كچێك دوای ددان كێشان گیانی له‌ده‌ستدا

هەواڵ / کوردستان :: 11/12/2019‌ :: 2953‌ جار بینراوە

دواڕۆژ، ئاكۆ حه‌مه‌د رابی 

كچێكی دانیشتوی ناحیه‌ی سیده‌كان دوای ددان كێشان گیانی له‌ده‌ستدا و وته‌بێژی پۆلیسی سۆرانیش ده‌ڵێت: لێكۆڵینه‌وه‌ له‌سه‌ر هۆكاری مردنه‌كه‌ى ده‌ستیپێكردووه‌. 


(ئه‌مڕۆ چوارشه‌ممه‌ 11ى كانونى یه‌كه‌مى 2019) كچێكی دانیشتوی ناحیه‌ی سیده‌كانی سه‌ر به‌ قه‌زای سۆران به‌ناوی (س.ع.ح) ته‌مه‌ن پازده‌ ساڵان بووه‌، به‌مه‌به‌ستی ددان كێشان سه‌ردانی نه‌خۆشخانه‌ی كردووه‌ و دوای كێشانی ددانه‌كه‌ی گه‌ڕاوه‌ته‌وه‌ ماڵه‌وه‌، به‌ڵام له‌ماڵه‌وه‌ ته‌ندروستى تێكچووه‌ و به‌هۆیه‌وه‌ گه‌ڕێندراوه‌ته‌وه‌ بۆ نه‌خۆشخانه‌، به‌ڵام به‌ر له‌ گه‌یشتنی به‌ نه‌خۆشخانه‌ له‌ رێگادا گیانی له‌ده‌ستداوه‌. 

موقه‌ده‌م شه‌ماڵ دێوالی، وته‌بێژی پۆلیسی قه‌زای سۆران به‌ دواڕۆژی راگه‌یاند: له‌سه‌ر فه‌رمان و بڕیاری دادوه‌ر ته‌رمی كچه‌كه‌ گواستراوه‌ته‌وه‌ بۆ پزیشكی دادی سۆران و لێكۆڵینه‌وه‌ش له‌ هۆكاری مردنی ده‌ستیپێكردووه‌ و دوای ته‌واوبوونی لێكۆڵینه‌وه‌ ورده‌كارییه‌كه‌ی بڵاوده‌كه‌ینه‌وه‌. 

لای خۆیەوە کاروان فەیسەڵ، بەڕێوەبەری نەخۆشخانەی سیدەکان بە دواڕۆژی وت: ئەو کچە لای ئێمە تەنها ددانی کێشراوە و دوای ددان کێشانەکە فشاری خوێنی دابەزیوە و دواتر ئاسایی بۆتەوە، پاشان گەڕێنراوتەوە بۆ ماڵەوە و دۆخی ئاسایی بووە و دواتر وتویەتی برسیمە و پاش خواردنێك دیسان تەندروستی تێکچووە و ویستراوە بگەیەنرێتە نەخۆشخانە، بەڵام لە رێگادا گیانی لەدەستداوە.

ئاماژەی بەوەشدا: لای ئێمە کارەکانی بە باشی بۆ کراوە و ناشزانرێت ئایا پێشتر هیچ گرفتێکی دیکەی تەندروستی هەبووە یاخود نا و کەسوکارەکەی نەیانزانیبێت.

بەڕێوەبەری نەخۆشخانەی سیدەکان وتیشی: "دوای دەرچوونی ئەنجامی توێکاری لە پزیشکی دادی ئەنجامەکان دەردەچن و دیاردەبێت کە هۆکاری مردنەکەی چی بووە".

پێداچوونه‌وه‌: شیروان شه‌ریف



  • ڕۆژ
  • هەفتە
  • مانگ
created by Avesta Group and powered by Microsoft Azure