ئاسايشا رۆژئاڤا رێ نه‌دان هێزێن رووسیا بچن ده‌رگه‌هێ سێمالكا

هەواڵ / کوردستان :: 11/01/2020‌ :: 237‌ جار بینراوە

دواڕۆژ، دهۆك


هێزێن ئاسایشا رۆژئاڤایێ كوردستانێ، رێ نه‌دان هێزێن رووسیا بچن ده‌رگه‌هێ سێمالكا یێ دناڤبه‌را رۆژئاڤا و باشوورێ كوردستانی دا.


ره‌وانگه‌ها سوورى بۆ مافێن مرۆڤان راگه‌هاند: ئه‌ڤرۆ شه‌مبى 11-ێ كانوونا دووێ 2020، هێزه‌كار رووسى ب 30 ترۆمبێلێن له‌شكه‌رى، ژ باژارێ حه‌سه‌كه‌ هه‌ولدان بچن ده‌رگه‌هێ سێمالكا، لێ هێزێن ئاسایشا رۆژئاڤایێ كوردستانێ رێ نه‌دان وێ هێزا رووسیا.


لدۆر هه‌مان مژارێ، فه‌خرى عه‌گید، ل رێڤه‌به‌ریا ده‌رگه‌هێ سێمالكا بۆ دواڕۆژ گۆت:"ئه‌و هێزا رووسیا دڤییا وه‌ك گه‌له‌ك ده‌ڤه‌رێن دى یێن سنوورێ رۆژئاڤایێ كوردستانێ كو هێزێن رووسى لێدگه‌رن، ڤێجارێ بچن سێمالكا، لێ هێزێن ئاسایشێ رێ ل وان گرتن".


ناڤبۆرى خوه‌یاكر:"لدووڤ رێككه‌ڤتنا تركیا و رووسیا ل سالا ده‌ر‌بازبوویى، نابیت ژ بلى هێزێن رێڤه‌به‌ریا خوه‌سه‌ر چۆ هێزێن دى بچن ده‌رگه‌هێ سێمالكا، ته‌نانه‌ت هێزێن رووسیا ژى، له‌ورا ئه‌ڤرۆ ئاسایشێ رێ نه‌دا وان هێزێن رووسیا".


ئه‌وژى دازانین:"پێشتر هێزێن رووسیا سۆزدابوو رێڤه‌به‌ریا خوه‌سه‌ر بۆ پێشڤه‌برن و سه‌خبێركرنا ده‌رگه‌هێ سێمالكا هاریكاریا رێڤه‌به‌ریا خوه‌سه‌ر بكه‌ن، لێ هاتنا وان یا ڤێ جارێ بێ هه‌ماهه‌نگى بوو و نه‌یا زه‌لال بوو".



created by Avesta Group and powered by Microsoft Azure