یەكێتی زانایانی ئاینی: راگەیاندن بە هەڵە نووسراوەكەی ئێمەیان بە خەڵكی گەیاندووە

هەواڵ / کوردستان :: 15/12/2019‌ :: 229‌ جار بینراوە

دواڕۆژ، بڕیار محەمەد

یەكێتی زانانی ئاینی ئیسلامی كوردستان لەدوای كۆبوونەوەیان لەگەڵ لیژنەی ژنان و ئەوقافی پەرلەمانی هەرێمی کوردستان رایگەیاند: دەزگاكانی راگەیاندن هۆكار بوون بۆ ئەوەی خەڵك و چالاكانی بواری ژنان و  رێكخراوەكانی ژنان هێرش بكەنە سەر یەكێتی زانایان، چونكە بە هەڵە  نووسراوەكەی ئێمەیان لێكداوەتەوە.

لەنجە دزەیی، سەرۆكی لیژنەی ژنان لەپەرلەمانی كوردستان لە كۆنگرەیەكی رۆژنامەوانیدا  رایگەیاند: ئەمڕۆ  هاتووینەتە  بارەگای یەكێتی زانایانی ئاینی ئیسلامی كوردستان لەگەڵ بەرپرسانی ئەو یەكێتییە كۆبووینەوە بۆ ئەوەی روونكردنەوە لەسەر ئەو فەتوایە یان ئامۆژگاریە بدەن كە خۆیان ناویان ناوە ئامۆژگاری، دوای كۆبوونەوە لەگەڵیان گەیشتینە ئەو ئەنجامەی كە لە داهاتوودا پێویستە هەماهەنگی زیاتر هەبێت  لە نێوان ئێمە و ئەوان بە تایبەتی بۆ پرسەكانی تایبەت بە ژنان.

لای خۆشیەوە عەبدوڵا وەیسی: سەرۆكی یەكێتی زانایانی كوردستان لەكۆنفڕانسێكی رۆژنامەوانیدا رایگەیاند: بەداخەوە لەلایەن دەزگاكانی راگەیاندن خوێندنەوەی زۆر هەڵە بۆ ئەو بڵاوكراوەیە كرا كە لەلایەن یەكێتی زانایانەوە سەبارەت بە پرسی ژنان و شۆفێرانی تەكسی دەرچووبوو كە بەداخەوە ژمارەیەكی زۆر لەشۆفێرانی تەكسی بەشێوەیەكی ناڕەوا هەڵسوكەوتیان لەگەڵ سەرنشینانی ژنان كە لەگەڵیان سەردەكەوتن دەكرد.

رەتیشی كردەوە: "كە بڵاوكراوەكەمان سنوورداركردنی ئازادی تاكەكەسییەكان بێت و ئێمە بەپێچەوانەوە لەگەڵ مافە دەستووری و یاسایی و ئازادییەكانین بەتایبەت بۆ ژنان و پاراستنی پێگەی ژنان لەكۆمەڵگە، لەبەر ئەوەی روونكردنەوەكەمان بۆ پاراستنی ژنان بووە و تاوەكو هیچ  كەسێك نەتوانێ بێڕێزی بەرامبەر بەژنان بكات، ئێمەش رۆڵی كارامان هەبووە لەبەدەستهێنانی مافی ژنان لەسەرجەم بوارەكاندا".

دەشڵێت: "ژمارەیەكی یەكجار لەو كەسانەی كە خوێندنەوەی هەڵەیان كرد بۆ بڵاوكراوەكەمان دڵنیاین بڵاوكراوەكەیان نەخوێندووەتەوە و بەبێ ئاگایی خۆشیان نەیان خوێندووەتەوە، چونكە ئەگەر خوێندنەوەیان هەبووایە ئەوا بەمشێوەیە خوێندنەوەیان بۆ روونكردنەوەكانمان نەدەكرد، چونكە ئەو روونكردنەوانە لەچوارچێوەی شەریعەتی ئیسلام بووە و ئامۆژگاری موسڵمانانمان كردووە، ئامۆژگاریش مانای ئەوەنیە تەنیا دەبێ جێبەجێ بكرێ، بەڵكو تۆ ئازادی لەوەی جێبەجێی دەكەی یاخود نا".

پ: چ.ع



  • ڕۆژ
  • هەفتە
  • مانگ
created by Avesta Group and powered by Microsoft Azure