تورکیا داواکاری پارێزەر و کەسوکاری ئۆجەلانی رەتکردەوە

هەواڵ / کوردستان :: 18/01/2020‌ :: 102‌ جار بینراوە

دواڕۆژ، ئاکۆ حەمەد رابی

بەرپرسانی زیندانی ئیمرالی رێگەیان نەدا کەسوکاری ئۆجەلان و سێ زیندانییەکەی دیکە سەردانی زیندان بکەن بۆ ئەوەی چاویان بە ئۆجەلان و زیندانییەکانی دیکە بکەوێت.

عەباس جولەمێرگی، ئەندامی پەرلەمانی تورکیا لە فراکسیۆنی پارتی دیموکراتی گەلان (هەدەپە) بەدواڕۆژی راگەیاند: رۆژی هەینی هەریەک لە محەمەد ئۆجەلان و مەزڵوم دیج یەکێک لە پارێزەرانی ئۆجەلان داوایەکی رەسمییان ئاڕاستەی دادگای شاری بۆرسا کرد تاکو رێگەیان بدەن بچنە زیندانی ئیمرالی و چاویان بە ئۆجەلان بکەوێت.

وتیشی: "ئەمڕۆ شەممە بەرپرسانی زیندانی ئیمرالی وەڵامیان بە نەرێ دایەوە و نەیانهێشت کەسوکار و پارێزەرەکەی ئۆجەلان بچنە ئیمرالی ئەمەش بە بیانوی سنوورداربوونی مافی زیندانیان".

ئەو پەرلەمانتارە باسی لەوەشکرد: کە جگە لە پارێزەر و کەسوکاری ئۆجەلان، کەسوکاری سێ زیندانی دیکەی ئیمرالی داوایان کرد سەردانی گیراوەکانیان بکەن، بەڵام بەهەمان بیانو داواکاری ئەوانیش رەتکرایەوە و رێگە نەدرا بچنە زیندانی ئیمرالی.

ماوەی نزیکەی پێنج مانگە بەرپرسان و دەسەڵاتدارانی تورکیا رێگەیان نەداوە، کەسوکار و پارێزەرەکانی چاویان بە ئۆجەلان بکەوێت. 

عەبدوڵا ئۆجەلان، رێبەری زیندانیکراوی پارتی کرێکارانی کوردستان (پەکەکە) لە ناوەڕاستی مانگی شوباتی 1999 لەلایەن تورکیا و لە پیلانێکی نێودەوڵەتیدا لە نایروبی پایتەختی کینیا دەستگیر کرا و لەو کاتەشەوە لە دوورگەی ئیمرالی سەر دەریای مەڕمەڕەی تورکیا زیندانیکراوە.

پ: چ.ع



created by Avesta Group and powered by Microsoft Azure