مه‌سیحیێن ده‌ڤه‌ره‌كا دهۆك به‌ره‌ڤ ئه‌وروپا كۆچبه‌ر دبن

هەواڵ / کوردستان :: 13/12/2019‌ :: 347‌ جار بینراوە

دواڕۆژ، دهۆك
گه‌له‌ك مه‌سیحیێن روونشتڤانێن گوندێن قه‌زا ئامێدیێ ل سنوورێ پارێزگه‌ها دهۆك، ژ به‌ر هێرشێن تركیا گوندێن خوه‌ چۆلكرینه‌ و به‌ره‌ڤ ئه‌وروپا چووینه‌.

سه‌عدۆ دوورى، مۆختارێ گوندێ دوورێ ل ده‌ڤه‌را كانیماسێ بۆ دواڕۆژ گۆت:"ئه‌ڤ ساله‌ 2019، چوار گوندێن مه‌سیحییان ل سنوورێ ناحییا كانى ماسێ ب ته‌مامى هاتینه‌ چۆلكرن، ئه‌گه‌ر ژى هێرشێن له‌شكه‌رێ تركیانه‌ كو  به‌هانه‌یا هه‌بوونا گه‌ریلایێن په‌كه‌كێ هێرش دكه‌ن سه‌ر گوندێن مه‌سیحییان".

ناڤبۆرى دازانین:"گوندێن مه‌سیحییان یێن ئه‌ڤ ساله‌ هاتینه‌ چۆلكرن(سه‌رده‌شت، هه‌لوه‌، مه‌لخته‌ و كانى ماسا كه‌ڤنن) كو پتریا ئه‌و كه‌سێن گوندێن خوه‌ هێلاین یه‌كسه‌ر به‌رێ خوه‌دان ئه‌وروپا".

سه‌عدۆ ئاماژه‌كر:"ئه‌و مه‌سیحیین ژ به‌ر هێرشێن تركیا گوندێن خوه‌ ل قه‌زا ئامێدیێ دهێلن، ب رێییا تركیا یان ئوردن دچن ئه‌وروپا".

لدۆر مژارا چۆلكرنا گوندێن سنوورێ پاریزگه‌ها دهۆك ژبه‌ر هێرشێن باله‌فڕێن تركیا، حیكمه‌ت محه‌مه‌د گه‌ودا، ئه‌ندامێ په‌رله‌مانێ كوردستانێ، به‌رى نووكه‌ بۆ دواڕۆژ گۆتبوو:"مژارا هێرشێن تركیا بۆ سه‌ر گوندێن پارێزگه‌ها دهۆك ئه‌و دێ كه‌نه‌‌ دبه‌رنامه‌یێ كارێن په‌ر‌له‌مانێ كوردستانێ دا".

لدووڤ زانیاریێن دواڕۆژ، ئه‌ڤ ساله،‌ نێزیكى 200 مه‌سیحییان ژ گوندێن سنوورێ قه‌زا ئامێدیێ و ناحییا كانى ماسێ، ده‌ڤه‌رێن خوه‌ چۆلكرینه‌ و یه‌كسه‌ر قه‌ستا ئه‌وروپا كرینه‌.






created by Avesta Group and powered by Microsoft Azure