قایمقامیەتی سلێمانی زانیاری پەرلەمانتارێک رەتدەکاتەوە

هەواڵ / کوردستان :: 18/01/2020‌ :: 370‌ جار بینراوە

دواڕۆژ، زریان محەمەد

دوای ئەوەی ئەندامێکی پەرلەمانی کوردستان لە تۆڕی کۆمەڵایەتی فەیسبوک بڵاویكرده‌وه‌ کە گوایه‌ پاقلەی کوڵاو بە حەبی پاراسیتۆڵ خۆشکراوە، لیژنە هاوبەشەکانی قایمقامیەتی سلێمانی ئه‌وه‌ رەتدەکەنەوە دەستیان بەسەر پاقلەدا گرتبێت كه‌ بە حەبی پاراسیتۆڵ کوڵێندرابێت.

لەشکر حەمید، سەرۆکی لیژنە هاوبەشەکانى قایمقامیه‌تی سلێمانی، بە دواڕۆژی وت: "پاش ئەوەی لەلایەن ئەندام پەرلەمانێکەوە و لە رێی تۆڕی کۆمەڵایەتی فەیسبوک بڵاوکرایەوە کە لیژنەکانی تەندروستی و قایمقامیەتی سلێمانی دەستیان بەسەر پاقلەدا گرتبێت بە حەبی (پاراسیتۆڵ) کوڵێندرابێت، ئه‌وه‌ ره‌تده‌كه‌ینه‌وه‌ كه‌ هیچ حاڵەتێكی وەها لەلایەن لیژنەکانی قایمقامیەتی سلێمانییەوە تۆماركرابێت و هیچ بڕە پاقلەیەكی كوڵاویش دەستی بەسەردا نەگیراوە". 

سۆران عومەر، ئەندامی پەرلەمانی کوردستان، لە فەیسبوک نووسیویەتی: "لە سلێمانی پاقلە فرۆشێک گیراوە كه‌ حەبی کردووەتە ناو پاقلەی کوڵاو. لیژنەکانی تەندروستی و قایمقامییەتی سلێمانی پاقلەفرۆشێکیان ئاشکرا کردووه کە بۆ هەر مەنجەڵێک پاقلە بڕی 12 حەبی پاراسیتۆڵی تێکردووە و بەقسەی خۆی بەو شێوازە ئاسانتر دەکوڵێت".

سەرۆکی لیژنە هاوبەشەکانی قایمقامیەتی سلێمانی دەڵێت: "بەمەستی سەلامەتیی تەندروستیی هاووڵاتیان و ئەو خواردەمەنیانەی رۆژانە دەیکڕن و دەیخۆن، قایمقامیەتی سلێمانی لەڕێی (38) لیژنەوە لە بەرەبەیانێکی زووەوە تا درەنگانێکی شەو چاودێریی وردی بازاڕ و شوێنە گشتییەکان دەکات، سەرپێچیکاران سزا دەدات".

داواش لە هاووڵاتیان دەکات: "لەکاتی هەبوونی کاڵا و شمەکی خراپ و ماوەبەسەرچوو، یاخود بۆ گەیاندنی سکاڵا، دەتوانن لەڕێی تۆڕی کۆمەڵایەتی فەیسبوک یاخود ژمارە تەلەفونی (07708677777) پەیوەندیی بە قایمقامیەتی سلێمانی و لیژنە هاوبەشەکانییەوە بکەن". 

پ: ل. م
بڵاوکردنەوە: چ.ع



created by Avesta Group and powered by Microsoft Azure