هەزاران دۆنم زەوی کورد مەترسی داگیرکردنی لەسەرە

هەواڵ / کوردستان :: 18/01/2020‌ :: 243‌ جار بینراوە

تاگ :: كه‌ركوك

دواڕۆژ، عیماد جەباری

جارێکی دیکە عەرەبە سوودمەندەکانی سەردەمی حزبی بەعس، بەپاڵپشتی نووسراوێکی دادگا هەوڵدەدەن بگەڕێنەوە گوندی خەرابە-ی ناوچەی سەرگەڕان کە بەهۆیەوە 20 هەزار دۆنم زەوی كورد مەترسیان کەوتوەتەسەر.


محەمەد ئیسماعیل، نوێنەری جووتیارانی گوندی خەرابە بۆ دواڕۆژ وتى: "بەساختەکاری و مەحسوبیەت، دادگای کەرکوک نووسراوی بۆ عەرەبە هاوردەکان کردووە بۆ ئەوەی بگەڕێنەوە سەر زەوییەکانی گوندی خەرابە، وەک هەنگاوی یەکەمیش 150 دۆنم زەوی دراوەتەوە عەرەبەکان".

وتیشی: "ئەو بڕیارەی دادگا لەکاتێکدایە کشتوکاڵی کەرکوک بە فەرمی ئاگاداریکردووینەتەوە کە گرێبەستەکانی ئەو عەرەبانە هەڵوەشێنراونەتەوە".

بەوتەی نوێنەری جووتیارانی گونده‌كه‌ هه‌موو زەوییەکانیان تاپۆیان هەبووە، بەڵام لە سەردەمی پێشوودا و بە بڕیاری (لیژنەی کاروباری باکوور) تاپۆکانیان هەڵوەشێنراوەتەوە و دراونەتەوه‌ به‌ عەرەبی هاوردە.

محەمەد ئیسماعیل ئه‌وه‌شى وت: "ساڵی 2012 حکومەتی عێراق بەبڕیارێک تەواوی بڕیارەکانی لیژنەی کاروباری باکووری هەڵوەشاندەوە، بەوەیش گرێبەستەکانی عەرەب هەڵوەشێنراونەتەوە".

وتیشى: "تەواوی پەرلەمانتار و سەرکردایەتی کوردمان لە مەترسییەکە ئاگادارکردووەتەوە بەڵام دەستەوەستانن و تائێستا هیچیان نەکردووە".

پ: ل. م



created by Avesta Group and powered by Microsoft Azure