ئەنجامی پشكنینەكەی وەزارەتی پێشمەرگە لە هەڵەبجە ڕاگەیەندرا

هەواڵ / کوردستان :: پێش 1 هەفتە ‌ :: 288‌ جار بینراوە

دواڕۆژ، عەلی حەمە سەعید

دوای ئەوەی دوێنێ‌ تیمێكی پسپۆڕی كیمیایی وەزارەتی پێشمەرگە سەردانی هەڵەبجەیان کرد و پشكنینیان بۆ ژێر زەمینەكانی هەڵەبجە ئەنجامدا كە گومانی مانەوەی كاریگەری چەكی كیمیایان لەسەرە، ئەمڕۆ وەزارەتی پێشمەرگە بە فەرمی ئەنجامی ئەو پشكنینانەی ڕاگەیاند، ئەوەش دوای ئەوەی دواڕۆژ هەواڵێكی لەسەر مەترسی مانەوەی گازی كیمیایی لەو ژێر زەمیانە بڵاو كردەوە.


لە ڕاگەیەندراوێكدا كە وەزارەتی پێشمەرگە لە ماڵپەڕی فەرمی خۆیاندا بڵاویانكردوەتەوە ئاماژە بەوەكراوە، بە فەرمانی وەزارەتی پێشمەرگە و لەسەر داوای كۆمەڵەی قوربانیانی كیمیابارانی هەڵەبجە، سریەی بەرگری كیمیاویی وەزارەتی پێشمەرگە تیمێكی نارد بۆ پارێزگای هەڵەبجە بە مەبەستی پشكنینی ژێرزەمینی ماڵێك كە گومانی ژەهراوی بوونی لێئەكرا بە هۆی مانەوەی پاشماوەی كیمیابارانی هەڵەبجە لە ساڵی‌ 1988.

ئەوەشخراوەتەڕوو: تیمی كیمیاوی بە وردی ماڵەكەو ژێرزەمینەكەیان پشكنی، بە بەكارهێنانی چەند ئامێرێك كە تایبەتن بە ئاشكراكردنی ماددە كیمیاوی و ژەهراویەكان، دواتر ماڵەكەیان خاوێن كردەوە، دواتر لە ئەنجامەكان دەركەوت كە هیچ مەترسیەك لە ئارادا نییە و دڵنیایی درا بەخاوەن ماڵ، كە هیچ پاشماوەو مەترسیەكی چەكی كیمیاوی لەماڵەكەدا بوونی نەماوە.

لە ڕاگەیەندراوەكەی وەزارەتی پێشمەرگە ئەوەش هاتووە، سریەی بەرگری كیمیایی لە وەزارەتی پێشمەرگە توانیان بەسەركەوتووی ئەركەكەیان بە ئەنجام بگەیەن، بۆ ئەو مەبەستەش هەریكە لە جێگری سەرۆكی دەستەی ئەركانی هێزی پێشمەرگە و پارێزگار و پۆلیسی هەڵەبجە و گروپی دادوەری كوردستان و كۆمەڵەی قوربانیان هاوكاری تیمەكە بوون.

هاتنی ئەو تیمەی وەزارەتی پێشمەرگە لە كاتێكدایە كە پێشتر دواڕۆژ لەسەر زاری سەۆكی كۆمەی قوربانیانی كیمابارانی هەڵەبجەوە بڵاوی كردەوە كە تا ئێستاش مەترسی لەسەر حەوت ژێرزەمینی هەڵەبجە ماوە كە گومان دەكرێت كاریگەری چەكی كیمیایان لەسەر مابێت.

 

پ: ک. س



  • ڕۆژ
  • هەفتە
  • مانگ
created by Avesta Group and powered by Microsoft Azure