ئەبوبەكر كاروانی: سەرنەكەوتنی كۆنگرە دەبێتە هۆی وازهێنانی بەشێك لە ئەندامانی یەكگرتوو

هەواڵ / چاوپێکەوتن :: 24/12/2019‌ :: 774‌ جار بینراوە

دواڕۆژ، سامان قوبادی


لە چەند رۆژی داهاتوودا كۆنگرەی یەكگرتووی ئیسلامی كوردستان لە هەولێر ئەنجام دەدرێت، ئەبوبەكر كاروانی ئەندامی دەستەی دامەزرێنەر و كاندید بۆ پۆستی ئەمینداری گشتی یەكگرتوو لە دیدارێكی دواڕۆژ پرۆژەكەی بۆ چاكسازی لەناو ئەم حیزبەدا ئاشكرا دەكات، هاوكات باس لە نەمانی پاشگری ئیسلامی دەكات، دەشڵێت:" چاواڕوانی سەركەوتن دەكەین، بەڵام سەرنەكەوتنی كۆنگرە دەبێتە هۆی نائومێد بوون و وازهێنانی كادیرەكانی یەكگرتوو".


دواڕۆژ، بۆچی دووبارە خۆت كاندید كردەوە بۆ پۆستی ئەمینداری گشتی یەكگرتوو؟


 ئەبوبەكر كاروانی: لەبەر ئەوەی دوای ئەو پاشەكشەیەی كە بەسەر یەكگرتوودا هات، و پێویستی ئەم حیزبە بۆ دووبارە هەڵسانەوە و خستنەوە سەر پێ و دەستپێكردنی قۆناغێكی نوێی گەشەكردنی خۆی، پێویستی بە شێوازێکی نوێی بەڕێوەبردن و وزە و تواناكانی ناوی وهەموو ئەوانە هەیە خۆیان بە دڵسۆزی چارەنوسی یەكگرتوو دەزانن، خۆپاڵاوتنی ئێمە لەم چوارچێوەدایە، تەمەنێكی زۆریشمان لەم پێناوەدا بردۆتە سەر، پێشتر پڕۆژە و دیدمان هەبووە بۆ گەشەپێدانی، بۆیە لێپرسراوێتی دەكەوێتە ئەستۆمان لە هەمبەر چارەنووسی، ئەوەش وایکرد دووبارە خۆم بۆ پۆستی ئەمینداری گشتی یەكگرتوو كاندید بکەمەوە. ئەندامانی كۆنگرەش هەر بڕیارێكیان هەبوو ئێمە رێزی لێ دەگرین. 





دواڕۆژ، ئایا لەناو رێكخستنەكانی یەكگرتوودا كارت كردووە بۆ بەدەست هێنانی ئەم پۆستە؟ بەبەرچاوروونییەوە ركابەری سەڵاحەدین بەهادین دەکەیت؟

 ئەبوبەكر كاروانی: چەندین ساڵە ئەنوسم و قسە دەكەم و تێڕوانینی خۆم هەیە بۆ هەموو پرسەكان، لەناو رێكخستنەكانی یەكگرتووشدا بووم، بەگشتی كارێكمان نەكردووە ئەندامان دڵیان بڕەنجێت یان گومانیان لە ئێمە هەبێت بۆ لەئەستۆ گرتنی لێپرسراوێتی ئایندەی ئەم حیزبە، لەخوشك و براکانم دانەبڕاوم، ویستومانە بڕوا بە زۆرترین ئەندام و رێكخستنەكان بهێنین، بەوەی خۆمان ئامادە بكەین بۆ ئایندەیەكی جیاوازتر، تا هێز بۆ یەكگرتوو بگەڕێتەوە و چاكسازی لەم حیزبەدا بكرێت و نوێ ببێتەوە.




دواڕۆژ: لە هەڵبژاردنی رابردوودا پێگەی جەماوەری یەكگرتوو بۆ نیوە دابەزی، ئایا كۆنگرەی ئەم جارە دەبێتە هۆی گۆڕینی سەركردایەتی ئێستای یەكگرتوو، مانەوەی ئەم سەركردایەتییە دەتوانێت یەكگرتوو لەم قۆناغە رزگار بكات؟ 

ئەبوبەكر كاروانی: ئەمە دەمێنێتەوە سەر ئەندامانی كۆنگرە، حەتمەن دەبێت دوای هەموو پاشەكشەیەك بەخۆداچوونەوە هەبێت، پێم وایە ی یەكگرتووەكان و ئەندامانی کۆنگرەش هەڵسەنگاندنی تایبەت بەخۆیان بۆ ئەدای سەركردایەتی ئێستا و میكانیزمەكانی كاركردن و بڕیاردان لەقۆناغی ڕابردوودا هەیەو لەو ڕوانگەشەوە بیردەکەنەوە، ئەم پرسەش بەجێ دەهێڵین بۆ ئەندامانی كۆنگرە تا بە دەنگەكانی خۆیان بڕیار لە ئەدای سەرکردە و سەركردایەتی یەكگرتوو بدەن.




دواڕۆژ: ئایا كۆنگرەی یەكگرتوو لەكاتی خۆیدا دەكرێت؟ لەكوێ دەكرێت؟ 

ئەبوبەكر كاروانی: بەڵی لەكاتی خۆیدا و لە 28 و 29ی ئەم مانگە لە شاری هەولێر دەكرێت، ویستمان لە سلێمانی بیكەین، بەڵام شوێنێكی گونجاومان دەست نەكەوت. 



دواڕۆژ: ئەگەر ببیتە ئەمینداری گشتی یەكگرتوو پاشگری ئیسلامی لە یەكگرتوو لادەبەن؟ 

 ئەبوبەكر كاروانی: پڕۆژەی من تەنیا پاشگری ئیسلامی نییە، بەڵكو پڕۆژەیەكی قوڵترە بۆ دووبارە بیناكردنەوەی كۆی كایەكانی یەكگرتوو لەرووی سیاسی و پەروەردەیی و ئیداری و راگەیاندن و داراییەوە، نەمانی پاشگری ئیسلامی بەشێكی بچووكە لەو پڕۆژەیە، ئەمەش دەمێنێتەوە سەر سەر بڕیاری ئەندامانی كۆنگرە وئاڵوگۆڕەکان لەقۆناغی داهاتوودا.


دواڕۆژ: بەڵام تاچەند بەپێویستی دەزانیت پاشگری ئیسلامی بمێنێتەوە؟ 

ئەبوبەكر كاروانی: زۆربەی پارتە ئیسلامییەكانی ناوچەکە پاشگری ئیسلامییان پێوەنەماوە، بەڵام لەم كۆنگرەیەی یەكگرتودا پێموانییە پرسی نوێكردنەوەی یەكگرتوو لەسەر ئاستی لێكردنەوە یان لێ نەكردنەوە پاشگری ئیسلامی بوەستێت، ئەم پرسە لە قۆناغی داهاتوودا و لەچوارچێوەی پڕۆژەیە کی هەمەلایەنە بۆ خۆنوێکردنەوە بەتەوافوق و ڕەزامەندی دامودەزگا و ئۆرگانە قیادی وکادرەکانی یەکگرتوودا دەكرێت.

 

دواڕۆژ: بوونی ئایدۆلۆجیایەكی تایبەت ئایا زیانی لەم حیزبە نەداوە؟

 ئەبوبەكر كاروانی: پاشەكشەی یەكگرتوو لە ماوەی رابردوودا بەشێکی بەرچاوی پەیوەست بوو بە گوتار و هەڵوێستە سیاسییەكانیەوە، ئەگەر یەكگرتووی ئیسلامی كوردستان، باشتر واقیعی سیاسی هەرێم و ئاراستەی بیركردنەوەی دەنگدەرانی هەڵبسەنگاندایە، دەیتوانی پارێزگاری لە كورسییەكانی خۆی بكات، بەڵام بۆ ئەوەی ببێت بە هێزێکی خاوەن پێگە وکاریگەری و جەماوەریی، بێگومان دەبێت كراوەتر بێت، خەڵك بە دەوری پڕۆژەیەكی كراوەی سیاسی كۆبکاتەوە و تەوژمێکی فەرهەنگی و خزمەتی ڕوحی وئەخلاقی بەرفراوانیش بخاتە ڕێ. ئەم حیزبەش رەگەزی ئەوەی تێدایە، تەنانەت پێناسەكردنی یەكگرتوو لەپڕۆگرامی ئێستایدا ئایدۆلۆجیانە نییە، چونکە خۆی وەکو هێزێکی ئیسڵاحی نیشتیمانی پێناسە کردووە کە لە پێناو بە دیهێنانی کۆمەڵگەیەکی گەشەکردوو دەسەڵاتێکی دادپەروەردا خەبات دەکات، بەڵام واقیعی یەكگرتوو ماویەتی بگاتە ئاستی ئەم پێناسەیە، ئەگەر ئەم حیزبە لەگەڵ ئەم خۆ پێناسەکردنە بەتەواوی خۆی بگونجێنێت و مافی خۆی پێ بدات دەتوانێت بەڕووی جەماوەردا زیاتر بکرێتەوە و لەئاستێکی بەرزیشدا خۆی نوێ بکاتەوە. 



دواڕۆژ: هێڵە گشتییەكانی ئەو پڕۆژەیەی باسی دەكەیت چین؟ 

ئەبوبەكر كاروانی: پڕۆژەكە باسێكی فكری وسیاسی وئابوری و بانگخوازی وپەروەردەیی و رێكخراوەیی تێكەڵە، بەگشتی ئەوە دەخاتەڕوو كە دیدمان بۆ بیناكردنەوەی كایە جۆراوجۆرەكانی یەكگرتوو، لە ڕووی سیاسی و پەروەردەیی و دارایی و راگەیاندن و رێكخستنەوە چیە؟، چۆن ڕووە بانگخوازیەكەی یەكگرتوو دووبارە دابمەزرێنینەوە، رووە سیاسییەكەی كارا بكەینەوە، راگەیاندنەكەی كارا و پسپۆڕ بێت، هەروەها دارایی یەكگرتوو دەستكاری بكەین بۆ ئەوەی لەدەست ئەم قەیرانە داراییە نەسوڕێتەوە و تێگەیشتنێکی نوێ بۆ جۆری خەرجی و سەرچاوەی داهات بخەینەڕوو. 



دواڕۆژ: ئایا ئەم پڕۆژەیە دەبێتە هۆی گۆڕینی پەیوەندییەكانی یەكگرتوو لەگەڵ حیزبە ناوخۆیی و ئیخوانەكانی دەرەوە و هەروەها توركیا؟

 ئەبوبەكر كاروانی: یەكێك لە كێشەكانی یەكگرتوو ئەوەیە پەیوەندییەكانی لە ئاستی پێویستدا نین بۆیە پێش هەموو شتێ پێویستی بە پەرەپێدانی پەیوەندییەکانیەتی، لە مونتەڵەقی كوردستانی بوونی خۆیەوە پەیوەندییەكانی بەئاقاری ئامادەبوونێکی زۆرتری خۆی ئاراستە بكات.گرنگە کۆنفرانسێکیش بۆ هەڵسەنگاندی کێشەو واقیعی پەیوەندییەکان  و ئاسۆی ئایندەیشیان لەگەڵ ناوخۆ و دەرەوە بگیرێت. 


دواڕۆژ: لە ئەنجامی كۆنگرەیەك كە بەدڵی ئەندام و لایەنگران نەبێت، تاچەند ئەگەری ئینشیقاق هەیە؟ 

ئەبوبەكر كاروانی: ئەوەندەی پەیوەندی بەئێمەوە هەبێت لەناو كۆنگرە چاوەڕێی شتی لەوجۆرە ناكەین، بەڵكو کاردەکەین کۆنگرەیەکی ئارام و ئاسایی بێت، بەڵام سەرنەكەوتنی كۆنگرە ڕوونە دەبێتە سەرچاوەی نائومێدی بۆ رێكخستنەكان، كە ببێتە هۆی ئەوەی بەشێك لە رێكخستنەكانی یەكگرتوو دابنیشن، بەڵام پێشبینی كەرتبوون لە یەكگرتوودا ناكەم . 


دواڕۆژ: لەم حاڵەتەدا چوونی كادیرەكانی یەكگرتوو بۆ ناو حیزبەكانی تر روودەدات؟


 ئەبوبەكر كاروانی: ئەگەر كۆنگرەیەكی سەركەوتوو نەبێت و خوانەخواستە شکست بخوا کەئێمە چاوەڕێی شتی لەو جۆرە ناکەین و پێمان وایە سەرکەوتوو دەبێت، خەڵك سارد دەكاتەوە لە كاركردن و درێژەدان لەگەڵ ئەم حیزبە، بەڵام خوا حەزکات دەبێـە مایەی رەواندندنەوەی تەمی ئەو نائومێدیەك ئێستا لەناو بەشێ لە رێكخستنەكاندا بەدی دەکرێت.  

پ: ک. س



created by Avesta Group and powered by Microsoft Azure