پۆلیسی دارستان لەكاتی بەفردا هەوڵی پاراستنی ئاژەڵە كێوییەكان دەدات

هەواڵ / کوردستان :: 18/01/2020‌ :: 234‌ جار بینراوە

دواڕۆژ، رێبین حەسەن


بەهۆی بەفربارینەوە، ژیانی ئاژەڵ و باڵندە كێوییەكان لەمەترسیدایە و هێزەكانی پۆلیسی دارستان و ژینگەی پێنجوێنیش، بۆ پارێزگارییكردنیان كێوماڵێكیان لەسنووری ژمارەیەك گوندی پێنجوێن ئەنجامدا.

رائید ئیسماعیل ئیبراهیم، بەڕێوەبەری بەشی پۆلیسی دارستان و ژینگەی پێنجوێن، بەدواڕۆژی راگەیاند "بەهۆی ئەو شەپۆلی بەفربارینەی سنووری قەزای پێنجوێن و دەوروبەری گرتۆتەوە، بۆ دۆزینەوە و پەیداكردنی خۆراكیش، باڵندە و ئاژەڵە كێوییەكان لەهێلانە و شوێنەكانیان سەردەهێنن، بەڵام لەو كاتەدا زۆر جار دەبنە نێچیری راوچییەكان".

وتیشی: "بۆیە ئەمشەو هەستاین بەئەنجامدانی كێوماڵێكی مەیدانی لەكەشێكی بەفراویدا، ئەگەرچی بەفر سەرتاپای دەشت و دۆڵ و چیاكانی سنووری پێنجوێنی داپۆشیوە، هاوكات رێگەی رۆیشتنی ئۆتۆمبێل تا رادەیەكی زۆر گرفت و ئاستەنگی هەیە و پلەكانی گەرما بۆ ژێر سفر دابەزیوە، بەڵام هیچ كام لەم هۆكارانە نەبوونەتە رێگر لەبەردەم مەفرەزەكانی پۆلیسی دارستان، تا بە شێوەیەكی تۆكمە رێگری لە راوچیان و سەرپێچیكارانی ژینگە بكەن".

هاوكات بەپێی ئامارێكی پۆلیسی دارستان و ژینگەی پێنجوێن، كە وێنەیەكی دراوەتە دواڕۆژ، لەساڵی 2019دا، 73 هاووڵاتی و راوچی، لەسەر راوكردنی باڵندە و ئاژەڵی كێوی و راوكردنی ماسی و لەسەر خەڵوزكردن و  زیادەڕەویی و داربڕینەوە و ئاگركەوتنەوە دەستگیركراون".



created by Avesta Group and powered by Microsoft Azure