

ئەو شۆفێرە راشیگەیاند: تاوەکو پرۆسەی پشکنینەکە خێراتر نەکرێتەوە بەردەوام دەبین لە مانگرتن، چونکە بەو شێوەیەی ئێستا جگە لە زیانی مادی کاتێکی زۆریشیان بەفیڕۆ دەچێت. 

شەرمین عەلی، بەڕێوەبەری راگەیاندنی کۆمەڵگەی دەروازەی مەرزی پەروێزخان بەدواڕۆژی راگەیاند: ئەمڕۆ بەڕێوەبەری دەروازەی مەرزەکە بەیاوەری شاندێک سەردانی وڵاتی ئێرانیان کردووە بۆ چارەسەری گرفتی ئەو شۆفێرانە. 

وتیشی: "کاربەدەستانی مەرزەکە لەدیوی وڵاتی ئێران بە زیادکردنی فەرمانبەر و خێراکردنی پشکنینی ئۆتۆمبێلە بارهەڵگرەگان بەڵێنی چارەسەری ئەو کێشەیەیان داوە و وابڕیارە سبەی ئاڵوگۆڕی بازرگانی ئاسایی بکرێتەوە". 

سەرچاوەیەک لەمەرزی پەروێزخان کە نەیویست ناوی بڵاوبکرێتەوە بەدواڕۆژی راگەیاند: بەشێکی زۆری وردبوونەوەی کاربەدەستانی ئێران لە کاتی پشکنینی بارهەڵگرەکان هێنانی کەلوپەل و خواردن و خواردنەوەیە بەشێوەی قاچاخ، هەربۆیە پرۆسەی پشکنینەکە بەسستی بەڕێوەدەچێت. 

وتیشی: "چەند شۆفێرێک پێشتر دەستگیر کراون و تەنانەت بەڵێننامەشیان لێ وەرگیراوە چیتر کەرەستە و خۆراک و کەلوپەلی قاچاخ لەنێو بارهەڵگرەکانیان حەشار نەدەن، بەڵام ئەو حاڵەتە بەردەوامی هەیە و بنەبڕنەکراوە و وڵاتی ئێرانیش بۆ رێگریکردن بە وردی پشکنین دەکات". 

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure