دهۆك: سكالا ل سه‌ر 50 كارگه‌هـ و كۆمپانییان هاتییه‌ تۆماركرن

هەواڵ / ڕاپۆرت :: پێش 1 هەفتە ‌ :: 96‌ جار بینراوە

دواڕۆژ، بورهان یه‌حیا

رێڤه‌به‌رییا گشتییا باژێڕڤانیێن پارێزگه‌ها دهۆك راگه‌هاند؛ بۆ سالا نوو دێ رێكخستنه‌ك بۆ مۆله‌تێن كارگه‌هـ و كۆمپانیێن ده‌ڤه‌را كواشێ یا پیشه‌سازی هێته‌كرن چونكو نوكه‌ 127 ژوان ژكاری راوه‌ستیاینه‌ و سكالا ل سه‌ر 50 كارگه‌هـ و كۆمپانییان هاتییه‌ تۆماركرن چونكو ب گۆره‌ی مۆله‌تێن خۆ كار نه‌كرینه‌ و فه‌رمانگه‌ها ژینگه‌ها دهۆك ژی رادگه‌هینیت چ ژوان پالاوگه‌هێن كار دكه‌ن مۆله‌تا فه‌رمی نینه‌ و زیانێن مه‌زن دگه‌هیننه‌ ژینگه‌هێ و چه‌ندین جاران ژی به‌شه‌ك ژ وان هاتینه‌ سزادان.


ژ 187 كارگه‌هان ب تنێ 60 كاردكه‌ن


رێڤه‌به‌رێ گرێبه‌ستان ل رێڤه‌به‌رییا گشتییا باژێڕڤانیێن پارێزگه‌ها دهۆك (سه‌هیم بامه‌ڕنی) بۆ دواڕۆژ رۆهنكر:" داكو ل ڤێ ده‌ڤه‌رێ كار ب شێوه‌یه‌كێ باشتر رێكخستن بۆ بهێته‌كرن بۆ سالا نوو ب هه‌ماهه‌نگی دگه‌ل جهێن په‌یوه‌ندیدار دێ پێداچۆن د مۆله‌تا وان كارگه‌هـ و كۆمپانیێن ل ده‌ڤه‌را پیشه‌سازییا كواشێ دا هه‌ی هێته‌كرن چونكو ژ سه‌رجه‌مێ 187 كارگه‌هـ و كۆمپانییان ب تنێ 60 ژوان ب پاركتیك ل سه‌ر كارێ خۆ به‌رده‌وامن و 127 كار ناكه‌ن".


دێ پێداچۆن ل سه‌ر مۆله‌تێن وان كارگه‌هـ و كۆمپانییان هێته‌كرن

ناڤبۆری دیاركر:" ژ سه‌رجه‌مێ وان 187 مۆله‌تێن كارگه‌هـ و كۆمپانییان 52 ژلایێ رێڤه‌به‌رییا گشتییا وه‌به‌رهێنانێ هاتینه‌دان و 135 ژی ژلایێ سه‌رۆكاتییا باژێڕڤانییا سێمێلێ و هه‌موو ژی ب گۆره‌ی یاسا و رێنومایێ تایبه‌ت ب خۆ كار دكه‌ن، لێ ب مه‌ره‌ما رێكخسنێ دێ دووباره‌ پێداچۆن د مۆله‌تێن وان دا هێته‌كرن".


بتنێ 7 كارگه‌هـ مه‌رجێن وه‌رگرتنا مۆله‌تێ هه‌نه‌

 خویاكر:" پتری 50 كارگه‌هـ و كۆمپانیێن ل ده‌ڤه‌را كواشێ هه‌ین رابووینه‌ ب گوهۆڕینا كارێن خۆ به‌رۆڤاژی مۆله‌تا یاسایی، بۆ نموونه‌ مۆله‌تا وان كارگه‌ها چێكرنا بلۆكانه‌ و نوكه‌ بووینه‌ پالاوگه‌هێن نه‌فتێ و پترییا وان دوور ژ رێنومایێن تایبه‌ت كاردكه‌ن ب تنێ 7 ژوان مه‌رجێن كه‌یسێ وان 50 كارگه‌هـ و كۆمپانییان نوكه‌ ل دادگه‌هێ هه‌یه‌ بۆ هندێ بڕیارا دووماهیێ ل سه‌ر بهێنه‌دان".


هیچ كارگه‌هه‌ك ب گۆره‌ی رێنومایێن ژینگه‌هێ كار ناكه‌ن

 رێڤه‌به‌رێ فه‌رمانگه‌ها ژینگه‌ها پارێزگه‌ها دهۆك بۆ دواڕۆژ گۆت:" ئه‌و شێوازێ كاركرنا پالاوگه‌هێن ده‌ڤه‌را كواشێ گه‌له‌ك مه‌ترسیێن خۆ ل سه‌ر ژینگه‌هێ هه‌نه‌ چونكو ب گۆره‌ی رێنومایێن مه‌ كار ناكه‌ن و چه‌ندین جاران ژی ب كۆژمه‌یێن جودا هاتینه‌ سزادان لێ دووباره‌ ل سه‌ر هه‌مان سه‌رپێچی به‌رده‌وام بووینه‌ و ل دووماهیێ داخواز ژ لایه‌نێن په‌یوه‌ندیدار هاتییه‌كرن ب ئێكجاری وان پالاوگه‌هان دائێخن لێ بێ مفا بوویه‌".
ل سه‌ر شێوازێ دروست یێ كاركرنا وان ژی ناڤبۆری دیاركر:" پێدڤییه‌ رووبه‌رێ كه‌سكاتیێ ب گۆره‌ی رێژه‌یا ستانده‌ر بیت و بلنداهییا بۆریێن سۆتنا نه‌فتێ ژی ڤێت كێم نه‌بیت داكو كاریگه‌ری ل سه‌ر ژینگه‌هێ نه‌مینیت".




پشتی دووڤچۆنا كارگه‌هان هاتییه‌كرن دووباره‌ یێن مۆله‌تێن خۆ نوودكه‌ن

 چاره‌نڤیسێ وان كارگه‌هێن مۆله‌ت هه‌یی و ده‌مه‌كێ درێژه‌ كار ناكه‌ن دێ چ بیت؟ بۆ به‌رسڤا ڤێ چه‌ندێ رێڤه‌به‌رێ گرێبه‌ستان ل رێڤه‌به‌رییا گشتییا باژێڕڤانیێن پارێزگه‌ها دهۆك (سه‌هیم بامه‌ڕنی) دیاركر:" لژنه‌یه‌كا تایبه‌ت ژ لایێ باژێڕڤانییان بۆ دووڤچۆنا ڤان كارگه‌هان هاتییه‌ پێكینان و سه‌ره‌دانا هه‌موویان هاتییه‌كرن و وه‌سا دیار بوویه‌ ژ سه‌رجه‌مێ 187 كارگه‌هـ و كۆمپانییان ب تنێ 60 ژوان ب پراكتیك ل سه‌ر كارێ خۆ به‌رده‌وامن و 127 كار ناكه‌ن و داخواز هاتییه‌كرن چاره‌نڤیسێ خۆ دیار بكه‌ن و پشتی ڤێ چه‌ندێ ب دلخۆشیڤه‌ به‌شه‌ك ژ وان كارگه‌هان بزاڤا نووكرنا مۆله‌تێن خۆ و دووباره‌ ده‌ست بكاربوونێ دكه‌ن".

 

ب: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure