زانیاری نوێ لەبارەی پرسی دامەزراندنەکانی کەرکوک ئاشکرا دەکرێت

هەواڵ / کوردستان :: 13/01/2020‌ :: 307‌ جار بینراوە

دواڕۆژ، یوسف موڕاد

لەگەڵ بڵاوکردنەوەی ناوی دەرچوان بۆ بەڕێوەبەرایەتی پەروەردەی کەرکوک، بەهۆی نایەکسانی لەنێوان پێکهاتەکان نیگەرانی زۆری لێ کەوتەوە و ئەو ناوانەی ئاشکرا کراون لەجێگەی خواستی نەتەوەکانی کەرکوک نیە، ئەندامێکی کوردی لیژنەی پەروەردە لەپەرلەمانی عێراق دواین زانیاری ئاشکرا دەکات.


مەریوان نادر، ئەندامی ئەنجومەنی نوێنەرانی عێراق بەدواڕۆژی راگەیاند: نادادپەروەری زۆر هەیە لەپرسی دامەزراندنی پەروەردەی کەرکوک و رێژەی کورد لەبەرچاو نەگیراوە و راسپاردەمان لەنێو راسپاردەکانی لیژنەی پەروەردە کردووە و داوامان کردووە یەکسانی لەنێوان پێکهاتەکان بکرێت، نووسراویش دراوەتەوە سەرۆکی پەرلەمان و نوێنەرانی کورد و عەرەب واژۆیان لەسەرکردووە و 13ی کانوونی دووەم پرسیاری جددی لەوەزیری پەروەردە دەکەین تاوەکو ئاشکرا بکرێت بۆچی بەپێی رێنماییەکانی سکرتێری گشتی سەرۆک وەزیران دامەزراندنەکە نەکراوە. 

وتیشی: "لەگەڵ لایەنە پەیوەندیدارەکان گفتوگۆمان کردووە بەتایبەت فوئاد حسێن، وەزیری دارایی حکومەتی عێراق تاوەکو لەگەڵ وەزیری پەروەرده بەدواداچوون بکات و ئەگەر ئەنجامێکی نەبوو ئەوا رەزامەندی وەزارەتی دارایی نەدرێت لەسەری".

ئاماژەی بەوەشکرد: لەگەڵ بەڕێوەبەری پەروەردەی کەرکوک کۆدەبینەوە و پێشتریش پێمان وتووە کە پێشێلکاری هەیە و ئەو لێی بەرپرسە و دەستەی نەزاهەشمان ئاگادار کردووەتەوە.  

مەریوان نادر وتیشی: "بەدواداچوون بۆ ئەو پەڵپانە (اعتراض) دەکەین و ئەوانەشی کە خۆیان بەمافخوراو دادەنێن پێویستە، پەڵپەکانیان تۆمار بکەن". 

هەرچەند دەبوو ئەو پلە دامەزراندنانەی کە بۆ بەڕێوەبەرایەتی پەروەدەی کەرکوک دیاریکراوە و 2800 پلەی دامەزراندنە، یەکسانی لەنێوان پێکهاتەکان هەبوایە، بەڵام قۆرخکراوە بەجۆرێک بۆ کورد 550 پلەی دامەزراندن و 370 پلەی دامەزراندن بۆ تورکمان دیاریکراوە. 

بەپێی زانیارییەکانی دواڕۆژ کۆمەڵێک  بەڵگە هەن کە سەلمێنەری بوونی نایەکسانییە لەدامەزراندنی پەروەردەی کەرکوک و لەلایەن دەستەی دەستپاکی عێراقەوە بەدواداچوونی بۆ کراوە.

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure