"پێشمەرگەکەی یەکێتی ئاسەواری لێدان بە جەستەیەوە دیارە"

هەواڵ / کوردستان :: 17/01/2020‌ :: 599‌ جار بینراوە

دواڕۆژ، کۆچەر عەلی

ئه‌و پێشمه‌رگه‌یه‌ى یه‌كێتى كه‌ پاش سێ رۆژ له‌ ده‌ستگیركردنى به‌ مردوویى راده‌ستى كه‌سوكاره‌كه‌ى كرایه‌وه‌ به‌خاكسپێدرا و به‌رپرسێكى ئه‌و حزبه‌ش ده‌ڵێت: گومانیان هه‌یه‌ و جەستەی "جێگەی ئەشکەنجەی زۆر پێوە دیارە".

 
شه‌وى (دووشه‌ممه‌ى رابوردوو 12ى كانونى دووه‌مى 2020) هێزێکی دژە تیرۆری هەولێر هەڵیانکوتایەسەر ماڵێک لە شارۆچکەی باتاسی نزیک هەولێر و پێشمەرگەیەکى سه‌ر به‌ یه‌كێتییان به‌ناوى (مەجید ئیبراهیم- تەمەن 40 ساڵ) لە ماڵەکەی خۆیدا بە تۆمه‌تى ئه‌وه‌ى مامەڵەی بە ماددەی هۆشبەرەوە کردووە دەستگیرکرد.

لە دوای سێ رۆژ لە دەستگیرکردنه‌كه‌ى، دوێنێ ئاسایشی هەولێر کەسوکاره‌كه‌ى ئاگادارکردەوە کە کوڕەکەیان لە بەندیخانە خۆی خنکاندووە.

دوای بڵاو بوونەوەی هەواڵەکەش کەسوکاری (مەجید ئیبراهیم) رایانگەیاند: گومانیان لە گیانلەدەستدانی کوڕەکەیان هەیە و داوای لێکۆڵینەوەی زیاتریان کرد لە لایەنە پەیوەندیدارەکان.

دواتر ئاسایشی هەولێر لە درەنگانێکی شەوی رابوردوودا لە راگەیاندراوێکدا ئاماژەی بەوەکرد: مەجید ئیراهیم لە بەندیخانە خۆی خنکاندووە و بەڵگەکانیش لەبەردەستن.

هەرچەندە ژمارەیەک وێنە لە تۆڕە کۆمەڵایەتییەکان بڵاوبۆتەوە کە دەریدەخات کە شوێنی پەت بە ملی قوربانییه‌كه‌وه‌ دیارە کە گوایە وێنەکان لەکاتی پشکنینی تەرمه‌كه‌ی لە پزیشکی دادی گیراون، به‌ڵام له‌ چه‌ند به‌شێكى ترى جەستەیدا شوێنی ئازاردان بە دیاردەکەوێت. 

سەرلەبەیانی (ئەمڕۆ هەینی 17ی کانوونی دووەمی 2020) تەرمی (مەجید ئیبراهیم) گەڕێنرایەوە زێدی خۆی و دواتر لە مەراسیمێكدا لە گوندی سیساوەی سه‌ر به‌ شاری هەولێر بەخاكسپێردرا.

له‌ په‌راوێزى مه‌راسیمه‌كه‌شدا سەعید مەسیفی، جێگری مەڵبەندی 3ی هەولێری یەکێتیی نیشتیمانیی کوردستان لە کۆنگرەیەکی رۆژنامەوانیدا رایگەیاند: چەند رۆژێک پێش ئێستا هێزەکانی ئاسایشی پارتی دیموکراتی کوردستان بە هاوکاری ئاسایشی سۆران و شەقڵاوە لە نیوەی شەودا (مەجید ئیبراهیم) لە ماڵەکەی خۆیدا دەستگیردەکەن و دەیبەن بۆ ئاسایشی گشتی هەولێر.

وتیشى: لەدوای چه‌ند رۆژێك رۆژ مانەوە لە ئاسایشی گشتی هەولێر هەواڵی خۆکوشتنی ئەو پێشمەرگەیە بە کەسوکارەکەی رادەگەیەنن کە گوایە خۆی خنکاندووە، ئەمەش جێگای گومان و پرسیارە.

سەعید مەسیفی وتیشی: "چۆن ئاسایشی گشتی هێشتیان مەجید ئیبراهیم ئەو کارە بکات ئەو کەرەستانەی خۆی پێ خنکاندووە بیباتە ژوورەوە، ئەمەش لای ئێمە گومانی دروستکردووە".

ئاشکراشیکرد: ئەوان تەرمەکەیان رەوانەی پزیشکی دادی سلێمانی کردووە، بەپێی لێکۆڵینەوە سەرەتاییەکان دەردەکەوێت کە جەستەی جێگەی ئەشکەنجەی زۆر پێوە دیارە و زۆری لێدراوە.

داواشی لە سەرۆکایەتی هەرێمی کوردستان و ئەنجومەنی وەزیران کرد کار لەسەر ئەم پرسە بکەن، چونکە ناکرێت ئاسایش كه‌ بۆ پاراستنی کەسەکان و ئارامی بێت و بەو شێوەیە رەفتار بکات.

پ: شیروان شه‌ریف



created by Avesta Group and powered by Microsoft Azure